បាត់ដំបង ៖ ពិធីប្រកាសតែងតាំងចូលកាន់មុខតំណែង ប្រធានមន្ទីរពាណិជ្ជកម្មខេត្តបាត់ដំបង បានប្រព្រឹត្តទៅកាលពីពេលកន្លងទៅថ្មីៗនេះ នៅសាលាខេត្តបាត់ដំបង ក្រោមអធិបតីភាព ឯកឧត្តម ច័ន្ទ សុផល អភិបាលនៃគណអភិបាលខេត្ត និងឯកឧត្តម ប៉ាន សូរសក្តិ រដ្ឋលេខា ធិការក្រសួងពាណិជ្ជកម្ម។
ក្នុងសេចក្តីប្រកាសស្តីពីការតែងតាំងមន្ត្រីរាជការ របស់ក្រសួងពាណិជ្ជកម្ម បានសម្រេចតែងតាំងលោក គឹម ហួត ជាប្រធានមន្ទីរពាណិជ្ជកម្មខេត្ត ជំនួសលោកស្រី ព្រំ វណ្ណា ដែលត្រូវចូលនិវត្តន៍។
ឯកឧត្តម ច័ន្ទ សុផល បានកោតសរសើរដល់ស្នាដៃ សមិទ្ធិផលលើវិស័យពាណិជ្ជកម្ម ក្រោមការដឹកនាំដ៏ល្អ របស់លោកស្រី ព្រំ វណ្ណា ដោយមានការណែនាំ តម្រង់ទិស ពីឯកឧត្តម រដ្ឋមន្ត្រីក្រសួងពាណិជ្ជកម្ម ព្រមទាំងក្រោមការគ្រប់គ្រងផ្ទាល់ ពីរដ្ឋបាលខេត្តបាត់ដំបង ឬពិត ជាបានធ្វើនូវវិស័យពាណិជ្ជកម្មក្នុងខេត្តមានការរីកចំរើន។ បច្ចុប្បន្នរារដ្ឋាភិបាលកម្ពុជា កំពុងធ្វើកំណែទម្រង់ស៊ីជំរៅគ្រប់ជ្រុងជ្រោយនោះ ក្នុងនាមថ្នាក់ដឹកនាំមន្ទីរជំនាញត្រូវតែធានារ៉ាប់ រង នូវភារកិច្ចស្នូលទាំងឡាយរបស់អង្គភាព គឺជាប្រការសំខាន់ដែលត្រូវយកចិត្តទុកដាក់ និង បំពេញតួនាទីភារកិច្ចឲ្យបានភ្ជាប់ខ្ជួនគ្រប់ពេលវេលា។ ហើយកំណែទម្រង់ទាំងនេះ ទាមទារ ឲ្យមានការផ្លាស់ប្តូរឥរិយាបថ ក្នុងការចាត់ចែងការងារ និងទំនាក់ទំនងការងារ ដោយផ្តោតទៅ លើការបំរើសេវាកម្មរដ្ឋបាល និងសេវាសាធារណៈជូនប្រជាពលរដ្ឋប្រកបដោយតម្លាភាព។
ឯកឧត្តម ប៉ាន សូរសក្តិ បានបញ្ជាក់ថា នៅក្នុងចក្ខុវិស័យពាណិជ្ជកម្ម ក្រសួងបានយក ចិត្តទុកដាក់ផ្តោតលើកកំពស់ផលិតកម្ម និងការធានាគុណភាពនៃផលិតផល ឲ្យស្របតាម ស្តង់ដារនៃទីផ្សារ ការការពារកម្មសិទ្ធិបញ្ជា ការទប់ស្កាត់ការក្លែងបន្លំ ការពង្រឹងយន្តការត្រួត ពិនិត្យគុណភាពទំនិញដើម្បីធានាឲ្យការនាំចេញ ។
ក្នុងស្មារតីរួមចំណែកកំណែទម្រង់ ដើម្បី អភិបាលកិច្ចល្អ និងការបំរើសេវាសាធារណៈ ក្រសួងពាណិជ្ជកម្មបានដាក់ចេញនូវ យុទ្ធសាស្ត្រសមាហរណកម្មពាណិជ្ជកម្មកម្ពុជាឆ្នាំ២០១៤-១៨ នៅក្នុងយុទ្ធសាស្ត្រនេះផ្តោតសំខាន់ លើការនាំចេញ ផលិតផលសក្តានុពល១០មុខ និងការអនុវត្តគោនយោបាយ ជម្រុញផលិត កម្មស្រូវ និងការនាំចេញអង្ករដែលមានផលប៉ះពាល់រយៈពេលវែងចំពោះការអភិវឌ្ឍន៍ថ្នាក់ ក្រោមជាតិ។
ក្រសួងបានពិនិត្យឃើញថា ខេត្តបាត់ដំបងមានផលិតផល សក្តានុពលជាច្រើន មុខដូចជាស្រូវអង្ករ ដំឡុងមី ពោត សណែ្តក ម្រេច ក្រូចពោធិសាត់ ម្នាស់ជាដើមនេះ សុំឲ្យ មន្ទីរពាណិជ្ជកម្មខេត្តបាត់ដំបង ប្រឹងប្រែងជម្រុញនិងអភិវឌ្ឍន៍ផលិតផលទាំងនេះ ឲ្យបាន ច្រើនផុសផុល ពិសេសសិក្សាស្រាវជ្រាវ ផលិតផលសក្តានុពលក្នុងខេត្តថែមទៀត ដោយ ប្រមូលផ្តុំ ចងក្រងជាសមាគមអាជីវកម្ម។
ជាចុងក្រោយឯកឧត្តមបានផ្តល់ អនុសាសន៍ល្អៗជា ច្រើនដល់លោកប្រធានមន្ទីរថ្មី ក្នុងគោលដៅជម្រុញការអនុវត្តឲ្យកាន់តែមានភាពល្អប្រសើរ ៕