រាជធានីភ្នំពេញ ៖ មន្ទីរសុខាភិបាលរាជធានីភ្នំពេញ បានចេញសេចក្តីជូនដំណឹងមួយនៅថ្ងៃព្រហស្បតិ៍នេះ ស្តីពីវត្តនៃការរាតត្បាតម្តងទៀត របស់ជំងឺគ្រុនឈាម នៅក្នុងឆ្នាំ២០១៨ ។ តាមមន្ត្រីជំនាញជំងឺគ្រុនឈាមបង្កឡើងដោយវីរុសដាំងដែលមានបួនប្រភេទ DENV1 DENV2 DENV3 និង DENV4 តាមរយៈមូសខ្លាញីខាំចំលងទៅមនុស្ស ។
យោងតាមសេចក្តីជូនដំណឹងដែលបង្ហោះ Facebook មន្ទីរសុខាភិបាលភ្នំពេញ បានបញ្ជាក់ថា តាមការអង្កេតតាមបែបអេពីដេមីសាស្ត្រសំគាល់ឃើញថា ស្ថានភាពជំងឺគ្រុនឈាមនឹងមានការរាតត្បាតខ្លាំងម្តងនៅរៀងរាល់ ៥ ទៅ ៦ឆ្នាំម្តង បានន័យថាការរាតត្បាតចុងក្រោយគឺឆ្នាំ ២០១២ ហេតុនេះឆ្នាំ២០១៨ គឺជាឆ្នាំដែលត្រូវដល់វដ្តនៃការរាតត្បាតធំម្តងទៀត។
ដូចនេះដើម្បីគ្រប់គ្រងហានិភ័យនៃការរាតត្បាតដោយជំងឺគ្រុនឈាមឆ្នាំ២០១៨ នេះ បានទាន់ពេលវេលា មន្ទីរសុខាភិបាលរាជធានីភ្នំពេញ បានចុះអប់រំផ្សព្វផ្សាយដល់ប្រជាពលរដ្ឋអំពីអនាម័យលំនៅដ្ឋាន ការកំចាត់ជំរកមូសខ្លា វិធានការការពារជំងឺគ្រុនឈាម ដាក់ថ្នាំអាបែតតាមពាង និងអាងស្តុកទឹក បាញ់ថ្នាំសំលាប់មូសនៅតាមតំបន់ប្រឈមមុខខ្ពស់នឹងជំងឺគ្រុនឈាម ៕