ភ្នំពេញ៖ ប្រពន្ធ័លូទាំងតូចទាំងធំក្នុងភូមិសាស្ត្រខណ្ឌទាំង ៤នៅកណ្តាលក្រុងប្រវែងជាង២០គីឡូម៉ែត្រត្រូវបានមន្ទីរសាធារណការនិងដឹកជញ្ជូនរាជធានីភ្នំពេញនិងខណ្ឌចំនួន ៣ស្តាររួចរាល់ហើយក្នុងរយះពេលមួយសប្តាហ៏បន្ទាប់ពីបើកយុទ្ធនាការស្តារតាមការណែនាំរបស់លោកអភិបាលរាជធានីភ្នំពេញ។
នៅរសៀលថ្ងៃចន្ឌ ១៤រោចខែបុស្ស ឆ្នាំរកា នព្វស.ស២៥៦១ត្រូវនិងថ្ងៃទី១៥ ខែមករាឆ្នាំ២០១៨នេះរដ្ឋបាលរាជធានីភ្នំពេញបានបើកកិច្ចប្រជុំមួយដើម្បីពិនិត្យលទ្ធផល នៃយុទ្ធនាការស្តារលូ និងប្រឡាយក្នុងរាជធានីភ្នំពេញ លោក ឃួង ស្រេង អភិបាលរាជធានីភ្នំពេញ បានជំរុញ បន្ថែមឲ្យមន្ទីរសាធារណៈការ និងដឹកជញ្ជូនរាជធានីភ្នំពេញ ក៏ដូចអាជ្ញាធរខណ្ឌទាំង៤នៅកណ្តាលក្រុង។
លោក ម៉េត មាសភ័ក្ដី អ្នកនាំពាក្យរដ្ឋបាលរាជធានីភ្នំពេញបានឱ្យដឹងក្រោយចង់កិច្ចប្រជុំថា៖ លោកអភិបាលរាជធានី ភ្នំពេញបានណែនាំដល់ប្រធានមន្ទីរសាធារណការនិងលោកអភិបាលខណ្ឌពាក់ព័ន្ធទាំង៤ត្រូវបន្ថែមក្រុមការងារដើម្បីអនុវត្តឲ្យកាន់តែមានប្រសិទ្ធភាពនិងបានឆាប់រួចរាល់តាមផែនការដែលបានកំណត់ ដោយត្រូវធានាថា លូដែលបានស្តាររួចទឹកត្រូវតែហូរលែងស្ទះនិងមានការទទួលខុសត្រូវលើការងាររបស់ខ្លួនទៅតាមលក្ខណៈបច្ចេកទេស ។ លោកអភិបាលរាជធានីក៏បានសំណូមពរឲ្យមានការចូលរួមពីប្រជាពលរដ្ឋគ្រប់មជ្ឈដ្ឋានក្នុងរាជធានីភ្នំពេញត្រូវតែមានការយោគយល់នឹងចូលរួមធ្វើយ៉ាងណាកុំឲ្យលូស្ទះ,កុំយកសំរាម ឬកាកសំណល់ផ្សេងៗទៅចាក់ចូលលូ ឬបិទមុខលូដែលជាមូលហេតុចំបងបណ្តាលឲ្យស្ទះលូ។
លោកអ្នកនាំពាក្យបន្តថា៖យោងតាមប្រសាសន៍លោកអភិបាលរាជធានីឆ្លងកាត់ដំណើរការស្តារលូរយះពេល១ សប្តារហ៏មកនេះ គេបានរកឃើញចំណុចអសកម្ម១ចំនួនដូចជា៖លូខ្លះពេញទៅដោយសំរាម,ភក់ល្បប់,ការតភ្ជាប់ប្រពន្ធ័លូរបស់ប្រជាពលរដ្ឋខ្លះមិនបានឆ្លងកាត់បច្ចេកទេស និងកន្លែងខ្លះយកបាវច្រកដី ឬខ្សាច់ទៅបិទមុខលូ ឬចាក់ បេតុងបិទអណ្តូងលូតែម្តង។ ជាមួយគ្នានោះដែររដ្ឋបាលរាជធានីភ្នំពេញបានដាក់ចេញយុទ្ធនាការស្តារលូនេះដើម្បីកាត់បន្ថយការលិចលង់ដោយជំនន់ទឹកភ្លៀងក្នុងរាជធានីភ្នំពេញដោយកំណត់ថា៖ប្រពន្ធ័លូប្រវែង៤៦០គីឡូម៉ែត្រក្នុងក្រុងត្រូវតែស្តារឲ្យបានរួចរាល់នៅមុនរដូវវស្សាមកដល់នាពេលខាងមុខ។
សូមបញ្ជាក់ថា៖ រដ្ឋបាលរាជធានីភ្នំពេញបានបើកយុទ្ធនាការស្តារប្រព័ន្ធលូក្នុងខណ្ឌទាំង៤ដោយក្នុងយុទ្ធការនោះមន្ទីរសាធារណការនិងដឹកជញ្ជូនរាជធានីភ្នំពេញបានចាប់ផ្ដើមមុនគេតាំងពីថ្ងៃទី៤ខែមករា ដោយស្ដារប្រព័ន្ធលូមេប្រើរថយន្តបូមស្ដារនិងបូមលាងប្រព័ន្ធលូនិងអណ្ដូងលូ នៅតាមមហាវិធនិងផ្លូវធំៗវែងដែលមានប្រព័ន្ធលូខ្នាធំឬមុខកាត់ធំ។ចំណែកខណ្ឌទាំង៤ត្រូវអនុវត្តយុទ្ធនាការស្ដារប្រព័ន្ធលូនេះចាប់ពីថ្ងៃទី៩ខែមករាមកដោយទទួលអនុវត្តការស្ដារប្រព័ន្ធលូខ្នាតតូចនិងនៅតាមផ្លូវតូចៗនិងផ្លូវខ្លីពេលស្ដារប្រើប្រាស់ឧបកណ៍កៅឡាក់កាយសំរាមនិងភក់ចេញ។ខណ្ឌចំនួន៣ក្នុងចំណោមខណ្ឌខណ្ឌទាំង៤បានដំណើរការស្ដារជាបន្តបន្ទាប់ហើយនៅតែខណ្ឌមួយគឺខណ្ឌចំកាមនចាប់ពីថ្ងៃទី៩មកដល់ថ្ងៃទី១៥មករាមិនទាន់បានអនុវត្តយុទ្ធនាការស្ដារប្រព័ន្ធលូនៅឡើយទេ៕
