រតនគិរី ៖ ក្មេងស្រីជាអនីតិជនជនជាតិភាគតិច២នាក់ ត្រូវមន្ត្រីនគរបាលម្នាក់លួងលោមយកទៅផ្ទះសំណាក់បានសម្រេចកាលពីពីថ្ងៃទី២០ ខែធ្នូ ឆ្នាំ២០១៧ តែក្រោយពេលបែកការណ៍សម្រេចសងជាង១ម៉ឺនដុល្លារបិទរឿង។ក្មេងស្រីទាំង២នាក់ដែលត្រូវគេលួងលោមទៅផ្ទះសំណាក់នោះរួមមានទី១- ឈ្មោះ ព ច ន អាយុ ១៣ឆ្នាំ ជនជាតិច្រាយ និងទី២- ឈ្មោះ សល់ លីន អាយុ១២ឆ្នាំ ជនជាតិច្រាយដូចគ្នា ក្មេងស្រីទាំង២ មានលំនៅភូមិឡំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី។ ចំណែកមន្ត្រីនគរបាល រំលោភនោះ មានឈ្មោះ មាស សូភ័ណ្ណ មានលំនៅភូមិ ឃុំ ជាមួយក្មេងស្រីខាងលើ ជាមន្ត្រីនគរបាលអធិការស្រុកអូរយ៉ាដាវ។
ប្រភពពីក្មេងស្រីរង្គ្រោះទាំង២នាក់ខាងលើាបនឲ្យដឹងថា ពួកនាងតែងតែទៅផ្ទះលោក មាស សូភ័ណ្ណ ដែលនៅជិតគ្នានិងជួយធ្វើការងារផ្ទះស្ទើររៀងរាល់ថ្ងៃ ដោយទទួលបានប្រាក់ក្នុង១ខែ៥ម៉ឺនរៀល។នៅថ្ងៃកើតហេតុនោះ លោក មាស សូភ័ណ្ណ បានលួងលោមនាងថា ទៅខេត្ត(ក្រុងបានលុង)ជាមួយគ្នា លោកនឹងទិញខ្សែកឲ្យម្នាក់មួយខ្សែ និងទូរស័ព្ទដៃឲ្យម្នាក់មួយ។ ក្រោយពីបានដឹកនាងទៅដល់ក្រុងបានលុងលោក ភ័ណ្ណ ក៏នាំពួកនាងចូលផ្ទះសំណាក់ ក៏ប៉ន្តែនាងមិនស្គាល់យីហោផ្ទះសំណាក់នោះទេ។
នារីរងគ្រោះបានបញ្ជាក់ទៀតថា ក្រោយពីរំលោភបានសម្រេចទាំង២នាក់ហើយ លោក មាស សូភ័ណ្ណ បាននាំនាងទៅផ្សារ ទិញទូរស័ព្ទដៃឲ្យម្នាក់មួយ លុះជិះឡានត្រឡប់មកវិញដល់ភូមិប៉ក់តូច ឃុំប៉ក់ញ៉ៃ ស្រុកអូរយ៉ាដាវ មិនទាន់ដល់ភូមិឡំផង លោក ភ័ណ្ណ នេះទំលាក់ពួកនាងចោល ហើយដកយកទូរស័ព្ទដែលទិញឲ្យម្នាក់មួយនោះ យកវិញទាំងអស់។
លោក ពូយ ស្រាក់ ជាឪពុកក្មេងស្រីឈ្មោះ ពូយ ចន្ទ្រា បានរាបរាប់ថា ដោយបាត់កូនដល់យប់ មិនឃើញកូនមកផ្ទះ ក៏ផ្អើលឆោឡោនាំគ្នាដើរកកូនស្រី រហូតដល់ម៉ោង១០យប់ថ្ងៃដដែល ទើបរកឃើញក្មេងស្រីទាំង២នាក់នៅភូមិប៉ក់តូច ដែលនៅចម្ងាយប្រមាណជាជាង ២គីឡូម៉ែត្រ ពីភូមិឡំ។ ក្រោយពីបានសាកសួរកូនស្រីអំពីដំណើររឿងរួច គាត់ក៏បានដាក់ពាក្យបណ្ដឹង ទៅភូមិ ឃុំ និងប៉ុស្តិ៍រដ្ឋបាល ឃុំប៉ក់ធំ ក៏ប៉ុន្តែសមត្ថកិច្ចមិនបានចាប់ខ្លួនជនប្រព្រឹទ្ធទេ។
ខាងភូមិ ឃុំ និងប៉ុស្តិ៍ បានឲ្យក្រុមគ្រួសារគាត់ធ្វើការសម្របសម្រួលគ្នាជាមួយប្រពន្ធលោក មាស សូភ័ណ្ណ ជាជនល្មើស ដោយពួកគាត់ទាំង២គ្រួសារជាអាព្យាបាលក្មេងទាំងពី ទាមទារក្នុងម្នាក់៦ពាន់ដុល្លា ស្មើនិង១ម៉ឺន២ពាន់ដុល្លា។ ក្រោយមក នៅថ្ងៃទី០៣ ខែមករា ឆ្នាំ២០១៨ ពួកគាត់ទាំងពីគ្រួសារ បានទទួលប្រាក់សំណងចំនួន៦ពាន់ដុល្លា ក្នុងក្មេងស្រីម្នាក់គ្រប់ចំនួនហើយ។
លោកស្រីឧត្ដមសេនីយ៍ត្រី កែវ ដាវី ស្នងការរងខេត្តរតនគិរី ទទួលបន្ទុកផ្នែកជួញដូរ និងការពារអនិតិជន(យេនឌ័រ)បានឲ្យកាសែតដឹងថា ករណីខាងលើនេះ បើទោះជាមានការសម្របសម្រួលគ្នាយ៉ាងណាក៏ដោយ ជនប្រព្រឹទ្ធខុសច្បាប់ទៅលើក្មេងស្រី ដែលមិនគ្រប់អាយុ (អនិតិជន)ត្រូវតែមានទោស លោកស្រីនឹងស្រាវជ្រាវ កសាងសំណុំរឿងនេះបញ្ជូនទៅតុលាការ។
ក្រោយមក លោកស្រីបានប្រាប់ថា ករណីលួងរំលោភលើក្មេងស្រី ២នាក់ខាងលើ បានបញ្ជូនសំណុំរៀងទៅតុលាការហើយ គឺផុតពីដៃលោកស្រីហើយ?!។ លោកស្រីបានបញ្ជាក់ថា៖ ករណីខាងលើនេះ ឃើញថាមិនពិតដូចការចោទប្រកាន់ទេ គ្រាន់តែអាណាព្យាបាល បានបាត់កូនហើយធ្វើការចោទប្រកាន់តែប៉ុណ្ណោះ(ស៊ិក)។
ករណីខាងលើនេះ ត្រូវបានមជ្ឈដ្ឋានទូទៅងឿងឆ្ងល់ថា ហាក់ដូចជាមានអាថកំបាំង បន្ទាប់ពីជនសង្ស័យបានបង់ថ្លៃខូចខាតឲ្យជនរងគ្រោះរួចហើយ បែរជាសមត្ថកិច្ចថារឿងមិនពិតទៅវិញ?។ ចំណែកលោក មាស សូភ័ណ្ណ មន្ត្រីនគរបាលស្រុកអូរយ៉ាដាវ អ្នកសារព័ត៌មានយើង មិនអាចសុំការបំភ្លឺណាមួយបានទេ ។
