បាត់ដំបង ៖ សិក្ខាសាលាថ្នាក់ខេត្ត ស្តីពីការសម្រេចចិត្ត និងអនុម័ត ផែនការសកម្មភាពមីន ឆ្នាំ២០១៦ របស់ខេត្តបាត់ដំបង ដែលរៀបចំឡើងដោយ MA PU បានប្រព្រឹត្តទៅកាលពីថ្ងៃទី៣០ ខែធ្នូ នៅសាលា ខេត្តក្រោមអធិបតីភាព លោក ងួន រតនៈ អភិបាលរងខេត្ត និងជាប្រធានគណកម្មាធិការសកម្មភាពមីន ខេត្ត។
ក្នុងបទបង្ហាញ ស្តីពីសកម្មភាពខេត្តបាត់ដំបងឆ្នាំ២០១៥ លោក ងួម ឆៃ រួមប្រធានក្រុមការងារ ផែនការសកម្មភាពមីនខេត្ត ដែលសិក្ខាសាលាថ្នាក់ខេត្តបានអនុម័តមាន ៥៨២ ចំការមីនស្មើជាង ៤.៤៩6ហិកតា។ ហើយក្នុងគម្រោងដេញថ្លៃ របស់ថ្នាក់ជាតិមាន ២៤០ ចំការមីនស្មើ១៤០០ ហិចតាជាង ចំការមីនបន្ទាន់បន្ថែម ៨៧ចំការមីន ស្មើ៥៩១ ហិកតាជាង។ សរុបចំការមីនក្នុងឆ្នាំ២០១៥ មាន៩០៩ ចំការមីន ស្មើ៦.៥១៥ ហិកតា។ ជាលទ្ធផល ដែលក្រុមប្រតិបត្តិការអនុវត្តក្នុងស្រុកទាំង១០ របស់ខេត្ត សម្រេចបាន ៤៦១ចំការមីន ស្មើ៣.៤៥៨ហិកតាជាង ហើយរកឃើញមីនប្រឆាំងមនុស្ស ៣១០២គ្រាប់មីន ប្រឆាំងរថគ្រោះ៨៩គ្រាប់ យុទ្ធភណ្ឌមិនទាន់ផ្ទុះ២៨៧៧គ្រាប់ និងមិនច្នៃ៩គ្រាប់ ហើយលទ្ធផលនេះគិតពីខែមករា ដល់ខែវិច្ឆិការ ឆ្នាំ២០១៥។ ចំពោះជនរងគ្រោះថ្នាក់ដោយសារមីន និងយុទ្ធភណ្ឌមិនទាន់ផ្ទុះចាប់ពីខែមករា ដល់ថ្ងៃទី៣០ ខែកញ្ញា ឆ្នាំ២០១៥ មានអ្នកស្លាប់ ៣នាក់ និង របួស២៥នាក់។ចំពោះមីនខេត្តមាន៥៦៧ចំការមីន រាប់បញ្ជូលទាំងផែនការនៅសល់ឆ្នាំ២០១៥ផង។
លោក ងួន រតនៈ បានបញ្ជាក់ថាកន្លងមកយើងបានកត់សំគាល់ថា ទាំងប្រតិបត្តិការ ក្រុមការ ងារ ផែនការណ៍សកម្មភាពមីនខេត្ត អាជ្ញាធរផែនដីគ្រប់លំដាប់ថ្នាក់ និងអង្គភាពដៃគូអភិវឌ្ឍន៍នានា ក្នុងខេត្តបានរួមសហការគ្នាយ៉ាងល្អប្រសើរ រួមគ្នាអនុវត្តផែនការបោសសំអាតមីនសម្រេចបានជោគ ជ័យ ជាបន្តបន្ទាប់។ជាការពិតផ្ទៃដីដែលបានបោសសំអាតមីនរួច ត្រូវបានយកមកប្រើប្រាស់ដីលំនៅ ដ្ឋានដីកសិកម្ម និងដីហេដ្ឋារចនាសម្ព័ន្ធ ជិត៧៨ហិកតា ផ្លូវថ្នល់សាលារៀន វត្តអារាម អណ្តូងទឹក ស្រះទឹក និងប្រឡាយជាដើម។
លទ្ធផលខាងលើនេះ ពិតជាបានរួមចំណែករក្សាសន្តិសុខសុវត្ថិភាព សណ្តាប់ធ្នាប់សង្គម និង ការអភិវឌ្ឍន៍សេដ្ឋកិច្ចសង្គម លើកកំពស់ជីវភាពរស់នៅរបស់ប្រជាពលរដ្ឋឲ្យ កាន់តែមានភាពប្រសើរ ពិសេសអាត្រាគ្រោះថ្នាក់ ដោយសារគ្រាប់មីន នឹងយុទ្ធភ័ណ្ឌមិនទាន់ផ្ទុះ ត្រូវបានថយចុះជាលំដាប់។ តាមរយៈនៃការចូលរួមរបស់លោក លោកស្រី ខ្ញុំសង្ឃឹមជឿជាក់ថា និងចូលរួមយោបល់ពិភាក្សា ដោយ ឈរលើផលប្រយោជន៍ប្រជាពលរដ្ឋជាចម្បង ហើយស្របទៅ និងផែនការយុទ្ធសាស្ត្ររបស់ជាតិ គឺកាន់បន្ថយអត្រាគ្រោះថ្នាក់ និងភាពក្រីក្ររួមចំណែក អភិវឌ្ឍន៍សេដ្ឋកិច្ចសង្គមរបស់យើង ៕