រាជធានីភ្នំពេញ ៖ តាមរយៈសេចក្តីប្រកាសរបស់ខ្លួន ក្រុមហ៊ុនយក្សអាមេរិក Walmart បានកោតសរសើរកម្ពុជាថា ជាប្រទេសស្រស់ស្អាត ហើយចាត់ទុកសន្តិភាព ស្ថិរភាពអាចព្យាករណ៍បាន និងនីតិរដ្ឋគឺជាកត្តាសំខាន់ ដែលក្រុមហ៊ុនមួយនេះយកធ្វើជាមូលដ្ឋានក្នុងការបន្តបញ្ជាទិញ និងពង្រីកការវិនិយោគរបស់ខ្លួននៅប្រទេសមួយនេះ។ នៅឆ្នាំ២០១៨ ខាងមុខនេះ ក្រុមហ៊ុន នឹងចាប់ផ្តើមនាំផលិតផលធ្វើដំណើរដូចជាកាបូប និងវ៉ាលីសពីកម្ពុជាថែមទៀត។
តាមរយៈលិខិតផ្លូវការមួយរបស់ក្រុមហ៊ុន Walmart ដែលបានផ្ញើជូនលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី៦ ខែធ្នូកន្លងទៅ ដោយបានថ្លែងអំណរគុណសម្តេច ហ៊ុន សែន ដែលបានទទួលជួបពិភាក្សាការងារ និងផ្លាស់ប្តូរព័ត៌មានអំពីភាពកាន់តែប្រសើរនៃលក្ខខណ្ឌការងារនៅកម្ពុជា ជាពិសេសកិច្ចខិតខំប្រឹងប្រែងបន្ថែមទៀត របស់សម្តេចតេជោ ហ៊ុន សែន នាយករដ្ឋមន្ត្រី ក្នុងការពង្រឹងលក្ខខណ្ឌការងារ និងបង្កើនការគាំពារសង្គមជូនកម្មករកម្មការិនីទាំងនៅក្នុង និងក្រៅប្រព័ន្ធ៕
