រាជធានីភ្នំពេញ ៖ អគ្គមេបញ្ជាការរងនៃកងយោធពលខេមរភូមិន្ទ លោកនាយឧត្តមសេនីយ៍ ឥត សារ៉ាត់ បានថ្លែងឲ្យដឹងនៅថ្ងៃទី២៥មករាម្សិលមិញថា កងទ័ពកម្ពុជា និងចិនគ្រោងនឹងធ្វើសមយុទ្ធ រួមគ្នាជាទ្រង់ទ្រាយធំនៅក្នុងខែមីនា ឆ្នាំ២០១៨ខាងមុខនេះ ដោយផ្តោតទៅលើការប្រឆាំងភេរវកម្ម និងសង្គ្រោះបន្ទាន់ជាដើម។
លោកបន្តថា សមយុទ្ធនេះមានឈ្មោះ “លំហាត់នាគមាស២០១៨” គឺមានបេសកកម្មប្រឆាំងភេរវកម្ម និងការងារមនុស្សធម៌ នៃកងទ័ពទាំងពីរ កម្ពុជា-ចិន ហើយលំហាត់នេះរៀបចំក្នុងរូបភាពកងពលតូច និងអនុវត្តជាក់ស្តែងកម្រិតថ្នាក់វរសេនាតូច ដោយបែងចែកជាពីរគឺលំហាត់ទីបញ្ជាការ និងលំហាត់លើទីលាន។ ចំពោះកម្លាំងចូលរួមក្នុងលំហាត់នាគមាស២០១៨នេះ ភាគីកម្ពុជាមានចំនួន២៨០នាក់ ភាគីចិនមានចំនួន១៩០នាក់។
លោកបញ្ជាក់ថា ការធ្វើសមយុទ្ធនេះ គឺជាលើកទី២ហើយរវាងយោធាកម្ពុជា និងចិន ហើយវិញ្ញាសាដែលភាគីទាំង២ធ្វើរួមមាន៖ ការរាវមីន និងកម្ទេចយុទ្ធភ័ណ្ឌមិនទាន់ផ្ទុះ ការដោះគ្រាប់បែកសារធាតុគីមីពុល ការបន្សាបជាតិគីមីពុល ការប្រយុទ្ធកងអនុសេនាធំរថក្រោះសហការជាមួយវរសេនាតូចថ្មើជើង ការរំដោះចំណាប់ខ្មាំង និងការងារមនុស្សធម៌ ព្រមទាំងបាញ់គ្រាប់ពិតជាដើម។
លោកនាយឧត្តមសេនីយ៍បន្ថែមថា គោលបំណងនៃការធ្វើលំហាត់នេះ គឺដើម្បីអបអរសាទរខួបអនុស្សាវរីយ៍លើកទី៦០ នៃទំនាក់ទំនងការទូតរវាងកម្ពុជា-ចិន ហើយជំរុញកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងប្រទេសទាំង២៕