ក្រចេះ ៖ មុខសញ្ញាជនសង្ស័យក្នុងករណីជួញដូរដោយខុសច្បាប់នូវសារធាតុញៀនម្នាក់ ត្រូវបានបង្ក្រាបដោយរឹបអូសបានគ្រឿងញៀនប្រភេទទឹកកក(ICE) ជាងមួយគីឡូក្រាម រួមទាំងវត្ថុតាងពាក់ព័ន្ធជាច្រើនទៀត។
សកម្មភាពបង្ក្រាបមុខសញ្ញាជួញដូរគ្រឿងញៀនទ្រុងទ្រាយធំនេះ ធ្វើឡើងនៅវេលាម៉ោង ១៩និង៤៥នាទី ថ្ងៃពុធ ទី១៧ ខែមករា ឆ្នាំ២០១៨នេះ ត្រង់ចំណុច ផ្លូវខ្វែង ផ្លូវជាតិលេខ៧ ជាប់វត្តចង្ក្រង់ ស្ថិតក្នុងភូមិចង្ក្រង់ ឃុំចង្ក្រង់ ស្រុកចិត្របុរី ខេត្តក្រចេះ។
សម្ថកិច្ចឲ្យដឹងថា ក្នុងប្រតិបត្តិការខាង លើ ឃាត់ជនសង្ស័យម្នាក់ ឈ្មោះ ខាន់ វិទ្ធី ហៅអាឆក ភេទប្រុស អាយុ ៣២ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅ ភូមិថ្មគ្រែកណ្តាល ឃុំថ្មគ្រែ ស្រុកចិត្របុរី ខេត្តក្រចេះ ជាមុខសញ្ញាចាស់។
សមត្ថកិច្ចវត្ថុតាងចាប់យកមាន ម្សៅក្រាម ពណ៌សថ្លា សង្ស័យជាសារធាតុញៀន ប្រភេទ មេតំហ្វេតាមីន (ICE) សរុបចំនួន ១០កញ្ចប់ (ធំ ០៣កញ្ចប់ និងមធ្យម ០៧កញ្ចប់) ស្នើរនឹង១,០៤១១គីឡូក្រាម ថ្លឹងទាំងកញ្ចប់រក្សាវត្ថុតាង។
សមត្ថកិច្ចប្រាប់ទៀតថា ក្រៅពីគ្រឿងញៀនដកហូតកាំភ្លើងខ្យល់មួយដើម ម៉ាក MI9IIAI លេខ871072 ,ម៉ូតូ ០១គ្រឿង ម៉ាក HONDA DREAM C125 លេខតួ ND125M-9487356 លេខម៉ាស៊ីន ND125 ME-9487356 ពណ៌ខ្មៅ គ្មានស្លាកលេខ, ទូរស័ព្ទដៃ ០១គ្រឿង ម៉ាក NOKIA RN-1011 ពណ៌ខ្មៅ លេខ 071 9021999 និងប្រាក់ចំនួន ៥០០,០០០រៀល។
មុនពេលកើតហេតុដោយអនុវត្តតាមវិធានញុះញង់ឲ្យលក់គ្រឿងញៀនដោយខុសច្បាប់ កម្លាំងជំនាញនៃការិយាល័យប្រឆាំងគ្រឿងញៀន ដឹកនាំសម្របសម្រួលនីតិវិធីដោយផ្ទាល់ពីសំណាក់លោក សោ វុទ្ធី ព្រះរាជអាជ្ញារង អមសាលាដំបូងខេត្តក្រចេះ បានឃាត់ខ្លួនជនសង្ស័យឈ្មោះ ខាន់ វិទ្ធី ហៅអាឆក ខណ:ពេលកំពុងជិះម៉ូតូនៅចំណុចផ្លូវខ្វែង ផ្លូវជាតិលេខ៧ ជាប់វត្តចង្ក្រង់ ស្ថិតក្នុងភូមិសាស្ត្រ ភូមិចង្ក្រង់ ឃុំចង្ក្រង់ ស្រុកចិត្របុរី។
បន្ទាប់ពីឃាត់ខ្លួនជនសង្ស័យសមត្ថឆែកឆេរត្រួតពិនិត្យក្នុងកាបូបស្ពាយពណ៌ខ្មៅរបស់ជនសង្ស័យ រកឃើញម្សៅក្រាមពណ៌សថ្លា សង្ស័យជាសារធាតុញៀន ប្រភេទមេតំហ្វេតាមីន (ICE) សរុបចំនួន ០៨កញ្ចប់ (ធំ ០១កញ្ចប់ និងមធ្យម ០៧កញ្ចប់), កាំភ្លើងខ្យល់ ០១ដើម ម៉ាក MI9IIAI។
លោកព្រះរាជអាជ្ញាររង បានឲ្យដឹងថា មន្ត្រីអនុវត្តច្បាប់យើងបានបន្តនីតិវិធី នាំខ្លួនជនសង្ស័យឈ្មោះ ខាន់ វិទ្ធី ទៅឆែកឆេរបន្ទប់ស្នាក់នៅផ្ទាល់ខ្លួន ក្នុងផ្ទះរបស់ឈ្មោះ ប៉ាវ សូលីន បងស្រីជនសង្ស័យស្ថិតនៅភូមិថ្មគ្រែកណ្តាល ឃុំថ្មគ្រែ ស្រុកចិត្របុរី ខេត្តក្រចេះ ឆែកឆេររកឃើញម្សៅក្រាមពណ៌សថ្លា សង្ស័យជាសារធាតុញៀន ប្រភេទមេតំហ្វេតាមីន (ICE) សរុបចំនួន ០២កញ្ចប់ធំ លាក់ទុកក្នុងទូក្បាលគ្រែបន្ថែមទៀត។
បច្ចុប្បន្នជនសង្ស័យរួម និងវត្ថុតាងខាងលើ ការិយាល័យប្រឆាំងគ្រឿងញៀនកំពុងកសាងសំណុំរឿងតាមនីតិវិធី !
