រាជធានីភ្នំពេញ ៖ នៅព្រឹកថ្ងៃទី២១ ខែកុម្ភៈ ឆ្នាំ២០១៨នេះសមត្ថកិច្ចបានបញ្ជូនខ្លួនជនសង្ស័យម្នាក់ ជាយោធា ពាក់ព័ន្ធសំណុំរឿងប្រើប្រាស់រថយន្តព័ណ៌ត្រីអ៉ី និងក្លែងស្លាកលេខរថយន្ត ទៅតុលាការ ដើម្បីអនុវត្តតាមនិតិវិធី ។
ជនសង្ស័យរូបនោះឈ្មោះ យឹម សុកាន ភេទប្រុស អាយុ៣៥ឆ្នាំ មុខរបរយោធា ឋានន្តរស័ក្តិ អនុសេនីយ៍ទោ នៃអង្គភាពបញ្ជាការដ្ឋានកងរថក្រោះ។ ជនសង្ស័យរូបនេះ ត្រូវបានកម្លាំងកងរាជអាវុធហត្ថឃាត់ខ្លួន កាលពីព្រឹកថ្ងៃទី១៩ ខែកុម្ភៈ ឆ្នាំ២០១៨ កន្លងទៅ នៅចំណុចភូមិផ្សារ ត្រពាំងក្រឡឹង ឃុំគីរីវ័ន្ត ស្រុកភ្នំស្រួច ខេត្តកំពង់ស្ពឺ ។
សមត្ថកិច្ចបានបញ្ជាក់ថា ការឃាត់ខ្លួនជនសង្ស័យខាងលើ បានធ្វើឡើង តាមដីកាបញ្ជឱ្យចូលខ្លួន លេខ០៣៤ អ.យ.ព របស់ លោក ងិន ពេជ ព្រះរាជអាជ្ញារងអមសាលាដំបូងរាជធានីភ្នំពេញ ចោទប្រកាន់ ជនសង្ស័យ ពីបទប្រើប្រាស់រថយន្តព័ណ៌ត្រីអ៉ី និងក្លែងស្លាកលេខរថយន្ត ៕
