ខេត្តមណ្ឌលគិរី ៖ សម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបានថកោលទោសចំពោះសកម្មភាពបាញ់ប្រហារសម្លាប់មន្ត្រីអាវុធហត្ថនិងមន្ត្រីបរិស្ថានចំនួន៣នាក់និងបានសន្យាវែកមុខឲ្យឃើញចំពោះអ្នកបង្ក ។ នេះបើតាមសារលិខិតរំលែកទុក្ខចុះថ្ងៃទី៣១មករាផ្ញើជូនគ្រួសារសព ។
ដោយឡែក នៅ ព្រឹកថ្ងៃ៣១ ខែមករា ឆ្នាំ២០១៨ ក្រុមការងារបង្ក្រាបបទល្មើសព្រៃឈើដឹកនាំដោយលោកផៃប៊ុនឈឿនរដ្ឋលេខាថិការក្រសួងបរិស្ថានអមដំណើរដោយឧត្តមសេនីយ៍ហុងវិណុលរងលោកនាយឧត្តមសេនីយ៍សៅខានិងលោកឧត្តមសេនីយ៍ហ៊ូសាគុណមេនគរបាលព្រុំដែនគោកបាន ចុះដល់ទីតាំងកន្លែងកើតហេតុនៅចំណុចអូរលែ័រ ព្រំដែន កម្ពុជា វៀតណាម ស្ថិតក្នុងភូមិពូហ្សាម ឃុំសែនមនោរម្យ ស្រុកអូររាំង ខេត្តមណ្ឌលគិរីដើម្បីពិនិត្យ ដើម្បីធ្វើការស្រាវជ្រាវ ករណីយ៍ មន្ត្រីកងរាជអាវុធហត្ថ មន្ត្រីបរិស្ថាន និងមន្ត្រីអង្គការចំនួន៣នាក់ត្រូវពួកកម្លាំងប្រដាប់អាវុធការពារឧក្រឹដ្ឋជនព្រៃឈើបាញ់សម្លាប់កាលពីចន្លោះម៉ោង៤ ទៅម៉ោង៥ល្ងាចថ្ងៃអង្គារ ១៤កើត ខែមាឃ ឆ្នាំរកា ព.ស.២៥៦១ ត្រូវនឹងថ្ងៃទី ៣០ ខែមករា ឆ្នាំ២០១៨ ។
ក្រុម ការងារគណកម្មការចម្រុះខាងលើក្រោមការបញ្ជាផ្ទាល់របស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួង មហាផ្ទៃ, នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ ជាប្រធានគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ និងជាមេបញ្ជាការកងរាជអាវុធហត្ថលើផ្ទៃ ប្រទេស និងនាយឧត្តមសេនីយ៍ នេត សាវឿន អគ្គស្នងការនគរបាលជាតិ កម្លាំង បរិស្ថាន និងយោធាផងដែរ ។
ជនរងគ្រោះក្នុងហេតុការណ៍នេះមានចំនួន៣នាក់មានឈ្មោះ ១.តឿន សុខណៃ ជាមន្ត្រីឧទ្យានុរក្សដែនជម្រកសត្វព្រៃកែវសីមា ប្រចាំនៅស្នាក់ការអូររាំងត្រូវគ្រាប់កាំភ្លើងចំនួន៣ គ្រាប់ ស្លាប់នៅនឹងកន្លែង។, ២.ឈ្មោះសេក វឌ្ឍនា ជាមន្ត្រីកងរាជអាវុធហត្ថលើផ្ទៃប្រទេសដែលរួមសហការត្រូវមួយគ្រាប់ចំពោះធ្លាយពោះវៀនស្លាប់ពេលបញ្ជូនមក ដល់មន្ទីរពេទ្យ និង៣.ឈ្មោះធួន ខ្នារ ជាមន្ត្រីអង្គការ WCS (Worldlife Conservation Society) ផ្នែកផែនទី (GIS) ។
ទោះជាយ៉ាងណាគេនៅមិនទាន់ដឹងពីមូលហេតុពិត ប្រាកដដែលបណ្ដាលឲ្យមានការបាញ់ ប្រហារយ៉ាងខ្លាំងដោយផ្ដើមចេញពីសមត្ថកិច្ចខាងណាឲ្យពិតប្រាកដនោះទេ ដោយគ្រាន់តែជំហ៊ានដំបូងសមត្ថកិច្ចជំនាញដាក់ការសង្ស័យជាជំហានដំបូងថាកើតឡើងពាក់ព័ន្ធទៅនឹងបទល្មើសព្រៃឈើនោះ ។ទោះជាយ៉ាងណាគ្មានរឿងអ្វីលាក់បាំងទេបើគេចង់រកព្រោះមានអ្នកភូមិរួមដំណើរជាមួយម្នាក់បានរត់គេចខ្លួនរួចពីការបាញ់ប្រហារនោះ។
ក្នុងរឿងនេះនាយកដែនជម្រកសត្វព្រៃសីមាលោក ឌិន ប៊ុនធឿន បានឲ្យដឹងថា៖ រឿងហេតុដំបូង ដែលបានកើតឡើងនោះគឺមានជនរងគ្រោះសរុប៤នាក់ទាំងមន្ដ្រីកងរាជអាវុធហត្ថទាំងមន្ដ្រីឧទ្យានុរក្សរបស់លោកទាំងបុគ្គលិក អង្គការ WCS និងអ្នកភូមិម្នាក់ទៀតជិះម៉ូតូ ២គ្រឿងចូលទៅល្បាតព្រៃឈើ។ ពេលនោះពួកគេបានពើបជាមួយជនជាតិវៀតណាមមួយក្រុមប្រដាប់ដោយរណារយន្ដ កាំបិត និងពូថៅកំពុងប្រព្រឹត្តបទល្មើសព្រៃឈើក្នុងតំបន់ខាងលើ ។
ពេលឃើញបទល្មើសបែបនេះពួកគេ ទាំង៤នាក់ក៏បានរាយការណ៍មកលោក ដែលជានាយកដែនជម្រកសត្វព្រៃសីមាតែលោកបានប្រាប់ទៅវិញថា គ្នាតិចដូច្នេះ ឲ្យត្រឡប់មកវិញសិនដើម្បីយកកម្លាំងទៅថែមឈានទៅដល់ការបង្ក្រាប។ នៅពេល ដែលជនរងគ្រោះទាំង៤នាក់បើកម៉ូតូចេញមកវិញមិនទាន់ដល់ភូមិផងក៏រងការបាញ់ប្រហារជាច្រើនគ្រាប់បណ្ដាលឲ្យស្លាប់៣នាក់ ហើយម្នាក់ទៀតបានរត់គេចខ្លួនចូលទៅក្នុងភូមិ ។តែលោក ឌិន ប៊ុនធឿន មិនបានបញ្ជាក់ និងមិនហ៊ានអធិប្បាយថា អ្នកបាញ់ប្រហារនោះជានរណាឡើយបើទោះបីព័ត៌មានខ្លះបានឲ្យដឹងថា ជានគរ បាលការពារព្រំដែននិងយោធាការពារព្រំដែននៅតំបន់នោះក៏ដោយ ។
ចំណែកមន្ដ្រីជាន់ខ្ពស់ម្នាក់នៅខេត្តមណ្ឌលគិរីដែលសុំមិនបញ្ចេញឈ្មោះបាន លួចបង្ហើបឲ្យដឹងថា មុនពេលកើតហេតុមន្ដ្រី កងរាជអាវុធហត្ថមន្ដ្រីបរិស្ថាននិងបុគ្គលិកអង្គការ WCS បានចូលទៅល្បាតក្នុងព្រៃ ហើយក៏ឃើញបទល្មើសព្រៃឈើពេលនោះនាយនគរបាលប៉ុស្ដិ៍អូររលែចំណុះឲ្យ វរនគរបាលការពារព្រំដែនគោកនៃស្នងការ ដ្ឋាននគរបាលខេត្តមណ្ឌលគិរីលេខ៦២១ បានចេញមកជួបក្រុមមន្ដ្រីទាំងនេះអាច សង្ស័យថា មកចរចានិងនិយាយគ្នាពាក់ ព័ន្ធការប្រព្រឹត្តបទល្មើសនៅទីនោះតែមិនត្រូវគ្នាហើយបានដកហូតវត្ថុតាងជារណាត្រង់ស៊ីន័រ ។
ពតិមាននេះស៊ីគ្នានិង របាយការណ៍របស់ស្នងការដ្ឋាននគរបាលខេត្តមណ្ឌលគិរីដាក់ជូនទៅនាយឧត្តមសេនីយ៍ នេត សារឿន អគ្គស្នងការនគរ បាលជាតិបានវាយតម្លៃថា ករណីផ្ទុះអាវុធនេះបង្ក ឡើងដោយលោក ផល ពេញ បូករួមទាំង ឈ្មោះ កើត វេហា និងឈ្មោះ ងួរ ជាមន្ដ្រីយោធាការពារព្រំដែននៅតំបន់នោះ។លោកឧត្តមសេនីយ៍ត្រី សូ សុវណ្ណ ស្នងការរងនគរបាល ទទួលផែនព្រហ្មទណ្ឌខេត្តមណ្ឌលគិរីវិញ បានបញ្ជាក់ថា៖ ករណីនេះជាអំពើឃាតកម្ម គិតទុកជាមុន។
បើទោះជាអំពើឃាតកម្មបាញ់ប្រហារដ៏សាហាវយង់ឃ្នងពីសំណាក់យោធា និង នគរបាលការពារព្រំដែន ក្នុងនោះមានទាំងឈ្មោះយ៉ាងពិតប្រាកដយ៉ាងណាក៏ដោយ ក៏នៅថ្ងៃទី៣១ ខែមករា ឆ្នាំ២០១៨ សមត្ថកិច្ច អាជ្ញាធរជំនាញជាមួយនឹងគណៈ កម្មការជាតិបង្ក្រាបបទល្មើសធនធានធម្ម ជាតិមិនទាន់បង្ហើបឲ្យដឹងពីលទ្ធផលនៃ ការស៊ើបស្រាវជ្រាវតម្រុយពិរុទ្ធភាពនៃជនដៃដល់នៅឡើយទេ។
ករណីនេះត្រូវបាន ប្រភពគួរឲ្យទុកចិត្ត ហើយស្រដៀងគ្នានឹងមន្ត្រីជាន់ខ្ពស់ក្នុងខេត្តមណ្ឌលគិរីបានលើកឡើងថា មុនពេល កើតហេតុបាញ់ប្រហារ គេបានឃើញវត្តមានលោកមេបញ្ជាការវរៈការពារព្រំដែនគោកលេខ៦២១ មានវត្ត មាននៅទីនោះនិយាយជាមួយមន្ត្រីកង រាជអាវុធហត្ថ មន្ត្រីបរិស្ថាន មន្ត្រីអង្គការ ក្រៅរដ្ឋាភិបាល និងប្រជាពលរដ្ឋម្នាក់ទៀត។ គេពុំដឹងថា ការពិភាក្សាឬចរចាគ្នាជុំវិញរួមគំនិតណាមួយដើម្បីបិទបាំងបទល្មើសព្រៃឈើឬយ៉ាងណានោះទេ។
ដូច្នេះអាចមិនត្រូវរ៉ូវគ្នាទើបជាការបាញ់សម្លាប់ដល់ជន រងគ្រោះទាំង៣នាក់ដើម្បីបញ្ចៀសព័ត៌មានទាំងនេះបែកការណ៍អំពីសកម្មភាពអនុញ្ញាតឲ្យជនជាតិវៀតណាមចូលមកកាប់ឈើ ក្នុងទឹកដីខ្មែរដូចដែលបានបង្ក្រាបកន្លងទៅនៅតំបន់អូរហ៊ុច ។គួររំលឹកថា មេនគរបាលវរៈការពារព្រំដែនគោកលេខ៦២១លោក ឡេង សោ ភណ្ឌ កន្លងទៅបានជាប់ពាក់ព័ន្ធទៅនឹងបទ ល្មើសអនុញ្ញាតឲ្យជនជាតិវៀតណាមចូលមកកាប់ផ្តួលរំលំឈើក្នុងតំបន់អូរហ៊ុចដើម្បី ដឹកជញ្ជូនឆ្លងទៅប្រទេសវៀតណាម។
ក្នុង នោះលោក ឡេង សោភណ្ឌ ក៏បានជួល រថយន្តពីវៀតណាមយ៉ាងតិច៣គ្រឿង ប្រភេទកែច្នៃ និងរថយន្តប៉ាកុងសម្រាប់ជាមធ្យោបាយដឹកជញ្ជូនឈើហុបជាមួយ ឈ្មួញវៀតណាមទាំងនោះយ៉ាងគឃ្លើន។ មិនតែប៉ុណ្ណោះលោក ឡេង សោភណ្ឌ ថែម ទាំងយកលុយពីថៅកែវៀតណាមដើម្បីរត់ការទៅកាន់សមត្ថកិច្ចជាច្រើនស្ថាប័នក្នុងការកាប់បំផ្លាញព្រៃឈើដឹកទៅប្រទេស វៀតណាមពីតំបន់អូរហ៊ុច ។
លោក ឡេង សោភណ្ឌ ត្រូវបានសមត្ថកិច្ចកសាងសំណុំរឿងបញ្ជូនទៅសាលា ដំបូងខេត្តមណ្ឌលគិរី ក្រោយមកប្តូរសមត្ថកិច្ចតុលាការពីសាលាដំបូងខេត្តមណ្ឌលគិរីមកសាលាដំបូងរាជធានីភ្នំពេញ។ ប៉ុន្តែ ដោយអំណាចទឹកប្រាក់បានធ្វើឲ្យលោក ឡេង សោ ភណ្ឌ រួចខ្លួន ហើយមានមុខសាជាថ្មីទៅ ចរចាជនរងគ្រោះមុនពេលត្រូវបានបាញ់សម្លាប់ដោយយោធានិងនគរបាលវរៈការពារព្រំដែនដែលស្ថិតក្រោមការគ្រប់គ្រង របស់ខ្លួន ។
ចំណុចនេះការស៊ើបអង្កេតរបស់សមត្ថកិច្ចអាចមានតម្រុយយ៉ាងច្បាស់ប្រសិនបើហៅប្រជាពលរដ្ឋម្នាក់ដែលបានគេចខ្លួនពីគ្រាប់កាំភ្លើងរត់ចូលក្នុងភូមិនិងរួចពីសេចក្តីស្លាប់ និងកោះហៅលោក ឡេង សោភណ្ឌ ឬក៏ចាប់បុគ្គលរូបនេះ ការស៊ើបអង្កេតរបស់ សមត្ថកិច្ចវាហាក់បង្ហាញឲ្យឃើញពិរុទ្ធ ភាពក្រុមជនដៃដល់បានយ៉ាងឆាប់រហ័ស ដើម្បីចាប់ខ្លួនយកមកផ្តន្ទាទោសតាមផ្លូវ ច្បាប់ ៕
