ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជា នាយករដ្ឋមន្ដ្រីនៃ ព្រះរាជាណាចក្រកម្ពុជា បានថ្លែងក្នុងពិធីមីទ្ទិញរម្លឹកខួបអនុស្សាវរីយ៍លើក ទី៣៩ នៃទិវាជ័យជម្នះ ៧ មករា (៧ មករា ១៩៧៩-៧ មករា ២០១៨) នាព្រឹកថ្ងៃអាទិត្យ ៦រោច ខែបុស្ស ឆ្នាំរកា ព.ស ២៥៦១ ត្រូវនឹងថ្ងៃទី០៧ ខែមករា ឆ្នាំ២០១៨ នៅមជ្ឍមណ្ឌលកោះពេជ្រថា៖ ៧មករា ឆ្នាំ១៩៧៩ គឺជាថ្ងៃជ័យជម្នះជាប្រវត្តិសាស្ត្ររបស់ប្រជាជនកម្ពុជា ដែលបានវាយផ្តួលរំលំរបបប្រល័យពូជសាសន៍ ប៉ុល ពត បញ្ចប់សម័យកាលដ៏ខ្មៅងងឹតបំផុតនៅកម្ពុជា ដែល បានកាប់សម្លាប់ និងធ្វើឱ្យប្រជាពល រដ្ឋខ្មែរស្លាប់ជិត៣លាននាក់។ សម្ដេចតេជោបានបញ្ជាក់ថា ៧ មករា ១៩៧៩ គឺជាថ្ងៃ បើកឡើងវិញនូវទំព័រសករាជថ្មីនៃឯករាជ្យ សេរីភាព ប្រជាធិបតេយ្យ និងវឌ្ឍនភាពសង្គម។
បច្ចុប្បន្នកម្ពុជាបានរើខ្លួនចេញរួចផុតពីប្រទេសក្រីក្រ ប្រទេសគ្មានអ្វីសោះមកជា ប្រទេសមានចំណូលមធ្យមកម្រិតទាប ព្រមទាំងកំពុងប្រឹងប្រែង អភិវឌ្ឍន៍ឱ្យក្លាយជាប្រទេសមានចំណូល មធ្យមកម្រិតខ្ពស់នៅឆ្នាំ២០៣០ និងក្លាយជាប្រទេស មានចំណូលខ្ពស់នៅឆ្នាំ២០៥០។ ទន្ទឹមនេះកម្ពុជា កំពុងប្រែក្លាយពីប្រទេសដែលពឹងផ្អែកលើវិស័យកសិកម្មទាំងស្រុងទៅជាប្រទេសដែលពឹងផ្អែកទៅលើ វិស័យឧស្សាហកម្ម និងសេវាកម្ម។
សម្ដេចបានអះអាងថា នេះជាកត្តាធំៗនៃជ័យជម្នះ និងជាមេរៀនពិសោធន៍ជាប្រវត្តិ សាស្ត្រដែលទាំងអស់គ្នា គប្បីយល់ដឹងឱ្យច្បាស់ និងចងចាំជារៀងដរាប ដើម្បីកុំឱ្យប្រវត្តិ សាស្ត្រដ៏ជូរចត់ អាចកើតឡើងជាថ្មីវិញ បាននៅលើមាតុភូមិដ៏កំសត់របស់យើង។ ដូច្នេះយើង ត្រូវរួមគ្នាការពារដាច់ខាតឯករាជ្យ អធិបតេយ្យ និងបូរណភាពទឹកដីនៃព្រះរាជាណាចក្រកម្ពុជា ការពាររដ្ឋធម្មនុញ្ញ របបរាជានិយម និងរាល់សមិទ្ធផលរបស់សង្គមជាតិ ជាពិសេសថែរក្សាសន្តិភាព ស្ថិរភាពនយោបាយ សន្តិសុខនិងសណ្តាប់ធ្នាប់សាធារណៈ ឱ្យបានរឹងមាំ ដែលជាកត្តាសារវ័ន្ត ដើម្បីធានាដល់ដំណើរការរីកចម្រើន នៃលទ្ធិប្រជាធិបតេយ្យ និងសិទ្ធិមនុស្ស ធានាការអភិវឌ្ឍប្រកបដោយ ចីរភាព និងសមធម៌ និងធានានូវជីវភាពរស់នៅដ៏សុខសាន្តរបស់ប្រជាជន។
សម្តេចតេជោនាយករដ្ឋមន្ដ្រីបានបង្ហាញនូវស្មារតីចងចាំជានិច្ចនូវគុណូបក្ការៈដ៏ឧត្តង្គឧត្តមរបស់វីរកម្មាភិបាល យុទ្ធជន យុទ្ធនារី នៃរណសិរ្សសាមគ្គីសង្គ្រោះជាតិកម្ពុជា និងវីរកងទ័ពស្ម័គ្រចិត្តវៀតណាម ដែលបានធ្វើការ លះបង់យ៉ាងធំធេងក្នុងការប្រយុទ្ធ ដើម្បីផ្តួលរំលំរបបប្រល័យពូជសាសន៍ ប៉ុល ពត និងការពារការរស់ឡើង វិញរបស់កម្ពុជា។
សម្ដេចតេជោបានបន្ថែមទៀតថា គណបក្សប្រជាជនកម្ពុជាបង្ហាញនូវជំនឿដ៏មុតមាំថា បងប្អូនជនរួមជាតិនៅគ្រប់ទិសទីនូវតែបន្តគាំទ្រចំពោះការដឹកនាំ របស់គណបក្សប្រជាជន កម្ពុជា ដើម្បីសម្រេចទាំងស្រុងនូវបំណងប្រាថ្នារបស់ជនរួមជាតិគឺកសាងប្រទេសកម្ពុជាមួយឯករាជ្យ សន្តិភាព សេរីភាព ប្រជាធិបតេយ្យ អព្យាក្រឹត និងវឌ្ឍនភាពសង្គម ។
មីទ្ទីងអបអរទិវាថ្ងៃរំដោះ៧មករាខួបឆ្នាំទី៣៩បានប្រារពឡើងក្រោអធិបតីភាពសម្ដេចអគ្គមហាពញាចក្រី ហេង សំរិន និងលោកជំទាវ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិ ព្រឹទ្ធបណ្ឌិត ប៊ុន រ៉ានី ហ៊ុន សែន ដោយមាន ការចូលរួមផងដែរ ថ្នាក់ដឹកនាំ មន្ត្រីរាជការ ស្ថាប័នតាមក្រសួងនានា ភ្ញៀវជាតិ អន្តរជាតិ មន្ត្រីអង្គទូត សិស្សានុសិស្ស និងប្រជាពលរដ្ឋប្រមាណជាង ៥០.០០០នាក់។
