ភ្នំពេញ ៖ លោកស្រី ម៉ែន សំអន បានបញ្ជាក់ថា៖តាមរយៈ ពិធីសំពះគ្រូ និងការតាំងពិព័រណ៏គ្រឿងអលង្ការខ្មែរបុរាណ រយៈពេល១ខែ ពិព័រណ៍នេះ តាំងបង្ហាញ គ្រឿងអលង្ការ មាសសម្រាប់បំពាក់ ព្រះបដិមាសម័យអង្គរ ដែលព្រះ រាជាណាចក្រកម្ពុជាទើបធ្វើមាតុភូមិនិវត្តន៍ពីទីក្រុងឡុងដ៍ ចក្រភពអង់គ្លេស កាលពីថ្ងៃទី២ ធ្នូ ឆ្នាំ២០១៧នេះ វប្បធម៏កម្ពុជាកាន់តែល្បីរន្ទឺ នៅឆាកអន្ដរជាតិ ។លោកស្រី ម៉ែន សំអន ឧបនាយករដ្ឋមន្ដ្រី រដ្ឋមន្ដ្រីក្រសួងទំនាក់ទំនងជាមួយ រដ្ឋសភា ព្រឹទ្ធសភា និងអធិការកិច្ច និងតំណាងសម្ដេចអគ្គម ហាសេនាបតីតេជោហ៊ុន សែន បានបញ្ជាក់បែបនេះ ក្នុងឱកាសពិធីសំពះគ្រូ និង ការតាំងពិព័រណ៏គ្រឿងអលង្ការខ្មែរបុរាណ ជាច្រើនមុខ នៅសារមន្ទីរជាតិ កាលពីថ្ងៃព្រហស្បតិ៏ ៣រោច ខែបុស្ស នព្វស័ក ព.ស ២៥៦១ ត្រូវនិងថ្ងៃទី ៤ មករា ឆ្នាំ២០១៨ ។
លោកស្រី ម៉ែន សំអន បានបញ្ជាក់ថា៖ ពិព័រណ៍នេះ បានបង្ហាញឲ្យឃើញនូវវត្ថុពិចិត្រៗ ជាគ្រឿងអលង្ការ និងគ្រឿងលំអ ធ្វើពីមាស និងប្រាក់ ដែលជាស្នាដៃសិល្បៈខ្មែរ បុរាណដ៏វិចិត្រ និងគំនិតឆ្នៃប្រឌិតនៃគ្រូ និង សិល្បករខ្មែរពីជំនាន់មួយទៅជំនាន់មួយ។ ខ្ញុំជឿជាក់ថាឯកឧត្ដម អស់ លោក លោកស្រី នាងកញ្ញា ក្មួយៗសិស្ស និស្សិត ប្រជា ពលរដ្ឋ នឹងរីករាយ និងទទួលបានចំណេះដឹង បន្ថែមពីពិព័រណ៍នេះ។ ពិព័រណ៍នេះក៏តាំងបង្ហាញ គ្រឿងអលង្ការមាស សម្រាប់បំពាក់ ព្រះបដិមាសម័យអង្គរ ដែលព្រះ រាជាណាចក្រកម្ពុជាទើបធ្វើមាតុភូមិនិវត្តន៍ពីទីក្រុងឡុងដ៍ ចក្រភពអង់គ្លេសកាលពីថ្ងៃទី២ ខែធ្នូ ឆ្នាំ២០១៧នេះ។ ពិព័រណ៏នេះ គឺមានគោលបំណងដ៏ធំមួយដែល ក្រសួងវប្បធម៏ និងវិចិត្រសិល្បៈ មានមោទនភាព បានវត្ថុដែលមានតម្លៃមិនអាចកាត់ផ្លៃ របស់ខ្មែរ ពីបរទេស មកដាក់តាំង ឲ្យបងប្អូនប្រជាពលរដ្ឋ បានទស្សនា នៅពេលនេះ ដូចជាគ្រឿង អលង្ការដ៏កម្រ និងប្រណិតធ្វើអំពីមាស ដែលដូនតា ខ្មែរ បានរចនា ដើម្បីពាក់លំអដល់ព្រះបដិមាព្រហ្មញ្ញសាសនា និងពុទ្ធសាសនា។ វត្ថុបុរាណទាំងនេះពិតជាគូសបញ្ជាក់ពីអរី យធម៌ដ៏រុងរឿង និងយូរអង្វែងរបស់កម្ពុជា ដែលធ្លាប់ជាអតីតអធិរាជាណាចក្រមួយនៅអាស៊ី។
លោកស្រី ភឿង សកុណា រដ្ឋមន្ដ្រីកនរសួងវប្បធម៌និងវិចិត្រសិល្បៈ បានបញ្ជាក់ថា៖ នេះជាលើកទី១ហើយ ដែលកម្ពុជា មានមោទនភាព ទទួល វត្ថុដែលមានតម្លៃមិនអាចកាត់ផ្លៃបានពីបរទេស ហើយបានមកដាក់តាំងបង្ហាញឲ្យបងប្អូនប្រជាពលរដ្ឋកម្ពុជាបានយល់ដឹង និងស្វែងយល់កាន់តែច្បាស់ ពីតម្លៃវប្បធម៏របស់ខ្មែរនាសម័យបុរាណ។
លោកស្រីក៏បានស្នើដល់អាជ្ញាធរពាក់ព័ន្ធទាំងអស់ សូមមេត្តាចូលរួមថែ រក្សា និងការពារវត្ថុបុរាណដ៏មានតម្លៃដែលតាំងនៅទីនេះ ក៏ដូចជាវត្ថុបុរាណជាតិ ទាំងអស់ឱ្យបានគង់វង្ស ព្រោះវត្ថុទាំងនេះ សុទ្ធតែមានប្រវត្តិដ៏យូរលង់ និងមានបារមីសក្តិសិទ្ធជួយប្រោះព្រំព្រះរាជាណាចក្រកម្ពុជាយើង ឱ្យបាន សុខក្សេមក្សាន្ត ត្រជាក់ត្រជុំ និងមានការអភិវឌន្ឍន៍តរៀងទៅ៕
