កំពង់ធំ៖ប្រជានេសាទលក្ខណៈគ្រួសាររស់នៅលើផ្ទៃទឹក បឹងទន្លេសាបខេត្តកំពង់ធំ មិនសប្បាយចិត្តចំពោះលោក ប៉ែន វណ្ណរិទ្ធ នាយខណ្ឌរដ្ឋបាលជលផល កំពង់ធំ និងលោក យ៉ាន់ វិសាក់ ហៅ សែ នាយផ្នែកជលផលផាត់សណ្តាយដែលបើកដៃឃុបឃិតជាមួយឈ្មួញទុច្ចរិតយកឧបករណ៍ទំនើបៗប្រព្រឹត្តល្មើសច្បាប់នេសាទក្នុងប្រយោជន៍ជាថ្នូរ ប្រមូលលុយរាប់សិបម៉ឺនដុល្លា ។
ប្រភពដដែលអះអាងបន្តថា បទល្មើសនេសាទគ្រប់ប្រភេទ ទាំងក្នុងរដូវបិទនេសាទ និងរដូវបើកនេសាទ ដោយមានឈ្មោះ វៀង យ៉ាំងឡាំង ហៅ ជា ឡាំង ជនជាតិវៀតណាមនៅបាឡត ក្នុងការប្រមូលលុយពីអ្នកប្រើឧបករណ៍ឆ្នុកប្រើភ្លើង ។
ក្នុងនោះកំណត់ក្នុងមួយឆ្នុកភ្លើងអំពូលចំនួន១លាន២សែនរៀលដែលចំនួននេះសរុបមានដល់ទៅ១០០០អំពូលភ្លើងឆ្នុកបើ គិតចាប់ពីចំណុចព្រំប្រទល់ភូមិមាត់ខ្លា ឃំុអន្លុងសំណរ ស្រុកជីក្រែង ខេត្តសៀមរាប មកដល់ព្រំប្រទល់ ខេត្តកំពង់ឆ្នាំង ។តើគេយកតៅណា?ដោយសារតែបទល្មើសគ្មានការបង្ក្រាបប្រជាពលរដ្ឋជឿថាលោកប៉ែន វណ្ណរិទ្ធ និងកូនចៅជំនិត លោក យ៉ាន់ វិសាក់ ហៅ សែ អាចប្រមូលលុយរបៀបពុករលួយបានដល់ខ្ទង់រាប់រយលានរៀលគឺរាប់សិបម៉ឺនដុល្លា ចែកគ្នាចូលហោប៉ៅធ្វើមានបានយ៉ាងរំភើយ។
មន្ត្រីតូចចាចដែលមិនបានទទួលផលម្នាក់នៅឃុំផាត់សណ្តាយ បានបង្ហើបឲ្យដឹងថា៖ បច្ចុប្បន្នក្រៅពីប្រមូលលុយឧបករណ៍ភ្លើងឆ្នុករាប់សិបម៉ឺនដុល្លានោះមក គេសង្កេតឃើញថា លោក ប៉ែន វណ្ណរិទ្ធ និងលោក យ៉ាន់ វិសាក់ ហៅ សែ បានបើកដៃអោយកើតមានបទល្មើសនេសាទកើនឡើងខាប់ទឹកខាប់ដី នៅលើផ្ទៃបឹងទន្លេសាប ខេត្តកំពង់ធំ មានដូចជាឧបករណ៍នេសាទយ៉ាំងកាវជាច្រើនវង់ ។
ក្នុងមួយវង់មេការក្រុមឈ្មួញត្រូវចំណាយលុយយកបង់ជូនលោកម្ចាស់មន្ត្រីជំនាញខាងលើចាប់ពី៣លានរៀល ទៅ៥លានរៀល និងទូកនេសាទឧបករណ៍ កាវ លៀស ក្នុងមួយគ្រឿងចាប់ពី៤០ ម៉ឺនរៀលឡើងទៅ សំរាប់តែលោកយ៉ាន់ វិសាក់ ហៅសែ នាយផ្នែកជលផលផាត់សណ្តាយមិនរាប់បញ្ជូលការឲ្យទៅមន្ត្រីផ្សេងៗឡើយ ហើយទូកអូសលៀសនេះប្រសេចប្រសាចពេញផ្ទៃទន្លេតែម្តងមានចំនួនរាប់រយទូក។
ក្នុងនោះប្រសិនបើមានទូកលៀសណាមិនទៅចុះឈ្មោះក្នុងបញ្ជីរតាមការកំណត់របស់លោកនាយផ្នែកជលផលឈ្មោះ សែនោះទេ បើគេចាប់បានត្រូវបង់ពិន័យជាប្រាប់លើបូបេមាត់ជំនាញចំនួន ពី១លាន ៥០ម៉ឺនរៀលទៅ២លានរៀល ទើបប្រគល់ទូកទៅឲ្យម្ចាស់វិញដើម្បីធ្វើការនេសាទបន្ត ជាថ្នូរនិងការដោះលែង មិនចាប់បង្ក្រាបតទៅទៀត។