ក្រចេះ ៖ លោក សេង ភីណា អភិបាលរងក្រុងក្រចេះ បានដឹកនាំកម្លាំង គណៈបញ្ជាការឯកភាពក្រុង សហការជាមួយមន្ទីរពាក់ព័ន្ធ បានចុះប្រតិបត្តិការលើប្រជាពលរដ្ឋដែលធ្វើរនាំងលើដី នៃច្រកឌឿងហ៊ែម និងអ្នកលក់ឥវ៉ាន់មួយចំនួន ដែលលយមកលើចំណីចិញ្ចើមផ្លូវ សាធារណៈរបស់រដ្ឋ និងចាក់ខ្សាច់លើគម្រប់លូ ដើម្បីរៀបចំសណ្ដាប់ធ្នាប់ ឲ្យមានរបៀបរៀបរយ ក្នុងការបង្ការទប់ស្កាត់ ការយកចំណីផ្លូវសាធារណៈរបស់រដ្ឋ មកធ្វើអាជីវកម្មដាក់តាំង លក់ដូរទំនិញផ្សេងៗ ពីសំណាក់ប្រជាពលរដ្ឋជាអាជីវករ ដែលច្បាប់កំពុងហាមឃាត់ដាច់ខាត ដើម្បីជួយលើកកម្ពស់សោភ័ណ្ឌភាពក្រុងក្រចេះ នាព្រឹកថ្ងៃទី២៩ ខែមករា ឆ្នាំ២០១៨ ។
លោក សេង ភីណា បានថ្លែងទៀតថា ដើម្បីរក្សាបានបរិស្ថានល្អ ខ្យល់អាកាសបរិសុទ្ធ ប្រកបដោយផាសុខភាព និងជួយលើកកម្ពស់សោភ័ណ្ឌភាព ខេត្តក្រចេះបាន គឺផ្ដើមចេញពីយើងទាំងអស់គ្នា ដូច្នេះចាំបាច់ណាស់ ដើម្បីបញ្ឈប់រាល់សកម្មភាពពីការដាក់តាំងសម្ភារៈ ឫលក់ដូរទំនិញផ្សេងៗ ដែលរំលោភលើចំណីចិញ្ចើមផ្លូវសាធារណៈរបស់រដ្ឋ ពិសេសនៅច្រកឌឿងហ៊ែម ដែលប្រជាពលរដ្ឋមួយចំនួនធ្វើជារនាំង ឬរបងបាំង ដែលធ្វើអោយពិបាក់ដល់ការធ្វើដំណើរ និងពេលដែលមានអគ្គីភ័យ ធ្វើអោយឡានទឹករបស់នគរបាល ពិបាក់ចូលទៅជួយសង្គ្រោះ ដល់ផ្ទះដែលកើតហេតុបានឡើយ ។
លោកអភិបាលរងក្រុង បានបញ្ជាក់ថាការចុះអនុវត្ត បែបនេះ នៅតែមានជាបន្តបន្ទាប់ ប្រសិនបើគ្មានការចូលរួមសហការល្អពីប្រជាពលរដ្ឋនោះទេ ទោះបីជាអាជ្ញាធរពាក់ព័ន្ធ មានវិធានការ ខិតខំប្រឹងប្រែងយ៉ាងណា ក៏គ្មានប្រសិទ្ធឡើយ បើសិនជាប្រជាពលរដ្ឋមួយចំនួនតូចនៅពុំទាន់យល់ពីច្បាប់ទម្លាប់នោះទេ ។
លោក អភិបាលរងក្រុងបានថ្លែងអំណរគុណដល់ប្រជាពលរដ្ឋមួយចំនួនធំដែលបានយល់ដឹងយ៉ាងច្បាស់អំពីច្បាប់ទម្លាប់ និងប្រជាពលរដ្ឋដែលបានសហការ លើប្រតិបត្តិការខាងលើនេះ ដែលព្រមរុះរើ តាមការណែនាំរបស់លោកអភិបាលក្រុង ៕ ដោយ កិះខន