ខេត្តពោធិ៏សាត់៖យោងតាមសេចក្ដីរាយការណ៍ពីខេតពោធិ៍សាត់បានអោយដឹងថា៖ឈ្មួញឈើដ៏ល្បីប្រចាំខេត្តកំពង់ស្ពឺ ឈ្មោះ ស៊ី ស និង ឈ្មោះ វាសនា ផាន់ថានា ហៅស្នា កំពុងធ្វើសកម្មភាពកាប់បំផ្លាញអារនិងជ្រៀកឈើ ផ្ដាច់មុខយ៉ាងអាធិបតេយ្យនៅតំបន់អូរត្រាវ និងអំពិល នៃទឹកដីខេត្តពោធិ័សាត់ រួចដឹកចេញតាមរយៈ រថយន្តកែឆ្នៃ(បង្កុង+អារ៉េវ)និងគោយន្តកន្ត្រៃ ចេញតានផ្លូវច្រកអូត្រាវខេត្តកំពង់ស្ពឺ។មានសេចក្តីរាយាករណ៍ថាឈ្មួញឈើដ៏ល្បីឈ្មោះ ស៊ី ស នេះក៏លេចចេញមកវិញ ធ្វើសកម្មភាពកាន់តែ កក្រើក លើសដើម បន្ទាប់ពីនាយឧត្ដមសេនីយ៍ សៅ សុខា មេបញ្ជាការ កងរាជអាវុធហត្ថ លើផ្ទៃប្រទេសបញ្ជាអោយចាប់ខ្លួន ហើយរត់គិចមួយរយៈតូចប៉ុណ្ណោះ ។
ដោយឡែកឈ្មោះ វាសនា ផាន់ថានា (ហៅស្នា) ជាមេការឈ្មួញឈើរូបនេះ ទើបតែចេញពីពន្ធនាគារមិនបានមួយប៉ព្រិចភ្នែកផងក៏ចាប់ផ្ដើមធ្វើព្យុះភ្លៀង ហើយសមត្ថកិច្ចក្នុងខេត្តពោធិ៍សាត់មិនហ៊ានចេញមុខបង្ក្រាបនោះឡើយ។
ប្រជាពលរដ្ឋនៅក្នុងស្រុកភ្នំក្រវ៉ាញ និងស្រុកវាលវែង ខេត្តពោធិ៍សាត់ បានឲ្យដឹងថា ចំណុចអវិជ្ជមានធំៗដែលបង្កអោយប្រជាពលរដ្ឋរិះគន់ គឺថាឈ្មួញកាប់ឈើជាទ្រុងធ្រាយធំ នៅក្នុងភូមិសាស្ត្រ នៃទឹកដីខេត្តពោធិ៍សាត់ដោយរលូនដែលគេជឿថា បានបង់លុយដាក់ខែអោយ លោកប្រធានមន្ទីរបរិស្ថាន ខេត្តនិងអ្នកមានអំណាចធំជាងគេនៅក្នុងខេត្ត ក្នុងមួយខែខ្ទង់ម៉ឺនដូល្លា ដោយទំនាក់ទំនងតាមរយៈ(អ្នកបើរថយន្តផ្ទាល់ខ្លួនឈ្មោះបូរ )។
ប្រភពពីសមត្តកិច្ចមូលដ្ឋាននិយាយថា៖បើសមត្ថកិច្ចគ្រប់ជំនាញក្នុងខេត្តម្នាក់ណាហ៊ានបង្ក្រាប!!!បើអ្នកណាហ៊ានគឺគ្រាន់តែឃាត់សួនាំប៉ុណ្ណោះក៏ត្រូវលោកអភិបាលខេត្តទូរស័ព្ទគំរាមដកតំណែងឬគំរាមចាប់ខ្លួនមិនខានឡើយ ។ឯអ្នកកាសែតវិញនោះគឺជាឆ្អឹងទទឹងករពួកសមត្តកិច្ចនិងឈ្មួញព្រោះ គ្រាន់តែចុះទៅថតរូបនោះ ក៏ត្រូវគំរាម ឬរៀបចំអន្ទាក់ ចាប់ដាក់គុក ផងដែរ។
ប្រជាពលរដ្ឋរស់នៅក្នុងស្រុកភ្នំក្រវ៉ាញបានអះអាងថា ឈ្មួញឈើខាងលើ បានដាក់កម្លាំង របស់គេ បិទមិនអោយ នាក់កាប់ឈើ តូចតាច ដឹកចុះមកក្នុងខេត្តពោធិ៍សាត់ទេ គឺគេបង្ខំអោយប្រជាពលរដ្ឋលក់ឈើអោពួកគេក្នុងតម្លៃថោក។ ឈ្មួញឈើទាំងនេះធ្វើសកម្មភាព ដឹកជញ្ជូនឆ្លងកាត់ខេត្តកំពង់ស្ពឺតាមច្រកអូត្រាវ យកទៅលក់នៅប្រទេសវៀតណាមដោយរលូន ។
ពាក់ព័ន្ធព័ត៌មានខាងលើលោកប្រធានមន្ទីរបរិស្ថានខេត្ត និងលោកអភិបាលខេតពោធិ៍សាត់ អង្គភាព ព័ត៌មានយើង មិនអាចសំុការទំនាក់ទំនងបាននៅរសៀលថ្ងៃទី២៥ ខែធ្នូ ឆ្នាំ២០១៧នេះ។ទោះយ៉ាងណា អង្គភាព សារព័ត៌មានយើង រងចាំទទួលស្វាគមន៍ រាល់ការបកស្រាយពីសមត្ថកិច្ចពាក់ព័ន្ធដោយយោងតាមច្បាប់ស្ដីពីរបបសារព័ត៌មាន៕