ក្រចេះ៖ នៅល្ងាចថ្ងៃទី០៤ ខែមករា ឆ្នាំ២០១៨នេះ ឯកឧត្តម ស ចំរុង អភិបាលខេត្ត លោកប្រធានមន្ទីរសុខាភិបាលខេត្ត រួមនឹងមន្ត្រីបេឡាជាតិរបបសន្តិសុខសង្គម បានយកថវិការរបស់រាជរដ្ឋាភិបាល ទៅផ្តល់ជូនកម្មការនីដែលបានសំរាលកូនចូលក្នុងឆ្នាំ២០១៨នេះ ចំនួន២នាក់ ដែលក្នុងម្នាក់ៗទទួលបានថវិការចំនួន៤០ម៉ឺនរៀល។
ឯកឧត្តម ស ចំរុង បានមានប្រសាសន៍ថា៖ គិតចាប់ពីម៉ោង០០ឈានចូលថ្ងៃទី០១ ខែមករា ឆ្នាំ២០១៨ មកដល់ម៉ោង០៥ល្ងាចថ្ងៃទី០៤ ខែមករា ឆ្នាំ២០១៨ នៅក្នុងខេត្តក្រចេះ មានកម្មការនីចំនួន២នាក់បានសំរាលកូននៅក្នុងមន្ទីពេទ្យបង្អែកខេត្តក្រចេះ ហើយពួកគាត់ទាំង២នាក់ បានទទួលរួចហើយ នូវប្រាក់ឧបត្ថម្ភផ្នែកសុខភាពពីរាជរដ្ឋាភិបាលកម្ពុជាក្នុងម្នាក់ៗចំនួន៤០ម៉ឺនរៀល តាមរយៈបេឡាជាតិរបបសន្តិសុខសង្គមប្រចាំខេត្តក្រចេះ ដែលថវិការទាំងនោះបានផ្តល់ជូនដល់ដៃពួកគាត់ទាំង២នាក់ហើយ។ លើសពីនេះ ថ្មីៗកន្លងមកនេះដែរ មន្ត្រីអង្គភាពសុខាភិបាលក្នុងខេត្តក្រចេះទាំងអស់ ក៍ត្រូវបានអញ្ជើញគាត់មកប្រជុំផ្សព្វផ្សាយអោយបានដឹងច្បាស់ពីសេវានេះផងដែរ។
ដោយឡែក នៅក្នុងមន្ទីរពេទ្យបង្អែកខេត្តក្រចេះក្នុងថ្ងៃនេះ ក្រោយពីទទួលបានប្រាក់ឧបត្ថមគាំទ្រសុខភាពរបស់រាជរដ្ឋាភិបាល តាមរយៈ ប ស ស ហើយនោះ កម្មការនីទាំងពីរនាក់ដែលទើបសំរាលកូនក្នុងឆ្នាំ២០១៨នេះ បានសំដែងទឹកចិត្តរំភើពខ្លាំង និងអរគុណដល់រាជរដ្ឋាភិបាល ដែលបានយកចិត្តទុកដាក់ពីសុខទុក្ខកម្មករកម្មការនីទាំងអស់។(មានសម្ភាសកម្មការនី២នាក់)
នេះជាការលើកកម្ពស់ការផ្តល់សេវាសុខាភិបាល ប្រកបដោយគុណភាពអោយកាន់តែប្រសើរឡើង ជូនដល់ប្រជាពលរដ្ឋ នៅតាមមណ្ឌលសុខភាព និងមន្ទីរពេទ្យបង្អែក ក្នុងការផ្តល់សេវាថែទាំ និងព្យាបាលជម្ងឺប្រកបដោយគុណភាព ស្របតាមគោលការណ៍គោលនយោបាយអភិវឌ្ឍន៍ និងកំណែរទំរង់ប្រព័ន្ធថែទាំសុខភាពសង្គម ក្នុងក្របខ័ណ្ឌគោលនយោបាយជាតិគាំពារសង្គម២០១៦ដល់២០២៥ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕ ដោយ ៖ កិះ ខន
