ខេត្តកំពង់ចាម ៖ ថ្លែងនៅក្នុងពិធីសម្ពោធបើកការដ្ឋានសាងសង់ស្ពានឆ្លងទន្លេមេគង្គ នៅខេត្តកំពង់ចាម កាលពីព្រឹកថ្ងៃទី០៩ ខែកុម្ភៈ សម្តេច ហ៊ុន សែន ប្រធានបក្សកាន់អំណាច ( CPP ) បានផ្ញើសារនយោបាយបែបឌឺដងទៅកាន់លោក សម រង្ស៊ី ថា ពាក្យ«មានសែន អត់ស៊ី មានស៊ី អត់សែន» ដែលគេយកមកប្រើកាលពី១៥ឆ្នាំមុននោះសម្តេចនឹងបន្តលេង ដល់ថ្ងៃស្លាប់ រៀងៗខ្លួន ។ សម្តេចបញ្ជាក់ថា ដោយសារតែភាព ឆោតល្ងង់ របស់អ្នកនយោបាយខ្លះ ទើបមិន អាចដណ្តើមអំណាចពីសម្តេចបាន ។
សម្តេច ហ៊ុន សែន មានប្រសាសន៍ថា ព្រោះតែ គេមិនល្ងង់ដូចអ្ហែងហ្នឹងហើយបានគេកាន់ អំណាច រហូតទៅដល់ជិត៤០ឆ្នាំនោះ កុំទៅឆ្ងល់ពេក ។ ហើយបើគិតតាំងពីដំណាក់កាលនៃការតស៊ូ រំដោះប្រទេសជាតិ៤០ឆ្នាំជាងទៅហើយ។ អញ្ចឹងទេគួរតែព្រមយល់ហើយ ។
សម្តេចមានប្រសាសន៍ដូច្នេះថា កាលពី១៥ឆ្នាំមុន អ្នកឯងនិយាយថា មានស៊ី អត់សែន មានសែន អត់ស៊ី មានន័យថា បើមានគេអត់ខ្ញុំ មានខ្ញុំអត់គេ ហើយឥឡូវខ្ញុំធ្វើ ឲ្យដូចខ្ញុំធ្វើ អាហ្នឹងឲ្យដូច ធ្វើឲ្យដូចមួយជីវិត ទាល់តែងាប់រៀងៗខ្លួន មានឯងអត់អញ មានអញអត់ឯង ឥឡូវអញធ្វើឲ្យអត់ឯងរហូត ។
សម្ដេចបន្ដថា កាលពីប៉ុន្មានថ្ងៃមុនគេ ( លោក សម រង្ស៊ី ) បានដាក់កំណត់ជាមួយសម្ដេចថា អាយុ៦៥ ត្រូវឈប់ធ្វើ នយោបាយទាំងអស់គ្នា ប៉ុន្តែសម្ដេចបានឆ្លើយតបវិញថា “ហែងអ្នក ជាប់គុកសោះ មកបបួលអញធ្វើជានាយករដ្ឋមន្ដ្រី ឲ្យអញចុះពីតំណែងទៅជាប់គុកជាមួយហែង ជាប់គុកតែហែង ហែងជាប់គុកទៅ ”។ សម្តេចថាបើថា ឆ្កួតៗម្នាក់ឯង ទៅ សម្ដេចមិនចង់និយាយតជាមួយទៀតឡើយ ៕