កំពង់ឆ្នាំង ៖ អភិបាលខេត្តបានចាត់ការទាំងព្រលប់វេលាម៉ោងប្រហែល៥និង៣០នាទីល្ងាច ថ្ងៃទី០៩ ខែកុម្ភៈឆ្នាំ២០១៨ដោយឲ្យ ក្រុមចម្រុះរបស់ខេត្ត ដែលមានជំនាញនិងសមត្ថកិច្ច ខេត្តកំពង់ឆ្នាំង ឡោមព័ទ្ទស្ទាក់ចាប់គ្រឿងចក្រជាច្រើនប្រមាណជាជិត៣០គ្រឿង ដែលចូលទៅជីកដី និងឈូសឆាយដីព្រៃលិចទឹកក្នុងតំបន់០៣និងតំបន់០២មិនមានច្បាប់អនុញ្ញាតនិងបានកំពុងបន្តការស្ទាក់ចាប់ទាំងយប់់។
សូមរំលឹកថា៖ ករណីជីកកាយយកអាចម៍ដី ពីដែននេសាទជាដីព្រៃលិចទឹក (ដែលគេមានការសង្ស័យថា ជាដីតំបន់០៣) ថិតក្នុងបឹងសម្រែក កំពង់សុខ ស្ថិតក្នុងឃុំស្វាយជ្រុំ ស្រុករលាប្អៀរ ហើយបានយកអាចម៍ដីទាំងនោះមកចាក់បំពេញនៅលើដី លិចទឹកដែលមិនមានឧនុបយោគ (អត់ច្បាប់) ចំណុចភូមិទី ០៧ សង្កាត់ខ្សាម ក្រុងកំពង់ឆ្នាំង ជិតតំបន់អភិវឌ្ឍន៍ក្រុងរណបថ្មី របស់អាជ្ញាធរខេត្ត (ដែលគេមានការសង្ស័យថា ជាដីតំបន់០២)។
នៅទីនោះ ក្រុមឈ្មួញបានធ្វើការឈូសឆាយ រៀបចំជាដីពុះឡូត៍ លក់ចេញយកចំណេញកប់ក្ដោងដែលសកម្មភាពឈ្មួញចាក់ដីពុះឡូត៍លក់នេះគេសង្កេតឃើញកើតមានជិត៣ឆ្នាំមកហើយ ប៉ុន្តែគេមិនឃើញមានអន្តរាគមន៍ពីអាជ្ញាធរឬមន្ត្រីជំនាញឡើយ ដែលករណីនេះគេសង្ស័យថា មានការឃុបឃិតគ្នាជាប្រព័ន្ធ។
ទើបតែនៅថ្ងៃទី៩ ខែកុម្ភៈឆ្នាំ២០១៨នេះ ដោយមានប្រព័ន្ធផ្សព្វផ្សាយក្នុងស្រុកបានចុះផ្សាយអំពីសកម្មភាពឈូសឆាយដីតំបន់៣និងដីតំបន់២ដែលជាដីព្រៃលិចទឹកហើយព័ត៌មានខាងលើក៏បានបែកធ្លាយដល់ថ្នាក់លើទើបមានបញ្ជារឲ្យចាប់ទាំងយប់បែបនេះ?!។