មណ្ឌលគិរី៖ រថយន្តដឹកដំឡូងមី ម៉ាកហ៊ីយ៉ាន់ដាយពាក់ស្លាក់លេខៈ3A06.58 ដោយបើកបរមិនមានការប្រុងប្រយ័ត្នពេលចុះភ្នំអូរងើយ បណ្តាលឲ្យក្រឡាប់រងរបួសព្រូឡាន។
ហេតុការណ៍នេះកើតឡើងនៅវេលាម៉ោង៩និង៣០នាទីថ្ងៃទី៦ខែមករាឆ្នាំ២០១៦នេះ នៅចំនុចភ្នំអូរងើយផ្លូវលេខ76A ស្ថិតនៅក្នុងភូមិអណ្តូងក្រឡឹង ឃុំសែនមនោរម្យ ស្រុកអូររាំង ។
បើតាមសមត្ថកិច្ចសណ្តាប់ធ្នាប់ចរាចរស្រុកអូរាំងបានឲ្យដឹង រថយន្តនេះដឹកដំឡូងមីពេញព្រាប ពេលដែលមកដល់ចំនុចកើតហេតុខាងលើ អ្នកបើកបរមិនមានការប្រុងប្រយ័ត្ន ដោយបើកក្នុងល្បឿនលឿនពេកបណ្តាលឲ្យរថយន្តរេចង្កូតធ្លាក់កង់ខាងស្តាំទៅក្នុងលូ បោកក្រឡាប់តែម្តង់ បណ្តាលឲ្យព្រូឡានកៀបដៃខាងឆ្វេងជាប់និងទ្វារ ព្រមទាំងបាក់ជើងខាងស្តាំយ៉ាងធ្ងន់ធ្ងរ ។
តាមការបញ្ជាក់របស់សមត្ថកិច្ចថា អ្នកបើកបរពុំមានប័ណ្ណបើកបរនោះទេ សូម្បីតែរថយន្តក៏ពុំមានឯកសារគ្រប់គ្រាន់ចរាចរនៅលើដងផ្លវនោះដែរ។
សមត្ថកិច្ចបានឲ្យដឹងទៀតថា អ្នកបើកបររថយន្តឈ្មោះ កង ហាក ភេទប្រុស អាយុ៣៥ឆ្នាំ ជនជាតិខ្មែរ រស់នៅភូមិក្របៅ ឃុំកំចាយ ស្រុកកំចាយមា ខេត្តព្រៃវែង ចំណែកព្រូឡានដែលរងរបួសធ្ងន់ឈ្មោះ លី មីង ភេទប្រុស អាយុ២៤ឆ្នាំ ជនជាតិខ្មែររស់នៅរាជធានីភ្នំពេញ ។
ក្រោយមកអ្នករងរបួស ត្រូវបានរថយន្តសាមុយដឹកយកទៅសង្គ្រោះបន្ទាន់នៅមន្ទីរពេទ្យបង្អែកក្រុងសែនមនោរម្យ ៕
ដោយ ៖ ហ៊ិន សុគន់