រាជធានីភ្នំពេញ ៖ ថ្លែងនៅថ្ងៃទី២៧ ខែធ្នូ ឆ្នាំ២០១៧នេះ សម្តេចនាយករដ្ឋមន្ត្រី ហ៊ុន សែន បានប្រកាសជាសាធារណថា ចាប់ពីឆ្នាំ២០១៩ទៅ កម្មករ កម្មការិនីខ្មែរនឹងទទួលបានប្រាក់ សោធន៍និវត្តន៍ ( ប្រាក់រឺត្រែក ) ដូចមន្ត្រីរាជការនិងកងកម្លាំងប្រដាប់អាវុធដូចគ្នា ។ សម្តេចថ្លែងដូច្នេះ ក្នុងឱកាសជួបសំណេះសំណាលជាមួយកម្មករ កម្មការិនី ជាងមួយម៉ឺន នាក់ នៅរោងចក្រតំបន់តាមបណ្តោយផ្លូវជាតិលេខ៣ នាថ្ងៃទី២៧ ខែធ្នូ ឆ្នាំ២០១៧នេះ ។
សម្តេច ហ៊ុន សែន បានប្រាប់កម្មករថា ចាប់ពីឆ្នាំ២០១៩ទៅ កម្មករ កម្មការិនី នឹងទទួល បានប្រាក់សោធន៍និវត្តន៍ដូចមន្ត្រីរាជការ កងកម្លាំងប្រដាប់អាវុធដែរ ។ ប៉ុន្តែកម្មករ កម្មការិនី មិនមែនធ្វើការមួយឆ្នាំ ឬ ពីរឆ្នាំ នឹងទទួលបានប្រាក់សោធន៍និវត្តន៍នោះទេ គឺត្រូវធ្វើការជាបន្ត បន្ទាប់ រហូតគ្រប់ឆ្នាំដែលត្រូវទទួលបានប្រាក់សោធន៍និវត្តន៍នេះ ។ ដូច្នេះកម្មករ កម្មការិនីត្រូវយកចិត្តទុកដាក់ក្នុងការងារ ហើយកុំលង់ជឿតាមការញុះញង់របស់មនុស្សមួយចំនួនឲ្យសោះ ។
សម្តេចក៏បានថ្លែងអំណរគុណដល់ម្ចាស់ផ្ទះជួលឲ្យកម្មករកម្មការិនីទាំងអស់ដែលបាន សន្យាថា នឹងមិនដំឡើងថ្លៃផ្ទះនោះទេ ខណដែលប្រាក់បៀវត្សកម្មករ កម្មការិនីដែលនឹងត្រូវបាន ដំឡើងចាប់ពីខែមករា ឆ្នាំ២០១៨នេះតទៅ ៕
