រាជធានីភ្នំពេញ ៖ យោងតាមការចុះផ្សាយរបស់បណ្តាញព័ត៌មានក្នុងស្រុក ដែលបានដកស្រង់សំដីលោកនាយឧត្តមសេនីយ៍ សុខ ផល អគ្គនាយក នៃអគ្គនាយកដ្ឋានអន្តោប្រវេសន៍បានឲ្យដឹងថា រយៈពេល២ខែកន្លងទៅនេះ ជនបរទេសជាង២ម៉ឺននាក់ នៅទូទាំងប្រទេសត្រូវបានកម្លាំងនគរបាល នៃអគ្គ នាយកដ្ឋានអន្តោប្រវេសន៍ ចុះដកហូតឯកសាររដ្ឋបាល កម្ពុជាមិនប្រក្រតី ដែលពួកគេកំពុងកាន់កាប់ ។
លោកថា ជនបរទេសទាំងនោះរួមមាន ជនជាតិវៀតណាម និងឡាវ ដែលរស់នៅទាំង២៥រាជធានី-ខេត្ត ក្នុងយុទ្ធនាការចុះដកហូត រយៈពេល២ខែ តាំងពីថ្ងៃទី២៣ ខែវិច្ឆិកា ឆ្នាំ២០១៧ រហូតដល់ថ្ងៃទី២១ ខែមករា ឆ្នាំ២០១៨នេះ។
លោក សុខ ផល បានបញ្ជាក់ថា អាជ្ញាធរកម្ពុជា បានធ្វើការ ដកហូតឯកសាររដ្ឋបាលកម្ពុជាពីជនបរទេស ចំនួន៦,២៤៤គ្រួសារ មនុស្សរួម២១,១៦៧នាក់ (ស្រី ៩,៨២៩នាក់) មាន០២សញ្ជាតិ គឺវៀតណាម និងឡាវ ដែលដកហូតឯកសារសរុបចំនួន៩,៩៣៤ឯកសារ រួមមាន៖ សៀវភៅ ស្នាក់នៅចំនួន ៤,២១៩ក្បាល សៀវភៅគ្រួសារចំនួន៨៧៣ក្បាល សំបុត្រកំណើរ ខ្មែរចំនួន២,៧៣៧ច្បាប់ សំបុត្រអាពាហ៍ពិពាហ៍ ចំនួន១៥២ច្បាប់ អត្តសញ្ញាណប័ណ្ណសញ្ជាតិខ្មែរចំនួន១,៨៤៨ប័ណ្ណ លិខិតឆ្លងដែនខ្មែរ ចំនួន១០៥ក្បាល ៕
