រាជធានីភ្នំពេញ ៖ អគារកម្ពស់៤២ជាន់ ឬ GOLD TOWER ដែលស្ថិតនៅចំកណ្ដាលរាជធានីភ្នំពេញ ត្រូវបានធ្វើពិធីក្រុងពាលីសាងសង់បន្តកាលពីថ្ងៃទីអាទិត្យទី២៨ខែមករាឆ្នាំ២០១៨ម្សិលមិញ ក្រោមវត្តមានលោកឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារ អភិវឌ្ឍន៍វិស័យកសិកម្ម និងជនបទ។
អគារកម្ពស់៤២ជាន់ ឬGOLD TOWER បានចាប់ផ្ដើមសាងសង់ឡើងវិញ បន្ទាប់ពីបានជាប់គាំងអស់រយៈពេលជាច្រើនឆ្នាំរួចមក។ ការសាងសង់បន្តនេះ គឺជាកិច្ចសហការរវាងក្រុមហ៊ុន YUNWOO របស់កូរ៉េ និងក្រុមហ៊ុន HONGTAO DECORATION មកពីប្រទេសចិន។
លោក Liu Nianxin អគ្គនាយកក្រុមហ៊ុន HONGTAO DECORATION បានប្រាប់អ្នកសារព័ត៌មានថា វត្តមានក្រុមហ៊ុនរបស់លោក នឹងបំពេញការសាងសង់បន្ថែមដើម្បីឈានដល់ការបញ្ចប់គម្រោងទាំងមូលនៅចុងឆ្នាំ២០១៩ ឬដើមឆ្នាំ២០២០ខាងមុខ។ជាមួយគ្នានេះ លោកបានអះអាងថា គម្រោងនេះនឹងពុំមានអ្វីដែលត្រូវរាំងស្ទះទៀតទេ ខណៈក្រុមហ៊ុនរបស់លោក មានបទពិសោធន៍គ្រប់គ្រាន់ក្នុងប្រទេសចិន ហើយចិន និងកម្ពុជា ក៏មានទំនាក់ទំនងល្អជាមួយគ្នាផងដែរ។
ចំណែកលោក Kim TaeYeon អគ្គនាយកក្រុមហ៊ុន Yunwoo របស់កូរ៉េ បានឲ្យដឹងថា ការសាងសង់បន្ត នឹងត្រូវប្រើថវិការជាង១២០លានដុល្លារ ដើម្បីបញ្ចប់គម្រោងនៅចុងឆ្នាំ២០១៩ ឬដើមឆ្នាំ២០២០ខាងមុខ។ លោក Kim TaeYeon បានអះអាងថា ក្រុមហ៊ុនបានដោះស្រាយជាមួយអតិថិជនចាស់ ដោយសន្ដិវិធី ហើយអតិថិជនចាស់អាចទិញគម្រោងឡើងវិញ ដោយធ្វើកិច្ចសន្យាថ្មី។
សូមជំរាបថា បច្ចុប្បន្នអគារកម្ពស់៤២ជាន់ ឬGOLD TOWER សាងសង់បាន៣១ជាន់។ អគារនេះ ក៏នឹងរួមបញ្ចូលផ្សារទំនើប ការិយាល័យសម្រាប់ជួល និងខុនដូ២៩ជាន់ សរុបជាង៥០០បន្ទប់៕
