ភ្នំពេញ៖ សម្តេច ហេង សំរិន ប្រធានកិត្តិយសគណបក្សប្រជាជនកម្ពុជា បានថ្លៃង នាព្រឹកថ្ងៃចន្ទ ៣កើត ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃ១៩ ខែមករា ឆ្នាំ២០១៨នេះថា ដើម្បីឈានទៅដណ្តើមជ័យជម្នះក្នុងការបោះឆ្នោតឆ្នាំ២០១៨នេះ ត្រូវរួមគ្នាសន្សំពិន្ទុពីម្ចាស់ឆ្នោតគ្រប់ពេលវេលា តាមរយៈពង្រឹងគុណភាពការងារ និងអំពើល្អរបស់មន្ត្រីគ្រប់រូប។
សម្តេច ហេងសំរិនថ្លែងបែបនេះក្នងឱកាសបើកបើកមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជាដែលប្រារពធ្វើនៅមហោស្រពកោះពេជ្រក្រោមអធិបតីភាពប្រធានគណបក្សប្រជាជនកម្ពុជាសម្តេចនាយករដ្ឋនាយករដ្ឋមន្ដ្រី ហ៊ុន សែន និងមានការអញ្ជើញចូលរួមពីថ្នាក់ដឹកនាំ និងសមាជិក សមាជិកាជាង២ពាន់នាក់។
សម្តេច ហេង សំរិន បានគូសបញ្ជាក់ថា ឆ្នាំ២០១៨ជាឆ្នាំផ្តើមនីតិកាលថ្មីរយៈពេល៥ឆ្នាំទៀត ដែលមានការងារចំពោះមុខជាច្រើនត្រូវរួមគ្នាធ្វើ។ «បទពិសោធន៍បានបង្ហាញថា ដើម្បីឈានទៅឈ្នះឆ្នោតបាន ត្រូវមានការសន្សំពិន្ទុពីម្ចាស់ឆ្នោតគ្រប់ពេលតាមរយៈគុណភាពការងារ និងអំពើល្អរបស់មន្ត្រីយើង។ ព្រមជាមួយនេះ គណបក្សយើងក៏ត្រូវតែមានកម្មវិធីនយោបាយដែលសុក្រឹត្យបំផុត ដើម្បីបង្ហាញម្ចាស់ឆ្នោតឲ្យមានសង្ឃឹមសម្រាប់អនាគត ហើយសម្រេចចិត្តគាំទ្រគណបក្សយើង»។
ក្នុងសុន្ទរកថាបើកមហាសន្និបាតវិសាមញ្ញសម្តេច ហេង សំរិន ក៏បានរំលេចផងដែរពីសមិទ្ធផល និងបញ្ហាប្រឈមមួយចំនួន ក្នុងឆ្នាំ២០១៣-២០១៨ នីតិកាលទី៥នៃរដ្ឋសភា។
ប្រធានកិត្តិយសគណបក្សប្រជាជនកម្ពុជា សម្តេច ហេង សំរិន បានលើកឡើងថា មហាសន្និបាតរយៈពេល៣ថ្ងៃនេះ មានរបៀបវារៈសំខាន់ៗចំនួន៣ ដែលនឹងត្រូវពិនិត្យ ពិភាក្សា និងអនុម័តរួមមាន៖
១. ឆ្លង និងអនុម័តលើសេចក្តីព្រាងរបាយការណ៍ស្តីពីសភាពការណ៍ទូទៅ និងការងារគណបក្សឆ្នាំ២០១៧ និងទិសដៅភារកិច្ចឆ្នាំ២០១៨។
២. ឆ្លង និងអនុម័តលើសេចក្តីព្រាងកម្មវិធីនយោបាយរបស់គណបក្សប្រជាជនកម្ពុជា សម្រាប់ការកសាង និងការពារមាតុភូមិឆ្នាំ២០១៨-២០២៣។
៣. បោះឆ្នោតបំពេញបន្ថែមសមាជិកគណៈកម្មាធិការកណ្តាលមួយចំនួន៕
បើតាមលោក សុខ ឥសាន គោលនយោបាយធំៗដែលគណបក្សប្រជាជនកម្ពុជានឹងដាក់ចេញក្នុងមហាសន្និបាតរយៈពេល៣ថ្ងៃ (ថ្ងៃទី១៩-២១ ខែមករា ឆ្នាំ២០១៨) នេះរួមមាន៖
១- ការពារយ៉ាងរឹងមាំ ឯករាជ្យ សេរីភាព អធិបតេយ្យ បូរណភាពទឹកដី និងសន្តិភាព ដើម្បីធានាការអភវឌ្ឈន៍ប្រទេសជាតិ និងភាពសុខដុមរមនារបស់ប្រជាជន។
២- លើកកម្ពស់ជីវភាពរស់នៅរបស់ប្រជាជនគ្រប់រូប ទាំងខាងសម្ភារៈ និង ស្មារតីឱ្យបានសមរម្យ ប្រកបដោយភាពថ្លៃថ្នូរ។
៣- ការពាររបបរាជានិយម លើកស្ទួយលទ្ធិប្រជាធិបតេយ្យ សិទ្ធិសេរីភាព របស់ប្រជាជន និងការគោរពច្បាប់។ បន្តពង្រឹងពង្រីកលទ្ធិប្រជាធិបតេយ្យសេរីពហុបក្សឱ្យចាក់គ្រឹះកាន់តែរឹងមាំពីថ្នាក់ជាតិរហូតដល់មូលដ្ឋាន ដើម្បីលើកកម្ពស់ការចូលរួមរបស់ប្រជាជនក្នុងការកសាងនិងការពារមាតុភូមិប្រកបដោយភាពជាម្ចាស់លើជោគវាសនាអនាគតប្រទេសជាតិ ។
៤- ពង្រឹងរដ្ឋបាលសាធារណៈ នៅគ្រប់ថ្នាក់ ជារដ្ឋបាលរបស់ប្រជាជន និងបម្រើផលប្រយោជន៍របស់ប្រជាជន។
៥- បន្តជំរុញកែទម្រង់ ដើម្បីអភិបាលកិច្ចល្អ ។
៦- ជំរុញការអភិវឌ្ឈន៍សង្គម សេដ្ឋកិច្ចឱ្យមានការរីកចម្រើនប្រកបដោយចីរភាព សមធម៌ និងបរិយាប័ន្ន។
ក្នុងគោលនយោបាយទី៦នេះ នឹងផ្តោតសំខាន់ទៅលើការគ្រប់គ្រងស្ថិរភាពម៉ាក្រូសេដ្ឋកិច្ច និងហិរញ្ញវត្ថុសាធារណៈ, ការពង្រឹងភាពជាដៃគូក្នុងការអភិវឌ្ឍន៍, ការអភិវឌ្ឍន៍វិស័យឯកជន, ការអភិវឌ្ឍន៍វិស័យកសិកម្ម អភិវឌ្ឍន៍ជនបទ ពាណិជ្ជកម្ម ការគ្រប់គ្រងដីធ្លី ការគ្រប់គ្រងធនធានធម្មជាតិ និងបរិស្ថាន, ការអភិវឌ្ឍន៍ហេដ្ឋារចនាសម្ព័ន្ធរូបវ័ន្ត, ការអភិវឌ្ឍន៍ទេសចរណ៍
វប្បធម៌ និងសាសនា, ការកសាងសមត្ថភាពនិងអភិវឌ្ឍន៍ធនធានមនុស្ស, ការអភិវឌ្ឍន៍ការងារ និងការអភិវឌ្ឍន៍ប្រព័ន្ធគាំពារសង្គម និងការលើកកម្ពស់ស្ថានភាពស្ត្រី និងកុមារ ការអភិវឌ្ឍន៍យុវជន និងកីឡា។
ក្នុងពង្រាងគោលនយោបាយរបស់គណបក្សប្រជាជនកម្ពុជា នៅតែបន្តរំលឹកដល់សមាជិក សមាជិការបស់ខ្លួនឱ្យគោរពនូវអភិក្រម «ឆ្លុះកញ្ចក់ មុជទឹក ដុសក្អែល និងព្យាបាល» ដើម្បីដោះស្រាយនូវកង្វល់ និងការថ្នាំងថ្នាក់របស់ប្រជាជន ព្រមទាំងបង្កើនជំនឿ និងការគាំទ្ររបស់ប្រជាជនលើបក្សប្រជាជនកម្ពុជា ដោយក្តាប់ឱ្យជាប់នូវគោលការណ៍បក្សក្នុងការកែទម្រង់ ។ ការប្រយុទ្ធប្រឆាំងអំពើពុករលួយ ក៏ជាកិច្ចការអាទិភាព ដែលបានកំណត់នៅក្នុងគោលនយោបាយរបស់គណបក្សប្រជាជនកម្ពុជាផងដែរ។
បើតាមពង្រាងគោលនយោបាយ បានបង្ហាញថា ការប្រយុទ្ធប្រឆាំងអំពើពុករលួយ គឺជាកិច្ចការជាអាទិភាព ដែលបាននិងកំពុងបន្តជំរុញការអនុវត្តនូវវិធានការអប់រំ បង្ការ ទប់ស្កាត់ជាមុន តាមរយៈការពង្រឹងគណនេយ្យភាព សមត្ថភាព ប្រសិទ្ធភាពស្ថាប័នសាធារណៈគ្រប់ថ្នាក់ គ្រប់ផ្នែក ព្រមទាំងបំផុសចលនាឱ្យមានការចូលរួម និងគាំទ្រពីប្រជាជន វិស័យឯកជន និងសង្គមស៊ីវិល ដោយដើរទន្ទឹមនឹងវិធានការដ៏ម៉ឹងម៉ាត់នៅក្នុងការបង្ក្រាបចំពោះជនដែលប្រព្រឹត្តអំពើពុករលួយ៕
