ភ្នំពេញ ៖សម្តេចក្រុមព្រះ នរោត្តម រណឫទ្ធិប្រធានគណបក្សហ្វ៊ុនស៊ិនប៉ិច កាលពីថ្ងៃទី២៥ ធ្នូ បានប្រកាសប្រាប់កាសែតថា៖ទ្រង់បានដាក់សំណើទៅកាន់ លោក វ៉ាង វៃគួង ប្រធានវិទ្យាស្ថានវិទ្យាសាស្ត្រសង្គម នៃសាធារណរដ្ឋប្រជាមានិតចិនឲ្យជួយដល់គណបក្សហ្វ៊ុនស៊ិនប៉ិច ដោយទ្រង់អះអាងថា គណបក្សហ្វ៊ុនស៊ិនប៉ិច ជាគណបក្សធំទី២ ហើយជាគណបក្សក្រគ្មានអ្វីសោះ។ ករណិយ៍នេះសម្ដេចក្រុមព្រះអះអាងថា ភាគីចិនបានសន្យាយកសំណើសុំរបស់ព្រះអង្គ ទៅរាយការណ៍ជូនប្រធានាធិបតីចិន លោក ស៊ី ជិនពីង។ សម្ដេចក្រុមព្រះឲ្យដឹងថា ចិនបានជួយគណបក្សហ្វ៊ុនស៊ិនប៉ិចយូរហើយ និងបន្តជួយជាបន្តទៀត៖ «»។ការប្រកាសចំហរសុំលុយចិនដោយមេគនបក្សមួយនេះបានថ្វើឲ្យមានការងឿងឆ្ងល់ថាតើខុសឬត្រូវបើយោងតាមគណបក្សនយោបាយដែលទើបកែប្រែថ្មីៗនេះ?។
អ្នកវិភាគនយោបាយ និងសង្គមស៊ីវិល មើលឃើញថា សំណើរបស់សម្ដេចក្រុមព្រះ នរោត្តម រណឫទ្ធិ ដែលបានស្នើសុំឲ្យរដ្ឋាភិបាលចិន ផ្ដល់ជំនួយដល់គណបក្សហ្វ៊ុនស៊ិនប៉ិច មិនបានធ្វើឲ្យគណបក្សរាជានិយមមួយនេះ ចំណេញប្រជាប្រិយភាពនោះទេ។ ផ្ទុយទៅវិញ ពួកគាត់យល់ថា ការសុំជំនួយពីប្រទេសចិន នឹងធ្វើឲ្យគណបក្សហ្វ៊ុនស៊ិនប៉ិច ប្រឈមនឹងការអនុវត្តផ្លូវច្បាប់ ដែលសំណើនេះ បានប្រឆាំងទៅនឹងច្បាប់គណបក្សនយោបាយ ដែលលោកនាយករដ្ឋមន្ត្រី ហ៊ុន សែន ផ្ដួចផ្ដើមគំនិតបង្កើតឡើង។
លោកបណ្ឌិត មាស នី វិភាគថា ប្រសិនបើរដ្ឋាភិបាលកម្ពុជា អនុវត្តច្បាប់ឲ្យមានស្តង់ដារតែមួយ គឺក្រសួងមហាផ្ទៃមិនចាំបាច់ស៊ើបអង្កេតនោះទេ គឺអាចដាក់ពាក្យប្ដឹងទៅតុលាការកំពូលបាន ក្នុងករណីគណបក្សហ្វ៊ុនស៊ិនប៉ិច បានទទួលជំនួយពីប្រទេសចិន។លោកបណ្ឌិត មាស នី បានប្រៀបធៀបវិធានការលើសម្ដេចក្រុមព្រះប្រកាសសុំជំនួយពីចិន និងបទចោទប្រកាន់លើប្រធានគណបក្សសង្គ្រោះជាតិ លោក កឹម សុខា ដែលរដ្ឋាភិបាលចោទថា ទទួលយកជំនួយពីសហរដ្ឋអាមេរិកថា អាចជាអនុវត្តច្បាប់មានស្តង់ដារពីរ។
លោកបណ្ឌិត មាស នី ចង់ដឹងថា ហេតុអ្វីបានគណបក្សហ្វ៊ុនស៊ិនប៉ិច អាចទទួលជំនួយពីចិនបាន។ថ្មីៗនេះសម្តេចនាយករដ្ឋមន្ត្រីតេជោ ហ៊ុន សែន បានប្រឆាំងដាច់ខាត ចំពោះគណបក្សណា ដែលទទួលជំនួយ ឬហិរញ្ញវត្ថុពីបរទេសដោយសម្តេចចាត់ទុកការទទួលយកជំនួយទាំងនោះ ជាការលក់ក្បាលបម្រើឲ្យបរទេស។
ច្បាប់ស្ដីពីវិសោធនកម្មច្បាប់គណបក្សនយោបាយ មាត្រា ២៩ថ្មី បានចែងថា គណបក្សនយោបាយ ត្រូវបានហាមឃាត់មិនឲ្យទទួលវិភាគទាន ទោះជារូបភាពណាក៏ដោយ ពីស្ថាប័នបរទេស ក្រុមហ៊ុនបរទេស ជនបរទេស ឬអង្កការ ដែលមានប្រភពហិរញ្ញប្បទានពីបរទេស។ ក្នុងករណីល្មើសច្បាប់ មាត្រា ៣៨ថ្មី ចែងអំពីទោសទណ្ឌថា ក្រសួងមហាផ្ទៃអាចព្រមាន មានវិធានការ ផ្អាកសកម្មភាពគណបក្សនយោបាយបណ្ដោះអាសន្ន ឬករណីធ្ងន់ធ្ងរអាចប្ដឹងសុំរំលាយគណបក្សនយោបាយ។