ខេត្តមណ្ឌលគិរី ៖ កាលពីព្រលប់ថ្ងៃទី៣០មករាឆ្នាំ២០១៨មានករណីផ្ទុះអាវុធមួយប្រាវរវាងមន្ត្រីយោធា និងមន្ត្រីបរិស្ថាននៅចំណុចអូរហ៊ុច ជាប់ព្រំដែនកម្ពុជា-វៀតណាម ស្ថិតក្នុងនគរបាលប៉ុស្តិអូររាំងស្រុកអូររាំង ខេត្តមណ្ឌលគីរី។ករណីផ្ទុះអាវុធ មានសេចក្តីរាយការណ៍ថា៖បណ្តាលឲ្យមន្ត្រីកងរាជអាវុធហត្ថម្នាក់ និងមន្ត្រីបរិស្ថានម្នាក់ទៀតបានស្លាប់។
ដោយឡែកប្រជាពលរដ្ឋដែលជាអ្នកបកប្រែ និងជាប្រជាពលរដ្ឋក្នុងសហគមន៍រងរបួសធ្ងន់ ហើយត្រូវបញ្ជូនមកកាន់មន្ទីរពេទ្យបង្អែកខេត្ត ។គេពុំទាន់ដឹងពីមូលហេតុនៃការផ្ទុះអាវុធបណ្តាលឲ្យមនុស្ស២នាក់បានស្លាប់ និងម្នាក់ទៀតរងរបួសនោះទេ ។
មានសេចក្តីរាយការណ៍ផ្សេងៗគ្នាថា៖មុនពេលកើតហេតុប្រមាណ៣ម៉ោងមន្ត្រីបរិស្ថានដែលបានស្លាប់នោះ បានទូរស័ព្ទមកកាន់ប្រធានប៉ុស្តិ៍អូររាំងផ្នែកបរិស្ថាន ប៉ុន្តែមិនបានលើកទូរស័ព្ទ ក្រោយមកក៏មានហេតុការណ៍ផ្ទុះអាវុធនេះកើតឡើង ដូច្នេះគេពុំដឹងថា ការផ្ទុះអាវុធនេះផ្តើមឡើងដោយបញ្ហាអ្វីនោះឡើយ។លោកស្វាយ សំអាង អភិបាលនៃគណៈអភិបាលខេត្តមណ្ឌលគិរី និងលោកអ៊ុក សំណាង ស្នងការនគរបាលខេត្តបានទទួលស្គាល់ថា ពិតជាមានការផ្ទុះអាវុធមែន ប៉ុន្តែលោកមិនទាន់បញ្ជាក់ពីមូលហេតុនៅឡើយ។
ព័ត៌មានចុងក្រោយឲ្យដឹងថា៖ ជនរងគ្រោះដែលជាប្រជាពលរដ្ឋក្នុងសហគមន៍ រងរបួសដោយគ្រាប់កាំភ្លើងធ្លាយចេញពោះវៀន និងបាក់ដៃ ក៏បានដាច់ខ្យល់ស្លាប់ ពេលបញ្ជូនមកដល់មន្ទីរពេទ្យបង្អែកមុននេះបន្តិច ។ដូច្នេះជនរងគ្រោះក្នុងហេតុការណ៍នេះ កើនដល់ចំនួន៣នាក់ ។
ជនរងគ្រោះដែលស្លាប់មានឈ្មោះ ១.តឿន សុខណៃ ជាមន្ត្រីឧទ្យានុរក្សដែនជម្រកសត្វព្រៃកែវសីមា ប្រចាំនៅស្នាក់ការអូររាំង, ២.ឈ្មោះសេក វឌ្ឍនា ជាមន្ត្រីកងរាជអាវុធហត្ថលើផ្ទៃប្រទេសដែលរួមសហការ និង៣.ឈ្មោះធួន ខ្នារ ជាមន្ត្រីអង្គការ WCS ផ្នែកផែនទី (GIS)។នេះបើតាមការបញ្ជាក់ឲ្យដឹងពីមន្ត្រីបរិស្ថាននៅកន្លែងមន្ទីរពេទ្យបង្អែកខេត្តមណ្ឌលគិរីនោះផងដែរ.។
អ្នកនាំពាក្យកងរាជអាវុធហត្ថលើផ្ទៃប្រទេសគឺឧត្តមសេនីយ អេង ហ៊ីបានឲ្យកាសែតដឹងថា៖លោកនាយឧត្តមសេនីយ៍សៅ សុខា មេបញ្ជាការអាវុធហត្ថលើផ្ទៃប្រទេស និងជាប្រធានគណៈកម្មាធិការទប់ស្កាត់ និងបង្ក្រាបបទល្មើសព្រៃឈើថ្នាក់ជាតិ បានចេញបញ្ជាជាបន្ទាន់ឲ្យកម្លាំងសមត្ថកិច្ច នៃគណៈកម្មាធិការទប់ស្កាត់ និងបង្ក្រាបបទល្មើសព្រៃឈើថ្នាក់ជាតិ ចុះពិនិត្យករណីផ្ទុះអាវុធសម្លាប់មនុស្ស៣នាក់ នៅចំណុចជិតព្រំដែនកម្ពុជា-វៀតណាម ក្នុងស្រុកអូររាំង ខេត្តមណ្ឌលគីរី។
