រាជធានីភ្នំពេញ ៖ សមត្ថកិច្ចខណ្ឌរដ្ឋបាលព្រៃឈើភ្នំពេញ សហការជាមួយ អាជ្ញាធរខណ្ឌទួលគោក ដោយមានការសម្របសម្រួលពីស្ថាប័នតុលាការ បានធ្វើការបង្ក្រាប បទល្មើសព្រៃឈើ ដែលឈ្មួញទុច្ចរិត លួចដឹកតាមរថយន្តក្រុងយកមកលាក់ទុកនៅក្នុងចំណតរថយន្តមួយកន្លែង នៃមូលដ្ឋានខណ្ឌទួលគោក ជាលទ្ធផលដកហូតឈើប្រណីតខុសច្បាប់ ប្រមាណជិត២ម៉ែត្រគូប និងរថយន្តក្រុងចំនួន ១គ្រឿង។
សមត្ថកិច្ចរដ្ឋបាលព្រៃឈើ ប្រាប់ឲ្យដឹងថា ប្រតិបត្តិការណ៍បង្ក្រាបបទល្មើសព្រៃឈើខុសច្បាប់នេះ ធ្វើឡើង កាលពីវេលាម៉ោង ១០ និង០០នាទី ព្រឹកថ្ងៃទី៥ ខែកុម្ភះ ឆ្នាំ២០១៨ ដឹកនាំដោយលោក អ៊ុន វណ្ណារិទ្ធ នាយរងខណ្ឌរដ្ឋបាលព្រៃឈើភ្នំពេញ តំណាងលោក គាំ សីហា នាយខណ្ឌរដ្ឋបាលព្រៃឈើភ្នំពេញ សហការជាមួយ អាជ្ញាធរខណ្ឌទួលគោក ដោយមានការសម្របសម្រួលពីលោក ហ៊ឹង ប៊ុនថន ព្រះរាជអាជ្ញារង អមសាលាដំបូង រាជធានីភ្នំពេញ បានធ្វើការបង្ក្រាបបទល្មើសព្រៃឈើជាក់ស្តែង នៅចំណុចចំណតរថយន្តមួយកន្លែង តាមបណ្តោយផ្លូវលេខ៣៤៧ ភូមិ៣ ក្រុមទី៩ សង្កាត់បឹងកក់ទី១ ខណ្ឌទួលគោក រាជធានីភ្នំពេញ ។ មន្ត្រីរដ្ឋបាលព្រៃឈើភ្នំពេញ ប្រាប់ឲ្យដឹងថា ប្រតិបត្តិការណ៍នេះ សមត្ថកិច្ចចម្រុះ ដកហូត ឈើប្រណីត ប្រភេទ សុក្រមចំនួន៣៥ដុំ សរុបទម្ងន់ប្រហែលជិត២ម៉ែត្រគូប ។
មន្ត្រីរដ្ឋបាលព្រៃឈើភ្នំពេញ ប្រាប់បន្តទៀតឲ្យដឹងថា ការបង្ក្រាបឈើប្រណីតប្រភេទ សុក្រម ទាំងអស់នេះ គឺបន្ទាប់ពីទទួលបានសេចក្តីរាយការណ៍ពីប្រជាពលរដ្ឋរស់នៅតំបន់នោះ អំពីបទល្មើសព្រៃឈើ ទើបកម្លាំង សមត្ថកិច្ចខណ្ឌរដ្ឋបាលព្រៃឈើភ្នំពេញ សហការជាមួយ អាជ្ញាធរខណ្ឌទួលគោក ដោយមានការសម្របសម្រួលពីស្ថាប័នតុលាការផងនោះ ចុះធ្វើការបង្ក្រាបជាក់ស្តែងតែម្តង ។
សមត្ថកិច្ចប្រាប់បញ្ជាក់ថា ឈើប្រណីតប្រភេទ សុក្រម នេះ ត្រូវបានឈ្មួញដឹកចេញខេត្តព្រះវិហារ ដោយដឹកតាមរថយន្ត ក្រុង របស់ក្រុមហ៊ុន ស្ទឹងសែន នីកា ខូ អិល ធីឌី ពាក់ស្លាកលេខ ភ្នំពេញ 3D.3377 លួចយកមកលាក់ទុកនៅក្នុង ចំណុចចំណតរថយន្តមួយកន្លែង តាមបណ្តោយផ្លូវលេខ៣៤៧ ភូមិ៣ ក្រុមទី៩ សង្កាត់បឹងកក់ទី១ ខណ្ឌទួលគោក រាជធានីភ្នំពេញនឹងបន្តដឹកចេញដើម្បីយកទៅចែកចាយកន្លែងផ្សេងបន្តទៀត ។
សមត្ថកិច្ចប្រាប់បន្តថា ឈើប្រណីតទាំងអស់ និងរថយន្តក្រុង១គ្រឿង ត្រូវបានបញ្ជូនទៅកាន់ផ្នែករដ្ឋបាលព្រៃឈើ ព្រែកព្នៅ ដែលមានទីតាំងនៅតាមបណ្តោយផ្លូវលេខ៥ ភូមិឡកំបោរ សង្កាត់ស្វាយប៉ាក ខណ្ឌឬស្សីកែវ ដើម្បីបន្តនីតិវិធីតាមច្បាប់ព្រៃឈើ៕
