ថ្មីៗនេះក្រុមអ្នកសារពត៌មានយើង ទទួលនូវពត៌មានមិនប្រក្រតីមួយចំនួនពាក់ព័ន្ធជាមួយលោក ថោង ខុន រដ្ឋមន្ត្រីក្រសួងទេសចរណ៍។
តាមពាក្យបណ្តឹងចុះថ្ងៃទី 15 ខែវិច្ឆិកា ឆ្នាំ2016 របស់ឈ្មោះmiyoskimakotoនិងឈ្មោះ satoruokadaជនជាតិជប៉ុន គោរពជូនឯកឧត្តមប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ ប្តឹងពី ឈ្មោះ NguyenThanhHaiភេទប្រុស ជនជាតិវៀតណាម ជានាយកគ្រប់គ្រងទូទៅក្រុមហ៊ុន IVCA consultants international Ltd. និងគូរកន ពីបទរំលោភកិច្ចសន្យា រំលោភទំនុក ចិត្ត និងខ្លែងបន្លំឯកសារសាធារណៈ និងប្រើប្រាស់លិខិតខ្លែង។ នៅក្នុងខ្លឹមសារនៃពាក្យបណ្តឹងនោះ គឺសរសេរថា កាលពីថ្ងៃទី27 ខែមិថុនា ឆ្នាំ2016 យើងខ្ញុំបានចុះកិច្ចសន្យាការងារជាមួយក្រុមហ៊ុនVICA consultants international ltd ដែលមានឈ្មោះ Nguyen thanhhaiជានាយកគ្រប់គ្រងទូទៅ។ ហើយយើងខ្ញុំឈ្មោះ niyoskimakotoនិងឈ្មោះ satoruOkataមានតួនាទីជាប្រធានក្រុមប្រឹក្សាអន្តរជាតិ នៅក្នុងក្រុមហ៊ុននេះ និងមានភារកិច្ចគ្រប់គ្រងដឹកនាំការងារបច្ចេកទេសរួមក្នុងគម្រោង កំណើនហេដ្ឋារចនាសម្ព័ន្ធ ទេសចរណ៍ប្រកបដោយបត្យាប័ននៃអនុតំបន់ទន្លេមេគង្គ។ គំរោង 46293/004 ហិញ្ញាប្បទានលេខ 3194-CAM (SF) ។ នៅក្នុងអំឡុងកិច្ចសន្យានេះ យើងខ្ញុំ(ដើមបណ្តឹងទាំងពីរខាងលើ) បានអនុវត្តការងារទៅតាមកិច្ចព្រមព្រៀងយ៉ាងទៀងទាត់ និងជួយជម្រុញគំរោងខាងលើនេះ អោយបានសម្រេចតាមគោលការណ៍របស់ម្ចាស់គម្រោង។ ស្រាប់តែនៅថ្ងៃទី11 ខែវិច្ឆិកា ឆ្នាំ2016 ក្រុមហ៊ុនVICA Consultants International Ltd ដែលមានឈ្មោះ Nguyen ThanhHaiបានចេញលិខិតបញ្ឈប់ការងារយើងខ្ញុំទាំងពីរ ដោយមិនបានពិភាក្សារកហេតុផលលើបញ្ហាបច្ចេកទេសហើយក៏មិនបានជូនដំណឹងជាមុនមកយើងខ្ញុំ ទាំងពីរនាក់ និងម្ចាស់គម្រោងរួមមានក្រសួងទេសចរណ៍ ក្រសួងសេដ្ឋកិច្ច និងហិរញ្ញវត្ថុ និងធនាគារអភិវឌ្ឍអាស៊ី (ADB) ។ នៅក្នុងពាក្យបណ្តឹងខាងលើបានទាមទារអោយឈ្មោះ Nguyen ThandHaiនិងគូរកន បង់ប្រាក់ខែមកខ្លួនចំនួនពីរខែ ដែលមានទឹកប្រាក់សរុប 85000$ (ប្រាំបីម៉ឺនប្រាំពាន់ដុល្លាសហរដ្ឋអាមេរិក)និងសងជម្ងឺ ចិត្តថ្លៃខាងបង់ពេលវេលាចំនួន 2000000$ (ពីរលានដុល្លាអាមេរិក) ។
នៅក្នុងរឿងខាងលើនេះ បើតាមលោក ស៊ុយ សុខុន មេធាវីការពារក្តីអោយឈ្មោះ Miyoshi Makoto និងឈ្មោះ Sitoru Okada បានប្រាប់អោយដឹងថា កូនក្តីរបស់លោកទាំងពីរជាមន្ត្រីបច្ចេកទេស មកពីប្រទេសជប៉ុន ដែលបានសិក្សាគម្រោងកំណើនហេដ្ឋារចនាសម្ព័ន្ធទេសចរណ៍ ប្រកបដោយបត្យាប័ន នៃអនុតំបន់ទន្លេមេគង្គរបស់ក្រសួងទេសចរណ៍ ក្រសួងសេដ្ឋកិច្ចហិរញ្ញវត្ថុ និងធនាគារអភិវឌ្ឍន៍អាស៊ី(ADB) ។ ប៉ុន្តែដោយគម្រោងមួយនេះត្រូវបានក្រសួងប្រគល់ទៅអោយក្រុមហ៊ុនVICA Consultant International Ltd របស់វៀតណាមជាអ្នកអនុវត្ត កូនក្តីរបស់លោកទាំងពីរក៏បានចុះកិច្ចសន្យាការងារជាមួយនាយកគ្រប់គ្រងក្រុមហ៊ុននោះទៅ ។ ហើយនៅក្នុងអំឡុងពេលកំពង់អនុវត្តការងារត្រូវបាននាយកគ្រប់គ្រង ក្រុមហ៊ុន បញ្ឈប់ការងារដោយមិនបានជូនដំណឹងជាមុន ហើយក៏មិនបានបើកប្រាក់ខែអោយកូនក្តី របស់លោកចំនួន ពីរខែ ចុងក្រោយផងដែរ ។ លោកមេធាវីបានបញ្ជាក់បន្ថែមថាចំពោះសំណុំរឿងនេះដែរកូនក្តី របស់លោកបានដាក់ពាក្យបណ្តឹងទៅលោក អ៊ុក ធីនី ជាមន្ត្រីទទួលគម្រោងកំណើនហេដ្ឋារចនាសម្ព័ន្ធ ទេសចរណ៍ប្រកបដោយបត្យាប័ន នៃតំបន់ទន្លេមេគង្គ និងឯកឧត្តមរដ្ឋមន្ត្រី ក្រសួងទេសចរណ៍ ក៏ដូចជាឯកឧត្តម ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាងមួយឆ្នាំមកហើយ ប៉ុន្តែពុំទទួលបានដំណោះស្រាយ ទើបលោកសម្រេចដាក់ពាក្យបណ្តឹងទៅតុលាការ ក្រែងទទួលបានយុត្តិធម៌។
ជុំវិញពត៌មានខាងលើ បើតាមប្រភពពីមន្ត្រីដែលបម្រើការងារនៅនាយកដ្ឋានលទ្ធកម្ម នៃក្រសួង ទេសចរណ៍បានលួចបង្ហើបប្រាប់ក្រុមអ្នកសារពត៌មាន យើងក្នុងលក្ខ័នមិនបច្ចេញឈ្មោះថា ចំពោះគម្រោង ខាងលើ បើមិនមានពាក់ព័ន្ធជាមួយ និងអំពើពុករលួយទេ គឺមិនត្រូវបានក្រុមហ៊ុនវៀតណាមជាអ្នកទទួល បានគម្រោងនេះយកមកអនុវត្តនោះ ព្រោះក្នុងការដេញថ្លៃ គឺមិនបានបង្ហាញជាសាធារណៈនោះទេ។ ម្យ៉ាងវិញទៀតបើ ឯកឧត្តម រដ្ឋមន្ត្រីមានគោលជំហរក្នុងការរកដំណោះស្រាយរឿង គឺត្រូវបានបញ្ចប់យូណាស់ មកហើយ តែនេះពាក្យបណ្តឹងប្តឹងជាងមួយឆ្នាំហើយ សួរថាក្រសួងដោះស្រាយដល់ហើយ? ហេងស៊យ ពាក្យបណ្តឹងចូលក្នុងកន្ត្រកសម្រាមបាត់ហើយមើលទៅ?។
ជុំវិញពត៌មានខាងលើនេះអ្នកសារពត៌មានយើងក៏បានព្យាយាមសុំការពន្យល់ពីលោក អ៊ុក នីដា និងឯកឧត្តម ថោង ខុន ផងដែរ ប៉ុន្តែមិនមានឱកាសបានជួបឡើយ ដូច្នេះមានតែចាំព្យាយាមលើកក្រោយៗទៀតចុះ ៕