ខេត្តឧត្តរមានជ័យ ៖ មន្ត្រីច្រកព្រំដែនបានឲ្យដឹងថា សព្វថ្ងៃនេះ នៅមាត់ច្រកទ្វារអន្តរជាតិជាំ ស្ថិតក្នុងឃុំត្រពាំងប្រីយ៍ ស្រុកអន្លង់វែង មាត់ច្រកទ្វារអន្តរជាតិអូរស្មាច់ នៅសង្កាត់អូរស្មាច់ ក្រុងសំរោង និងមាត់ច្រកទ្វារតំបន់ជប់គគី ឬហៅថាច្រកទ្វារសាយតាគូ មានប្រជាពលរដ្ឋខ្មែររាប់រយនាក់ ក្នុងមួយថ្ងៃៗ នាំគ្នាចូលទៅមើលជំងឺនៅប្រទេសថៃ ខណៈដែលពួកគាត់បានល្បីតៗគ្នា អំពីប្រសិទ្ធភាព នៃការព្យាបាលនៅមន្ទីរពេទ្យថៃមួយនោះ ។ ទន្ទឹមនោះតម្លៃសេវាព្យាបាលក៏ថោកថែមទៀត ។
តាមប្រជាពលរដ្ឋនិយាយថា ការព្យាបាលជំងឺនៅតាមមន្ទីរពេទ្យ ក្នុងស្រុក គឺធ្វើឲ្យពួកគាត់មានការធុញទ្រាន់ និងខាតពេលវេលា ព្រោះគ្រូពេទ្យក្នុងស្រុកមិនសូវយកចិត្តទុកដាក់លើអ្នកជំងឺឡើយ ហើយថែមទាំងប្រើសម្តីមិនសមរម្យទៀតផង។ ផ្ទុយទៅវិញគ្រូពេទ្យ នៅប្រទេសថៃ គឺពួកគេមិនរើសអើងអ្នកជម្ងឺ ដឹកចូលភ្លាមៗ គ្រូពេទ្យចេញមកទទួលយ៉ាងប្រញ៉ាប់ប្រញាល់បំផុត ហើយយកចិត្តទុកដាក់ ក្នុងការព្យាបាល និងថែទាំអ្នកជំងឺណាស់ លើសពីនោះក៏ចំណាយថវិកាសមរម្យទៀតផង។
យ៉ាងណាក៏ដោយ តាមប្រជាពលរដ្ឋអះអាងថា ពលរដ្ឋខ្មែរដែលឆ្លងដែនចូលព្យាបាលនៅមន្ទីរពេទ្យប្រទេសថៃនោះ ភាគច្រើនប្រជាពលរដ្ឋមានជំងឺថ្លើម ទឹកនោមផ្អែម និងលើសឈាមជាដើម ៕
