រាជធានីភ្នំពេញ ៖ ថ្លែងនៅក្នុងពិធីជួបសំណេះសំណាលជាមួយកម្មករ កម្មការិនីសរុបប្រមាណ១៥,១០៩នាក់ មកពីរោងចក្រ សហគ្រាសចំនួន៧ នៅតំបន់កប់ស្រូវ ខណ្ឌពោធិ៍សែនជ័យ រាជធានីភ្នំពេញ កាលពីព្រឹកមិញសម្តេចនាយករដ្ឋមន្ត្រី ហ៊ុន សែន បានក្រើនរម្លឹកដល់អ្នក
ពាក់ព័ន្ធទាំងអស់យកចិត្តទុកដាក់អនុវត្តផែនការទាំង៨ចំណុចដែលសម្តេច បានដាក់ចេញកាលពីពេលថ្មីៗនេះ ។
ផែនការទាំង៨ចំណុចនោះរួមមាន៖
១៖ យកចិត្តទុកដាក់លើការផ្តល់ប្រាក់ឈ្នួលអប្បបរមា ១៧០ដុល្លារ
២៖ យកចិត្តទុកដាក់លើការពិនិត្យ និងព្យាបាលជំងឺដោយឥតបង់ថ្លៃសម្រាប់កម្មករ កម្មការិនីទាំងក្រុង និងក្រៅប្រព័ន្ធ
៣៖ យកចិត្តទុកដាក់លើការឧបត្ថម្ភប្រាក់ដល់កម្មការិនីឆ្លងទន្លេ, ការជិះរថយន្តក្រុងដោយមិនបង់ប្រាក់, កម្មការិនីពេលសម្រាកសម្រាលកូនរយៈពេល ៣ខែជាមួយប្រាក់ឈ្នួល ១២០ភាគរយ។
៤៖ យកចិត្តទុកដាក់លើកម្មវិធីផ្តល់សាច់ប្រាក់ដល់កម្មការិនីពេលសម្រាលកូន
៥៖ តាមដានលើរបបសន្តិសុខសង្គមសម្រាប់ការថែទាំសុខភាពរបស់កម្មករ កម្មការិនី
៦៖ តាមដានការដំឡើងថ្លៃឈ្នួលផ្ទះ
៧៖ រៀបចំដាក់ឲ្យអ្នកអនុវត្តន៍នូវសន្តិសុខប្រាក់សោធននិវត្តន៍នៅឆ្នាំ២០១៩
៨៖ បន្តយកចិត្តទុកដាក់លើសុខទុក្ខលើកម្មករ កម្មការិនី ដែលកំពុងធ្វើការងារនៅក្នុងប្រទេសថៃ
សម្តេច ហ៊ុន សែន ក៏បានអំពាវនាវកម្មករ កម្មការិនី បោះឆ្នោតគាំទ្រគណបក្សប្រជាជនកម្ពុជា ហើយសម្តេចនៅបន្តថែទាំកម្មករ កម្មការិនី និងប្រជាពលរដ្ឋខ្មែរយ៉ាងតិច ១០ឆ្នាំបន្តទៀត។ សម្តេចអះអាងថា ដរាបណានៅមានវត្តមានរបស់សម្តេច សម្តេចមិនអនុញ្ញាតឲ្យមានការបំផ្លាញប្រទេសនេះឡើយ ហើយសម្តេចមិនហាមឃាត់លោក សម រង្ស៊ី ក្នុងការចូលប្រទេសនោះទេ ឲ្យតែហ៊ានប្រឈមមុខជាមួយច្បាប់របស់កម្ពុជា ៕
