បាត់ដំបង៖កញ្ញា ស៊ិន ពៅចាន់រ៉ូហ្ស៊េតអតីតចៅសង្កាត់អូចារដែលគេដេញចេញក្រោយពីគណបក្សនាងត្រូវបានរំលាយនៅថ្ងៃទី៦កុម្ភៈ បានយល់ព្រមដកស្លាកដែលមានពាក្យ «ឧទ្ទាមជន» ចេញពីមុខហាងរបស់នាងទៅតាមសំណើររបស់អភិបាលក្រុងបាត់ដំបង។កាលពីថ្ងៃទី ៥ ខែកុម្ភៈលោក ផេង សិទ្ធី អភិបាលក្រុងបាត់ដំបងចេញបានលិខិតកោះអញ្ជើញមួយមានខ្លឹមសារថា៖ «សូមអញ្ជើញលោកស្រី ស៊ិន ពៅចាន់រ៉ូហ្ស៊េត ម្ចាស់អាហារដ្ឋានរ៉ូហ្ស៊េតនៅក្រុមទី ៤ ភូមិកម្មករ សង្កាត់ស្វាយប៉ោ ក្រុងបាត់ដំបងដើម្បីចូលរួមប្រជុំពិភាក្សាការងារមួយចំនួននៅថ្ងៃអង្គារ ទី ៦ ខែកុម្ភៈ ឆ្នាំ ២០១៨ នៅវេលាម៉ោង ១០:០០ នាទីព្រឹកនៅសាលាក្រុងបាត់ដំបង»។ ក្រោយពីការប្រជុំ កញ្ញា ស៊ិន ពៅចាន់រ៉ូហ្ស៊េត ម្ចាស់អាហារដ្ឋានរ៉ូហ្ស៊េត បានប្រាប់កាសែតថា លោកអភិបាលក្រុងបានស្នើឲ្យកញ្ញាដកយីហោចេញពីហាងលក់នំបញ្ចុកខ្មែរដែលបានសរសេរពាក្យថា «ហាង រ៉ូហ្ស៊េត រីករាយស្វាគមន៍ភ្ញៀវទាំងអស់លើកលែងតែឧទ្ទាមជន» របស់នាងចេញហើយនាងក៏បានយល់ព្រមតាមសំណើនេះ។
កញ្ញាបន្តថា លោកអភិបាលក្រុងបានលើកឡើងថាបច្ចុប្បន្នស្រុកខ្មែរមានសន្តិភាពហើយមិនគួរនាងសរសេរដាក់ពាក្យបែបនេះជាសាធារណៈនោះទេ ព្រោះបើដាក់ស្លាកបែបនេះគឺនឹងធ្វើឲ្យប៉ះពាល់ដល់ភ្ញៀវជាតិ និងអន្តរជាតិយល់ច្រឡំថា ស្រុកខ្មែរក៏មានជនឧទ្ទាមដែរ។ លោកអភិបាលក្រុងបានឲ្យនាងបញ្ចេញមតិជុំវិញការលំបាកលើអាជីវកម្មរបស់ខ្លួន ហើយកញ្ញាក៏សូមមិនឲ្យមានអ្នកមកយាយីការរកស៊ីរបស់នាងទៀត។
កញ្ញា រ៉ូហ្ស៊េត បញ្ជាក់ថា៖ «ខ្ញុំក៏បានប្រាប់ពីមូលហេតុនៃការដាក់ពាក្យនេះ ទៅកាន់លោកអភិបាលក្រុងដែរថាការពិតអាហារដ្ឋានរបស់ខ្ញុំមានស្លាកយីហោល្អត្រឹមត្រូវណាស់ ប៉ុន្ដែកាលពីប៉ុន្មានថ្ងៃមុនលោក ឈាង វុន បានមកចោទហាងរបស់ខ្ញុំថាជាកន្លែងប្រមូលផ្ដុំជនឧទ្ទាមដែលជាហេតុធ្វើឲ្យហាងខ្ញុំបានបាត់បង់ភ្ញៀវមួយចំនួនធំ។ ដូច្នេះខ្ញុំគ្មានជម្រើសអ្វីក្រៅពីប្រាប់គេពីការពិតទេ ព្រោះវាជាចំណូលប្រចាំថ្ងៃរបស់ខ្ញុំ ខ្ញុំមិនអាចអត់វាបានទេ»។
លោក សេក ចិត្ត្រា នាយករងរដ្ឋបាលក្រុងបាត់ដំបងបានឲ្យដឹងកាលពីម្សិលមិញថាសាលាក្រុងបានអញ្ជើញកញ្ញា ស៊ិន ពៅចាន់រ៉ូហ្ស៊េត មកជជែកគ្នាពីការដាក់ស្លាកយីហោអាហារដ្ឋាន «ហាង រ៉ូហ្ស៊េត រីករាយស្វាគមន៍ភ្ញៀវទាំងអស់លើកលែងតែឧទ្ទាមជន» ដោយលោកអភិបាលក្រុងបានប្រាប់ឲ្យកញ្ញាដកស្លាកយីហោនោះចេញ ហើយកញ្ញាក៏យល់ព្រមដកចេញតាមសំណើនេះដែរ។ លោកបន្តថា កញ្ញាមិនគួរសរសេរដាក់ស្លាកយីហោហាងបែបនេះទេ ព្រោះពេលគេមើលទៅហាក់ដូចជាមិនល្អមើលទេដោយសារប្រទេសកម្ពុជាកំពុងមានសុខសន្ដិភាព និងការរីកចម្រើនគឺនៅក្នុងប្រទេសកម្ពុជាមិនមានឧទ្ទាមជននោះទេ។
សូមបញ្ជាក់ថា៖បន្ទាប់ពីគណបក្សប្រឆាំងត្រូវបានរំលាយកាលពីថ្ងៃទី ១៦ ខែវិច្ឆិកា ឆ្នាំ ២០១៧ កញ្ញា រ៉ូហ្ស៊េត អតីតចៅសង្កាត់អូរចាក៏ដូចមេឃុំ ចៅសង្កាត់ សមាជិកក្រុមប្រឹក្សាឃុំ សង្កាត់ រួមទាំងសមាជិកក្រុមប្រឹក្សាខេត្ត ក្រុងស្រុកខណ្ឌសរុបជិត ៦០០០ រូបបានបាត់បង់តួនាទីមុខតំណែង។ កញ្ញា រ៉ូហ្ស៊េត ក៏បានមកបើកភោជនីយដ្ឋានតូចមួយលក់ម្ហូបអាហារនៅក្រុងបាត់ដំបងដើម្បីរកកម្រៃចិញ្ចឹមម្តាយចាស់ជរារបស់នាង និងជួយដោះស្រាយការងារមនុស្សធម៌ដែលនាងធ្លាប់តែធ្វើកន្លងមក៕