បន្ទាប់ពីទទួលដំណឹងថា តុលាការកោះហៅស្វាមីរបស់ខ្លួនឱ្យចូលទៅបំភ្លឺនៅសាលាដំបូងរាជធានីភ្នំពេញ នៅព្រឹកថ្ងៃ ទី ១៦ ខែធ្នូ ឆ្នាំ២០១៥ លោកស្រី ឆឹង ស្រី ត្រូវជាភរិយារបស់លោក សួន គឹមសុង ក៏បានទទួលមរណៈភាពនៅល្ងាចថ្ងៃទី ១៣ ខែធ្នូ ឆ្នាំ២០១៥ មុនពេលប្តីឡើងតុលាការ ៣ថ្ងៃ ។
តាមប្រសាសន៍របស់លោក សួន គឹមសុង បានរៀបរាប់ប្រាប់ក្រុមអ្នកយកព័ត៌មាននាឱកាសកំពុងបូជាសពភរិយា របស់លោក គឺលោកស្រី ឆឹង ស្រី នាព្រឹកថ្ងៃទី ១៥ ខែធ្នូ ឆ្នាំ២០១៥ នៅក្នុងបរិវេណវត្តច្បារអំពៅ ទាំងទឹកភ្នែករលីងរលោង ថា ភរិយារបស់លោកទើបតែមានអាយុ ៥៣ឆ្នាំប៉ុណ្ណោះ មិនគួរណាឆាប់ស្លាប់យ៉ាងនេះនោះទេ ។ ទាំងនេះគឺដោយសារគាត់ បានទទួលដំណឹងថា តុលាការកោះហៅឱ្យរូបលោកចូលទៅបំភ្លឺនៅសាលាដំបូងរាជធានីភ្នំពេញ នៅព្រឹកថ្ងៃទី ១៦ ខែធ្នូ ឆ្នាំ២០១៥ ហើយប្រពន្ធរបស់គាត់ក៏បានទទូចសួរមករូបលោក ( សួន គឹមសុង )ថា តុលាការហៅប៉ាឯងរឿងអី ? លោកក៏ បានប្រាប់ទៅប្រពន្ធថា គ្មានរឿងអ្វីក្រៅពីរឿង សេង ចាយ និងសេង ញ៉ក់ នោះទេ គ្រាន់តែប៉ុណ្ណឹងប្រពន្ធរបស់គាត់ក៏មាន សភាពថប់ដង្ហើម ហើយក៏គាំងបេះដូងស្លាប់ភ្លាមៗតែម្តង ។
លោក សួន គឹមសុង បានរៀបរាប់បន្ថែមថា រឿង សេង ចាយ និងសេង ញ៉ក់ នោះ គឺអញ្ចោះទេ គឺថា ឈ្មោះ សេង ចាយ ហ្នឹងគឺជាឪពុករបស់ឈ្មោះ សេង ញ៉ក់ និងឈ្មោះ សេង លាង ពីដើមគឺរកស៊ីជាមួយរូបលោក ដោយភាគីឈ្មោះ សេង ចាយ គេជាអ្នកមានប្រាក់ ហើយរូបលោកជាអ្នកចេញកម្លាំងចុះរៀបដីទិញដីទុកលក់យកចំណេញពីមួយកន្លែងទៅមួយកន្លែង ដូចជា ដីនៅខេត្តសៀមរាប, នៅកំពង់សោម, ភ្នំពេញថ្មីកប់ស្រូវជាដើម ។ ពេលដែលរូបលោកចុះទៅរៀបដីទិញពីប្រជាពល រដ្ឋនោះ គឺលោកត្រូវយកលុយពីឈ្មោះ សេង ចាយ និងសេង ញ៉ក់ យកទៅប្រគល់ឱ្យប្រជាពលរដ្ឋ ចំណែកណាមួយសិន ពេល ដែលរូបលោករត់ការធ្វើប្លង់កម្មសិទ្ធិមកឈ្មោះ កូនប្រុស របស់ឈ្មោះ សេង ចាយ បានចប់សព្វគ្រប់ហើយ ទើបឈ្មោះ សេង ចាយ ប្រគល់លុយគ្រប់មកឱ្យរូបលោក ( សួន គឹមសុង )។ អញ្ចឹងហើយស្របពេលដែលយើងកំពុងរត់ឯកសារធ្វើប្លង់កម្ម សិទ្ធិយើងត្រូវយកលុយពីផ្ទះទៅប្រគល់ឱ្យប្រជាពលរដ្ឋឱ្យគ្រប់សិន ទើបពួកគាត់អនុញ្ញាតឱ្យយើងយកឯកសារទៅរត់ការ ។
លោក សួន គឹមសុង បានបញ្ជាក់បន្ថែមទៀតថា កន្លងមកមិនដែលមានបញ្ហាអ្វីជាមួយគ្នានោះទេ គឺបានន័យថា មនុស្សទុកចិត្តគ្នាដូចបងដូចប្អូនហើយហ្នឹង ។ ទើបតែពេលឈ្មោះ សេង ញ៉ក់ និងឈ្មោះ សេង លាង ប្រគល់សិទ្ធិឱ្យលោក សួន គឹមសុង ចុះទៅដោះស្រាយជាមួយចំនួន ២៩គ្រួសារ ដែលបានលក់ដីមកឱ្យក្រុមហ៊ុនចំនួន ៣២ប័ណ្ណ ស្មើនឹង ៥៦ហិកតា ស្ថិតនៅភូមិត្រពាំងក្រសាំង ឃុំបែកចាន ស្រុកអង្គស្នួល ខេត្តកណ្តាល ដូចមាននៅក្នុងលិខិតប្រគល់សិទ្ធិចុះថ្ងៃទី ០២ ខែឧសភា ឆ្នាំ២០០៦ និងលិខិតប្រគល់សិ់ទ្ធិចុះថ្ងៃទី ២១ ខែកញ្ញា ឆ្នាំ២០០៩ នេះស្រាប់ ។ ដូច្នេះពេលវេលានៃការចុះដោះ ស្រាយ គឺមានរយៈពេលបីឆ្នាំ អញ្ចឹងហើយការចំណាយក្នុងការរត់ឯកសារ និងការទាមទារថ្លៃរបស់ប្រជាពលរដ្ឋ គឺមានការ កើនឡើង ទើបរូបលោកត្រូវការលុយកាក់ខ្លះដើម្បីបង្វិល ហើយក៏បានលក់ដីរបស់ខ្លួនមួយកន្លែង ស្ថិតនៅភូមិបន្លាស្អិត សង្កាត់ឃ្មួញ ខណ្ឌសែនសុខ ទំហំ ១.១០ហិកតា ឱ្យទៅឈ្មោះ សេង ញ៉ក់ ក្នុងតម្លៃ ៨០ម៉ឺនដុល្លារ ។
ក្រោយមកដីដែលខ្ញុំ ( លោក សួន គឹមសុង )លក់ទៅឱ្យឈ្មោះ សេង ញ៉ក់ នោះ និងហាងឆេងដីធ្លាក់ចុះឈ្មោះ សេង ចាយ ក៏បានប្រាប់មកខ្ញុំវិញថា ដីដែលបងសុងឯងលក់ឱ្យកូននោះ មិនចាំបាច់កាត់ឈ្មោះមកវាទេ ហើយចំពោះលុយ ដែលបងសុងឯងយកពីខ្ញុំ (ឈ្មោះ សេង ចាយ)នោះ គឺបងសុងឯងមកធ្វើលិខិតខ្ចីលុយខ្ញុំវិញចុះ ។ ហើយខ្ញុំក៏យល់ព្រម ព្រោះអាងតែមនុស្សរកស៊ីជាមួយគ្នា ម្យ៉ាងលុយនោះ គឺគ្មានយកទៅដោះបញ្ហាណាផ្សេងឯណា គឺយកមកដោះស្រាយដី ៥៧ហិកតា នៅអង្គស្នួលដដែលហ្នឹង ។ ប៉ុន្តែក្រោយមកពេលដែលដោះស្រាយដីនៅអង្គស្នួល បានចប់សព្វគ្រប់ហើយ ខ្ញុំបាន ធ្វើប័ណ្ណកម្មសិទ្ធិប្រគល់ឱ្យទៅឈ្មោះកូនរបស់ឈ្មោះ សេង ចាយ រួចហើយ ឈ្មោះ សេង ចាយ មិនបានប្រគល់លុយចំនួន ១៥០.០០០០ដុល្លារ (មួយលានហាសិបម៉ឺនដុល្លារ)មកឱ្យខ្ញុំដូចការនិយាយគ្នាឡើយ បែរជាឱ្យខ្ញុំរកម៉ូយមកទិញដីសិនទៅ បានមានលុយឱ្យគ្រប់ ។ ក៏ប៉ុន្តែតាំងពីអ្នកទិញគេហ៊ានទិញក្នុងមួយម៉ែត្រការ៉េ ១៨ដុល្លារ រហូតដល់ ៤០ដុល្លារ ក៏នៅតែឈ្មោះ សេង ញ៉ក់ មិនព្រមលក់ ទើបខ្ញុំសុំឱ្យបូកបញ្ជីគិតលុយឱ្យខ្ញុំ គេមិនព្រមចូលខ្លួនមកបូកបញ្ជីជាមួយខ្ញុំទេ ព្រោះគេជាប់រវល់ការ ងារប៉ាក្មេករបស់គេ (ឈ្មោះ សេង ញ៉ក់)ព្រោះប៉ាក្មេងរបស់គេ គឺជាអ្នកឧកញ៉ា ។
ខ្ញុំ (សួន គឹមសុង) ក៏ដាក់ពាក្យបណ្តឹងទៅតុលាការសុំឱ្យជម្រះបញ្ជីតាមកិច្ចសន្យា ព្រោះខ្លាចហួសអាជ្ញាយុកាល ។ ប៉ុន្តែតុលាការមិនទាន់ចាត់ការរឿងរបស់ខ្ញុំផង បែរជាតុលាការចាត់ការតាមបណ្តឹងរបស់ឈ្មោះ សេង ញ៉ក់ និងឈ្មោះ សេង លាង ប្តឹងរូបខ្ញុំថា រំលោភសេចក្តីទុកចិត្ត និងចេញដីកាឱ្យប៉េអឹមយកមកកោះហៅខ្ញុំដល់ផ្ទះ ទើបប្រពន្ធខ្ញុំរន្ធត់ចិត្តរហូតដល់ គាំងបេះដូងស្លាប់យ៉ាងនេះ ។
លោក សួន គឹមសុង បានសំណូមពរថា សូមឱ្យសងជីវិតប្រពន្ធគាត់មកវិញ និងសូមឱ្យបូកបញ្ជីទូទាត់គ្នាទៅ បើឃើញ ថា ចំនួនលុយដែលគាត់ទទួលយកពីឈ្មោះ សេង ចាយ លើសពីចំនួនអ្វីដែលបាននិយាយគ្នាគាត់សុខចិត្តសងវិញ តែបើនៅខ្វះ សូមប្រគល់ឱ្យមកគាត់ចុះ និងសូមឱ្យសម្តេចតេជោ នាយករដ្ឋមន្ត្រី មេត្តាផ្តល់យុត្តិធម៌ឱ្យរូបលោ កផង ។
ដោយឡែក លោក សេង ចាយ និងលោក សេង ញ៉ក់ ភ្នាក់ងារហើយពុំទាន់ទំនាក់ទំនងសុំការបំភ្លឺបានទេ នៅថ្ងៃនេះ ៕