ខេត្តកណ្តាល ៖ ក្រោយពីធ្វើការស្រាវជ្រាវអស់រយៈពេល ៤ថ្ងៃនគរបាល ព្រហ្មទណ្ឌកំរិតធ្ងន់ សហការជាមួយនគរបាលស្រុកអង្គស្នួល បានធ្វើការចាប់ខ្លួនស្ត្រីម្នាក់ជាឃាតកដៃឆៅរូបស្អាត ដែលចាក់សម្លាប់បុរសម្នាក់ ជាច្រើនកាំបិតប្លន់យកម៉ូតូ ១គ្រឿង ជិះគេចខ្លួនបាត់ កាលពីវេលាម៉ោង ៦ និង ២០នាទី ល្ងាចថ្ងៃទី២២ ខែមករា ឆ្នាំ២០១៨ ស្ថិតក្នុងបន្ទប់លេខ១១ ផ្ទះសំណាក់យីហោ «សំណាងណាស់» ក្នុងភូមិត្រពាំងសុក្រំ ឃុំបែកចាន ស្រុកអង្គស្នួល ខេត្តកណ្ដាល ។ ស្ត្រីជាឃាតករឈ្មោះ ផេង ណាត ៣២ ឆ្នាំស្នាក់នៅផ្ទះជួលក្នុងភូមិ ព្រៃបឹង សង្កាត់កន្ទោក ពោធិ៍សែនជ័យ ក្រោយពីឃាត់ខ្លួន សមត្ថកិច្ច បាន កំពុងតែបញ្ជូនទៅយកម៉ូតូ នៅព្រែកព្នៅ និងបន្តឲ្យទៅធ្វើត្រាប់នៅកន្លែងកើតហេតុ។
ជនរងគ្រោះឈ្មោះ នួន សុភាព ហៅ នួន ភាព ភេទប្រុស អាយុ ៥៨ឆ្នាំ មានមុខរបរ ជាថៅកែម៉ាស្សា និងជាអ្នកសារព័ត៌មានសម្លេងប្រជាជន ស្នាក់ភូមិស្រែអំពិល សង្កាត់ស្នោ ខណ្ឌពោធិ៍សែនជ័យ ម៉ូតូដែលបាត់បង់ម៉ាកសេ១២៥ពណ៌ខ្មៅ ស៊េរី២០១៧ មិនចាំស្លាកលេខ ។
ក្រោយពីសមត្ថកិច្ច កំណត់ មុខសញ្ញាច្បាស់ សមត្តកិច្ច ចាប់ខ្លួន ជនសង្ស័យបាន នៅវេលាម៉ោង ១៧និង២៣ នាទី ថ្ងៃទី២៤ ខែមករា ឆ្នាំ២០១៨នៅត្រង់ចំណុច ភោជនីយដ្ឋាន វាលស្រែ១០០ ស្ថិតនៅ ភូមិព្រៃបឹង សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ រួចធ្វើការនាំខ្លួន មកកាន់អធិការដ្ឋាន នគរបាលស្រុក អង្គស្នួល ដើម្បីបន្តចាត់ការ តាមនីតិវិធី។
ស្ដ្រីសង្ស័យ ជាឃាតករ បានឆ្លើយសារភាពថា នៅមុនពេលកើតហេតុ ជនរងគ្រោះ បានទូរស័ព្ទ បបួលនាងមករួមភេទ។ នាងគិតថា ដោយសារខ្លួន ខ្វះខាតលុយ ចំនួន ២,៥០០ដុល្លារ សហរដ្ឋមេរិក ហើយដឹងថា ជនរងគ្រោះ មានគ្រឿង អលង្ការ ជាប់ខ្លួនច្រើនផងនោះ ក៏មានគម្រោង សម្លាប់ជនរងគ្រោះ ដើម្បីប្លន់យកទ្រព្យសម្បត្តិ។ ស្ដ្រីសង្ស័យ បានទារថ្លៃរួមភេទ ចំនួន ១០ម៉ឺនរៀល តែជនរងគ្រោះ ឲ្យតែ ២០ដុល្លារ ខណៈនោះស្ដ្រីសង្ស័យ ក៏យល់ព្រមចេញក្រៅ ដោយយក កូនកាំបិតចុងស្រួច លាក់ទុក ក្នុងកាបូប រួចជាស្រេច។
លុះដល់ថ្ងៃកើតហេតុ វេលាម៉ោង ១១ ថ្ងៃត្រង់ ជនសង្ស័យ បានទូរស័ព្ទ ទៅជនរងគ្រោះ ម្ដងទៀត ដើម្បីណាត់ជួបគ្នា រកកន្លែងរួមភេទ ដោយបានជិះម៉ូតូ មកទទួលស្ដ្រីសង្ស័យ នៅមុខច្រកចូល ភូមិបូរីកម្មករ ឃុំបែកចាន ដើម្បីទៅចូលដេក ផ្ទះសំណាក់យីហោ សំណាងណាស់។ ពេលចូលដល់ ក្នុងបន្ទប់ផ្ទះសំណាក់ ជនរងគ្រោះ បានផ្លាស់កន្សែង រួចចូលងូតទឹក ឆ្លៀតក្នុងឱកាសនោះ ជនសង្ស័យ បានយកកូនកាំបិត ពីក្នុងកាបូប លាក់ទុក ក្រោមខ្នើយ ហើយពេល ជនរងគ្រោះ កំពុងមានអារម្មណ៍ ស្រើបស្រាលភ្លេចខ្លួន ក៏យកកូនកាំបិត ចាក់ជនរងគ្រោះ ជាច្រើនកាំបិត រហូតដល់ស្លាប់ និងប្លន់យក ទ្រព្យសម្បត្តិ តែម្តង៕
