មីយ៉ាន់ម៉ា ៖ នៅថ្ងៃពុធម្សិលមិញនេះក្រុមរដ្ឋអាជ្ញាមីយ៉ាន់ម៉ាបានចោទប្រកាន់ជាផ្លូវការទៅលើអ្នកកាសែត២រូបរបស់ទីភ្នាក់ងារព័ត៌មានរ៉យទ័រ (Reuters) ថា បានបំពានទៅលើច្បាប់របស់ប្រទេសមីយ៉ាន់ម៉ាដែលហាមឃាត់ការចែកចាយព័ត៌មានសម្ងាត់ ដែលនេះនឹងធ្វើឲ្យរឿងក្តីនេះបន្តទៅមុខទៀតបើទោះបីជាមានការថ្កោលទោសពីអន្តរជាតិយ៉ាងណាក៏ដោយ។
អ្នកកាសែត២នាក់នោះត្រូវបានចាប់ខ្លួនកាលពីថ្ងៃទី១២ ខែធ្នូ បន្ទាប់ពីប៉ូលិសមីយ៉ាន់ម៉ាបានចោទប្រកាន់ពួកគេថាបានបំពានច្បាប់សម័យអាណានិគមដោយបានទទួលក្រដាសព័ត៌មានសម្ងាត់ពីមន្ត្រីប៉ូលិស២នាក់ដែលធ្វើការនៅក្នុងរដ្ឋរ៉ាក់ខាញ ជាកន្លែងដែលកងកម្លាំងសន្តិសុខត្រូវបានចោទប្រកាន់ថាបានបំពានសិទ្ធិមនុស្សប្រឆាំងទៅលើពលរដ្ឋមូស្លីមរ៉ូហ៊ីងយ៉ាបណ្តាលឲ្យមនុស្សរាប់ម៉ឺននាក់រត់ភៀសខ្លួនទៅកាន់ប្រទេសបង់ក្លាដែស។
នៅពេលដែលអ្នកកាសែតទាំង២ស្ថិតនៅលើរថយន្តរបស់ពន្ធនាគារបន្ទាប់ពីចាកចេញពីតុលាការ, អ្នកកាសែតម្នាក់បានស្រែកថា រដ្ឋាភិបាលមីយ៉ាន់ម៉ាកំពុងតែចោទប្រកាន់ពួកគេដូច្នេះគឺដើម្បីកុំឲ្យពួកគេរកឃើញការពិត។ ពួកគេទាំង២នាក់ត្រូវប្រឈមមុខនឹងការជាប់ពន្ធនាគារយៈពេល១៤ឆ្នាំប្រសិនបើត្រូវបានតុលាការរកឃើញថាមានកំហុសដូចការចោទប្រកាន់មែន។
មេធាវីរបស់ជនជាប់ចោទទាំង២បាននិយាយថា លោកក៏បានស្នើឲ្យដោះលែងពួកគេឲ្យនៅក្រៅឃុំជាបន្ទាន់ផងដែរ ប៉ុន្តែចៅក្រមបាននិយាយថាលោកនឹងត្រួតពិនិត្យមើលសាជាថ្មីចំពោះសំណើនេះ ហើយនឹងសម្រេចនៅសវនការលើកក្រោយដែលនឹងត្រូវធ្វើឡើងនៅថ្ងៃទី២៣ ខែមករា។
ប្រព័ន្ធផ្សព្វផ្សាយ និងក្រុមសិទ្ធិមនុស្សបានរិះគន់រដ្ឋាភិបាលស៊ីវិលរបស់ប្រទេសមីយ៉ាន់ម៉ាដែលដឹកនាំដោយលោកស្រី អ៊ុងសាន ស៊ូជី (Aung San Suu Kyi) ដែលនៅតែបន្តប្រើប្រាស់ច្បាប់សម័យអាណានិគមដើម្បីគំរាមកំហែង និងចាប់អ្នកកាសែតដាក់គុក៕
