ភ្នំពេញ៖ បញ្ហាប្រឈមខ្លាំងរបស់រាជធានីភ្នំពេញសព្វថ្ងៃនេះគឺបញ្ហាកកស្ទះចរាចរណ៍ហើយ ដើម្បីដោះស្រាយបញ្ហានេះអោយបានប្រសើរឡើង អាជ្ញាធររាជធានីភ្នំពេញ តែងតែ រកគ្រប់វិធីសាស្ត្រ ដើម្បីដោះស្រាយក្នុងនោះមានទាំងវិធានការរៀបចំចិញ្ចើមផ្លូវ និងវិធានការចំពោះរថយន្តធំមិនអោយចូលក្រុង។ ប៉ុន្តែទោះបីជាយ៉ាងណាក្តីបញ្ហានេះនូវតែដោះស្រាយមិនបានជោគជ័យនៅឡើយ ។
ដោយសារបញ្ហានេះ លោក ឃួង ស្រេង អភិបាលរាជធានីភ្នំពេញ បានកោះប្រជុំជាបន្ទាន់ ជាមួយអាជ្ញាធរខណ្ឌ និងកម្លាំងសមត្ថកិច្ច នាព្រឹកថ្ងៃសុក្រ ៩រោច ខែមាឃ ឆ្នាំរកានព្វស័ក ព.ស ២៥៦១ បានបញ្ជាក់ថា៖ ចាប់ពីពេលនេះតទៅ អាជ្ញាធរខណ្ឌនីមួយៗត្រូវបិទទាំងស្រុង មិនឲ្យរថយន្ដធន់ធំ ចូលក្រុងទៀត ពិសេស រថយន្ដធន់ធំតទ្រុង មិនតែប៉ុណ្ណោះ អាជ្ញាធរខណ្ឌ ត្រូវចុះបិទ យានដ្ឋានអាជីវកម្ម កែច្នៃតទ្រុងរថយន្ដនៅតាមបណ្ដា ខណ្ឌនីមួយភ្លាម ។
លោក ម៉េត មាសភក្ដី អ្នកនាំពាក្យសាលារាធានីភ្នំពេញ បានបញ្ជាក់ថា៖ កាលពីឆ្នាំមុន រដ្ឋបាលរាជធានីភ្នំពេញក៏មាន វិធានការក្នុងការហាមរថយន្តធំមិនអោយចូលក្រុងផងដែរ។ ប៉ុន្តែវិធានការនេះនៅតែទទួលបរាជ័យដដែលជាដដែល ហើយការបរាជ័យនោះ ត្រូវគេបានមើលឃើញថា ផ្តើមចេញកត្តាតែមួយគត់ នោះគឺបញ្ហាអាជ្ញាធរ និងកម្លាំងសមត្ថកិច្ចយកលុយពីរថយន្តធំៗទាំងអស់នេះ ជាថ្នូរនៃការអនុញ្ញាតអោយរថយន្តធំៗចូលក្រុងពេលថ្ងៃ ។ បើអាជ្ញាធរ កម្លាំងសមត្ថកិច្ចទាំងអស់បញ្ឈប់ការយកលុយពីរថយន្តធំៗទាំងអស់នេះជាថ្នូរនៃការអនុញ្ញាតិអោយរថយន្តធំៗចូលក្រុងពេលថ្ងៃទៀត នោះការងារនេះនឹងទទួលបានជោគជ័យជាក់ជា មិនខាន ។
សូមបញ្ជាក់ថា៖ កិច្ចប្រជុំហាមឃាតរថយន្ដធន់ធំចូលក្រុងនេះ ស្របពេលដែល សម្តេចតេជោ ហ៊ុន សែននាយករដ្ឋមន្ត្រីនៃកម្ពុជា បានមានប្រសាសន៍យ៉ាងម៉ឺងម៉ាត់ថា ចាប់ពីម៉ោង០០យប់ថ្ងៃទី៩កុម្ភៈនេះតទៅ គឺគ្មានវត្តមានឡានតទ្រុង លើដងផ្លូវទៀតឡើយ។ នៅតំបន់ណា ភូមិសាស្ត្រណា ចៅហ្វាយខេត្តនឹង ជាអ្នកទទួលខុសត្រូវ។ បើនរណាមកតវ៉ា ត្រូវបញ្ចូលព្រៃសទាំងអស់….!!! នរណាកាង ទោះឋានៈណាក៏ដោយ ក៏ធ្លាក់បុណ្យស័ក្តិទាំងអស់គ្នាដែរ ។
សម្តេចតេជោ បានប្រមានបែបនេះ នៅព្រឹកថ្ងៃសុក្រ ៩រោច ខែមាឃ ឆ្នាំរកា ព.ស២៥៦១ ត្រូវនឹងថ្ងៃទី៩ ខែកុម្ភៈ ឆ្នាំ២០១៨ ក្នុងឱកាសដែរសម្តេចតេជោហ៊ុន សែននាយក រដ្ឋមន្ត្រីនៃកម្ពុជា អញ្ជើញជាអធិបតីភាពបើកការដ្ឋានសាងសង់ស្ពានឆ្លងកាត់ទន្លេមេគង្គថ្មីមួយទៀតតភ្ជាប់ទឹកដីនៃខេត្តកំពង់ចាម ទៅកាន់ទឹកដីនៃខេត្តត្បូងឃ្មុំ ៕