ខេត្តកំពត ៖ ប្រជាកសិករនៅឃុំកំពង់ត្រាចខាងលិច ស្រុកកំពង់ត្រាច នៅតែប្រើឧបករណ៍ប្រមូលផលស្រូវតាមបែបបុរាណ តាំងពីដូនតារហូតមកទាល់សព្វថ្ងៃ ប៉ុន្តែគិតមកដល់ខែធ្នូនេះពួកគាត់បានច្រូតកាត់ និងរៀបចំទុកដាក់ផលស្រូវ
បានរួចរាល់អស់ហើយ។
បងប្រុស ទូច ភ្លូច អាយុ៥១ឆ្នាំ នៅភូមិអូច្រនៀង ឃុំកំពង់ត្រាចខាងលិច បានប្រាប់ឲ្យដឹងថា ទោះបីជាមានម៉ាស៊ីនច្រូតស្រូវបែបសម័យទំនើបយ៉ាងណាក៏ដោយ ក៏ប្រជាពលរដ្ឋនៅឃុំកំពង់ត្រាច នៅតែប្រើប្រាស់ឧបករណ៍ដែលចាស់ៗបែបបុរាណ គឺនៅតែប្រើពាក្យថា «បោកស្រូវ ដាក់ក្នុងលុង»។ បងប្រុស ទូច ភ្លូច បានប្រាប់បន្តថា ប្រជាពលរដ្ឋនៅឃុំកំពង់ត្រាច គ្រប់ផ្ទះនៅតែប្រើប្រាស់បោកស្រូវដាក់លុង រហូតតាំងពីយូរយារណាស់មកហើយ។
បងប្រុស ទូច ភ្លូច និយាយថា ការច្រូតស្រូវមិនបាច់ចង់ធ្វើកណ្ដាប់ដូចស្រុកទេស គេទេអ្នក ច្រូតគ្រាន់តែច្រូតបានហើយរាយចោលក្នុងស្រែ ហើយអ្នកប្រមូលយកមកបោកចេះតែប្រមូលបន្ត ហើយរំកិលលុងនោះតាមកន្លែងមានស្រូវដែលច្រូតហើយ។
ថ្លែងដូចគ្នានេះផងដែរ បងស្រី ប៊ុយ សាមីន អាយុ៤៥ឆ្នាំ នៅភូមិអូច្រនៀង បានប្រាប់ឲ្យដឹងថា ប្រជាកសិករនៅក្នុងឃុំកំពង់ត្រាច នៅតែបន្តប្រើយកលុងសម្រាប់បោកស្រូវនេះតាំងពីដូនតាមកម្ល៉េះ។ បងស្រី ប៊ុយ សាមីន បន្តថា បើច្រូតម៉ាស៊ីនចំបើង គោមិនស៊ីទេ ព្រោះធំក្លិនប្រេងម៉ាស៊ីន។
ដោយឡែក លោក ចាន់ រិទ្ធ ប្រធានមន្ទីរកសិកម្មរុក្ខាប្រមាញ់ និងនេសាទ ខេត្តកំពត បានប្រាប់ឲ្យដឹងថា ការប្រមូលផលស្រូវរបស់ប្រជាកសិកនៅខេត្តកំពត នៅខែធ្នូនេះ បានប្រមូលផល និងរៀបចំទុកដាក់រួចរាល់អស់ហើយ៕
