រាជធានីភ្នំពេញ ៖ លុយរាប់ម៉ឺនដុល្លាររួមជាមួយ ឯកសារសំខាន់ៗមួយចំនួនទៀត ដែលទុកនៅក្នុង បន្ទប់អគ្គនាយករោងចក្រកាត់ដេរ «អ៊ីហ្វា ហ្គាមិន» ត្រូវក្រុមចោរមួយក្រុមចូលលួច គ្មានសល់ កាលពីថ្ងៃទី២៨ ខែធ្នូ ឆ្នាំ២០១៧ នៅក្នុងរោងចក្រកាត់ដេរយីហោ «អ៊ីហ្វាហ្គាមិន» ស្ថិតនៅក្នុងភូមិ ត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែ នជ័យ។
តាមការរៀបរាប់ពី ស្ត្រីឈ្មោះ អ៊ូ ចាន់ដាវី ហៅមីង អាយុ៣៩ឆ្នាំ មានស្រុកកំណើត នៅក្នុងស្រុកអង្គរជ័យ ខេត្តកំពត និងស្នាក់នៅក្នុងភូមិ ក្បាលដំរី សង្កាត់កាកាប២ ខណ្ឌពោធិ៍សែនជ័យ បាននិយាយថា ទូរដែកខាងលើនោះ មានដាក់លុយរបស់ក្រុម ហ៊ុនរាប់ម៉ឺនដុល្លារ ក្នុងនោះក៏មានលុយផ្ទាល់ខ្លួនរបស់លោកអគ្គនាយកក្រុមហ៊ុន ចំនួន៩ពាន់ដុល្លារផងដែរ ក្រៅពីនេះនៅមានឯកសារសំខាន់ៗ មានដូចជាឯកសាររោ ងចក្រឯកសារធនាគារជាដើម ត្រូវបានចោរលួចយកទៅបាត់អស់។
ប្រភពដដែលបន្តថា នៅមុនពេលកើតហេតុទូកដែកនោះ ត្រូវបានទុកនៅក្នុងបន្ទប់ របស់លោកអគ្គនាយករោងចក្រ ហើយនៅវេលាយប់ថ្ងៃទី២៧ ខែធ្នូ ឆ្នាំ២០១៧ ក៏ដូចជានៅយប់កន្លងមកដែរ នៅក្នុងរោងចក្រ មានក្រុមសន្តិសុខយាមចំនួន៤នាក់ ដែលសន្តិសុខនោះ ត្រូវបានក្រុមហ៊ុនជួលពីក្រុមហ៊ុនសន្តិសុខយីហោ ឆេង ជែម (CJS)។
ចំណែកកម្មករធ្វើការថែមម៉ោង ដល់វេលាម៉ោង៨ និង៣០នាទីយប់ ទើបចេញហើយខាងបុគ្គលិកគ្រប់ ផ្នែកក៏បានចេញទៅផ្ទះ សម្រាករៀងៗខ្លួនដែរ មិនមានអ្នកស្នាក់នៅក្នុងនោះក្រៅពី ក្រុមសន្តិសុខទាំង៤នាក់នោះឡើយ ហើយក៏មិន បានដឹងថាក្រុមចោរ ចូលទៅធ្វើសកម្មភាពតាំងពីពេលណាដែរ។
នគរបាលមូលដ្ឋាន បានឲ្យដឹងថា ក្រុមចោរបានកាត់លួសបន្លាររបងរោងចក្រផ្នែក ខាងក្រោយ ចូលទៅធ្វើសកម្មភាព ហើយបើតាមការឆែកមើល កាមេរ៉ាសុវត្ថិភាព គឺក្រុមចោរមួយក្រុម មាន គ្នាច្រើននាក់ពាក់អាវ មាន មួកឃ្លុមបិទមុខថែមទៀត និងបានចូលទៅធ្វើសកម្ម ភាពនៅវេលាម៉ោងប្រហែល០២និង៤២នាទី ទាបភ្លឺឈានចូលថ្ងៃទី២៨ ខែធ្នូ ហើយក្រុមចោរ បានប្រើម៉ូទ័រ កាត់ទម្លុះទម្លាយទូដែក នោះបើកយកលុយនិងឯកសារនៅក្នុងនោះ បន្ទាប់មកបាននាំ គ្នាគេចខ្លួនបាត់អស់។
បច្ចុប្បនុ្នកម្លាំងជំនាញរបស់អធិការខណ្ឌសហការជាមួយកម្លាំងស្នងការដ្ឋាននគរបាលរាជធានីភ្នំពេញ កំពុងកំណត់មុខសញ្ញា និងស្រាវជ្រាវចាប់ជនល្មើសមកផ្តន្ទាទោសតាមផ្លូវច្បាប់ ៕
