រាជធានីភ្នំពេញ ៖ សាលាដំបូងរាជធានីភ្នំពេញ បានចេញដីកាបង្គាប់ឱ្យឃុំខ្លួន មន្ត្រីនគរបាលម្នាក់ ជាបណ្តោះអាសន្ននៅពន្ធនាគាររាជធានីភ្នំពេញ ដែលបាញ់ពលរដ្ឋស្លាប់ ក្នុងប្រតិបត្តិការបង្ក្រាបល្បែងជល់មាន់ នៅខណ្ឌពោធិ៍សែនជ័យ ។
លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ បានឱ្យដឹងតាម Telegram ថា ក្រោយពីបានពិនិត្យឯកសារសំណុំរឿង សាកសួរចម្លើយតាមនីតិវិធី និងពិនិត្យភស្តុតាង លោក សៀង សុខ ជាតំណាងអយ្យការ បានសម្រេចបើកការស៊ើបសួរដោយចោទប្រកាន់លើឈ្មោះ ចន វិរៈ មានឋានន្តរស័ក្តិ ជាអនុសេនីយ៍ត្រី (ស័ក្តិ១) ផ្នែកអន្តរាគមន៍ នៃអធិការដ្ឋាននគរបាលខណ្ឌពោធិ៍សែនជ័យ ពីបទមនុស្សឃាតដោយអចេតនា លើជនរងគ្រោះឈ្មោះ សៀក រ៉ន ភេទប្រុស អាយុ៣៣ឆ្នាំ មុខរបរកម្មកររោងចក្រ ស្នាក់នៅក្បែរផ្សារកាណាស៊ីធី មានស្រុកកំណើតនៅ ខេត្តកំពង់ស្ពឺ ប្រព្រឹត្តនៅចំណុចក្រោយផ្សារកាណាស៊ីធី ដីឡូត៌គ្មានលេខ ភូមិចោមចៅ២ សង្កាត់ចោមចៅ ខណ្ឌពោធិសែនជ័យ រាជធានីភ្នំពេញ កាលពីថ្ងៃទី២១ ខែមករា ឆ្នាំ២០១៨ តាមមាត្រា ២០៧ នៃក្រមព្រហ្មទណ្ឌ ៕
