ខេត្តពោធិ៍សាត់ ៖ កាលពីថ្ងៃព្រហស្បត៏ ២ កើត ខែមាឃ ឆ្នាំរកា ពស២៥៦១ត្រូវនឹងថ្ងៃទី១៨ ខែមករា ឆ្នាំ២០១៨ជនសង្ស័យម្នាក់ត្រូវកម្លាំងនគរបាលស្រុកភ្នំក្រវាញបានឃាត់ខ្លួនពីបទរំលោភសម្លាប់ហើយបង្កសបួស្នាមទៀត ។ ជនសង្ស័យមានឈ្មោះ ងុយ អ៊ី ភេទប្រុស អាយុ២២ឆ្នាំ រស់នៅភូមិក្សេត្របូរី ឃុំសន្ទ្រែ ស្រុកភ្នំក្រវាញ ខេត្តពោធិ៍សាត់។ឯជនរងគ្រោះឈ្មោះ យឿន យាំ ភេទស្រីអាយុ១៣ឆ្នាំ ជាសិស្សថ្នាក់ទី៤ រស់នៅចំណុចអូររីង ក្នុងភូមិក្សេត្របូរី ឃុំសន្ទ្រែ ស្រុកភ្នំក្រវាញត្រូវបានជនសង្ស័យ ង៉ុយ អ៊ី ចាប់ជន វាយបង្ខំលើរូបរាយកាយប៉ុនប៉ងរំលោភសេពសន្ទវៈ ពេលចេញពីសាលារៀនដើរតាមផ្លូវរទេះស្ងាត់ ។
ក្រោយមកមានបុរសបីនាក់ដែលមានឈ្មោះ ទី១ឈ្មោះ យី ប៉េស ភេទប្រុស អាយុ២៣ឆ្នាំ,ទី២ឈ្មោះ បូន ភិន ភេទប្រុស,និងទី៣ឈ្មោះ ឌឿន ដា ភេទប្រុស ខណៈពួកគេកំពុងដើររកក្របីបាត់នៅកន្លែងកើតហេតុឃើញហេតុការណ៏នោះក៏ស្ទុះចេញមកជួយតែត្រូវជនសង្ស័យឈ្មោះ ង៉ុយ អ៊ី ចាក់មួយកាំបិតចំពោះបណ្តាលឲ្យរងរបួសធ្ងន់ម្នាក់។ឃើញហេតុដូចនេះមិត្តភក្តិចូលទៅគ្រាយកអ្នករបួសរត់ចេញហើយត្រូវជនសង្ស័យដេញតាមតែមិនទាន់ជនសង្ស័យក៏បែរទិសដៅត្រឡប់ទៅចាក់ក្មេងស្រីរងគ្រោះឈ្មោះ យឿន យាំ នោះវិញបណ្តាលឲ្យប្រកាច់ស្លាប់។បន្ទាប់ពីធ្វើសកម្មភាពហើយជនសង្ស័យក៏រត់ទៅផ្ទះគូដណ្តឹងរបស់ខ្លួនបាត់ទៅ។
រហូតដល់ម៉ោង០៧និង៣៥នាទីយប់ថ្ងៃដដែលជនសង្ស័យក៏កើតមានជម្លោះជាមួយគូដណ្តឹងទៀតហើយបានយកកាំបិតចាក់គូដណ្តឹងខ្លួនមួយកំបិតចំដើមដោះខាងឆ្វេងបណ្តាលអោយរងរបួសធ្ងន់។បន្ទាប់មកជនសង្ស័យក៏ចាក់ពោះខ្លួនឯងតាមក្រោយបណ្តាលអោយរបួសធ្ងន់ដូចគ្នាធ្វើអោយមានការឆោរឡោដល់ក្រុមគ្រួសារគូដណ្តឹងក៏ធ្វើការឡោមព័ទ្ធនិងប្តឹងសមត្ថកិច្ចចាប់ជនសង្ស័យតែម្តង។
លោកវរសេនីយ៍ត្រី តាន់ គារិទ្ធ អធិការស្តីទីនៃអធិការដ្ឋាននគរបាលស្រុកភ្នំក្រវាញ និងអាជ្ញាធរមូលដ្ឋានបានប្រាប់ឲ្យដឹងថាតាមការពិនិត្យបានបញ្ជាក់ថាជនរងគ្រោះឈ្មោះ យឿន យាំ មិនត្រូវបានជនសង្ស័យរំលោភបានសម្រេចនោះឡើយហើយសាកសពត្រូវបានប្រគល់ជូនក្រុមគ្រួសារធ្វើបុណ្យតាមប្រពៃណី។ ចំណែកឯជនរងគ្រោះពីរនាក់ទៀត ទី១ឈ្មោះ ឌីន ដា ភេទស្រី អាយុ១៩ឆ្នាំ ត្រូវជាគូដណ្តឹងកំពុងសម្រាកព្យាបាលនៅមន្ទីរពេទ្យបង្អែកស្រុកភ្នំក្រវាញនិងទី២ឈ្មោះ យី ប៉េស ជាអ្នកទៅជួយក្មេងស្រីរងគ្រោះកំពុងសម្រាកព្យាបាលនៅមន្ទីរពេទ្យភ្នំពេញ។