រាជធានីភ្នំពេញ ៖ ក្រុមហ៊ុនអាកាសចរណ៍ចំនួន១៣ថ្មី ផ្សេងទៀតនឹងចាប់ផ្តើមដំណើរការនៅកម្ពុជាក្នុងឆ្នាំ២០១៨នេះ ដោយក្នុងនោះក្រុមហ៊ុនក្នុងស្រុកមានចំនួន៣ គឺក្រុមហ៊ុនអាកាសចរណ៍កម្ពុជា, ក្រុមហ៊ុនអាកាសចរណ៍អន្តរជាតិ ខេស៊ី និងក្រុមហ៊ុនអាកាសចរណ៍ព្រីន រួមនឹងក្រុមហ៊ុនក្រៅស្រុកចំនួន១០ ផ្សេងទៀតដែរ។ នេះបើតាមការឲ្យដឹងពីលោក កែវ ស៊ីវ៉ន អគ្គនាយកអាកាសចរណ៍ស៊ីវិលដែលដកស្រង់សម្តីចេញផ្សាយដោយសារព័ត៌មានក្នុងស្រុក។
លោក កែវ ស៊ីវ៉ន បានបញ្ជាក់ថា រហូតមកដល់បច្ចុប្បន្ននេះមានក្រុមហ៊ុនអាកាសចរណ៍ក្នុងស្រុកចំនួន១០ និងក្រុមហ៊ុនអាកាសចរណ៍បរទេសហោះហើរមកកម្ពុជាចំនួន៤០ក្រុមហ៊ុន។ លោកបន្ថែមថា តាមការឈានជើងចូលក្នុងវិស័យអាកាសចរណ៍កម្ពុជា ក្រុមហ៊ុនហោះហើរក្នុងស្រុកនឹងកើនឡើងដល់១៣ ក្រុមហ៊ុន រីឯក្រុមហ៊ុនក្រៅស្រុក កើនឡើងដល់៥០ក្រុមហ៊ុន។
ជាមួយគ្នានេះរដ្ឋលេខាធិការដ្ឋានអាកាសចរណ៍ស៊ីវិលកម្ពុជា បានរកចំណូលចូលរដ្ឋបានប្រមាណ៣៦លានដុល្លារសហរដ្ឋអាមេរិកក្នុងឆ្នាំ២០១៧ កើនឡើងប្រមាណ១០ភាគរយ ធៀបនឹងឆ្នាំ២០១៦៕
