រាជធានីភ្នំពេញ ៖ តាមការឲ្យដឹងពីមន្ត្រីយោធានៃកងពលតូចលេខ៧០ថា ក្រសួងការពារជាតិចិនបានសម្រេចផ្តល់រថពាសដែកដល់ក្រសួងការពារជាតិកម្ពុជារាប់សិបគ្រឿង និងគ្រឿងចក្រជាច្រើននៅអំឡុងខែមីនាខាងមុខនេះ ស្របពេលភាគីទាំងពីរធ្វើសមយុទ្ធរួមគ្នាផងដែរនោះ។
មន្ត្រីដដែលបន្តថា កងពលតូចលេខ៧០នឹងទទួលបានរថពាសដែករាប់សិបគ្រឿង និងគ្រឿងចក្រជាច្រើនគ្រឿងទៀត តាមរយៈជំនួយឥតសំណងរបស់មហាមិត្តចិនទាំងនេះបញ្ជាក់នូវទំនាក់ទំនងដ៏ល្អរវាងកងទ័ពនៃប្រទេសទាំងពីរឲ្យកាន់តែខ្លាំងក្លាបន្ថែមទៀតនោះ។ ប្រភពដដែលបញ្ជាក់ថា ជំនួយឥតសំណងនេះមាន រថពាសដែករាប់សិបគ្រឿង គ្រឿងចក្រកម្ទេចគ្រាប់មីន និងគ្រឿងចក្រផ្សេងៗទៀត។
សូមបញ្ជាក់ថា យោធាកម្ពុជា និងចិននឹងធ្វើសមយុទ្ធរួមគ្នាទ្រង់ទ្រាយធំក្នុងអំឡុងខែមីនា ឆ្នាំ២០១៨ខាងមុខនេះហើយសមយុទ្ធនោះភាគច្រើនផ្តោតទៅលើការប្រឆាំងភេរវកម្ម និងសង្គ្រោះបន្ទាន់ជាដើម។ ភាគីកម្ពុជាមានកងទ័ពចូលរួមប្រមាណជាងពីររយនាក់ និងចិនមានប្រមាណជិតពីររយនាក់៕
