តាកែវ ៖ ប្រភពព័ត៌មានពីប្រជាពលដ្ឋនៅស្រុកអង្គរបុរី ខេត្តតាកែវពិសេសគឺបងប្អូនប្រជាពលរដ្ឋរកស៊ីបើកអាជីវកម្មខារ៉ាអូខេគ្រាន់ដោះស្រាយជីវភាពប្រចាំថ្ងៃបានរាយការណ៍អោយដឹងថាលោក ឌឹម គឹមសាន អភិបាលស្រុកអង្គរបុរី បានធ្វើសកម្មភាពជំរិតទារលុយយ៉ាងធ្ងន់ធ្ងរពីពួកគាត់ដោយតំរូវអោយបង់លុយចំនួន១០០ដុល្លារអាមេរិកក្នុង១ឆ្នាំសំរាប់ខារ៉អូខេ១បន្ទប់។
ប្រភពបន្តទៀតថា ការដែលលោកអភិបាលស្រុកអង្គរបុរីគាបសង្កត់មកលើពួកគាត់បែបនេះ គឺដូចអារកខ្យងសម្រក់ឈាមអីចឹងព្រោះការបើកអាជីវកម្មខារ៉ាអូខេតូចតាចលក្ខណៈគ្រួសារនេះគឺគ្រាន់តែដោះស្រាយជីវភាពប្រចាំថ្ងៃក្នុងគ្រួសាររបស់ពួកគាត់ ប៉ុន្តែផ្ទុយទៅវិញលោក ឌឹម គឹមសាន បែរជាមកជំរិតលុយពីពួកគាត់ដែលរកសុីកំបុិកកំប៉ុកទុកគ្រាន់ទិញអង្ករកំប៉ុងសំរាប់ចិញ្ចឹមឆ្នាំងទៅវិញ ។ ប្រជាពលរដ្ឋនៅក្នុងភូមិសាមគ្គី ស្រុកអង្គរបុរី ខេត្តតាកែវ បានរាយការណ៍អោយអ្នកកាសែតដឹងថា ពួកគាត់ដែលជាម្ចាស់ខារ៉ាអូខេក្នុង១ឆ្នាំៗ ម្នាក់ៗត្រូវ ចំណាយលុយ១០០ដុល្លារបង់ជូនលោក ឌឹម គឹមសាន ដែលជាអភិបាលស្រុកអង្គរបុរី ។
ករណីនេះ ពួកគាត់ដែលជាម្ចាស់អាជីវកម្មប្រមាណជាង១០ទីតាំងសរុប ជាបន្ទប់មានជាង៥០បន្ទប់នៅក្នុងស្រុកអង្គរបុរីទាំងមូលឆ្ងល់ថាតើលុយទាំងនោះត្រូវបង់ជូនលោក ឌឹម គឹមសាន ដើម្បីអ្វីនោះឡើយ? ។ ក្នុង១ឆ្នាំៗ លោកអភិបាលស្រុកអង្គរបុរីរូបនេះអាចរកលុយបានពីបន្ទប់ខារ៉ាអូខេរាប់ពាន់ដុល្លារចាយលេង ។
ម្ចាស់ខារ៉ាអូខេម្នាក់សុំមិនបញ្ចេញឈ្មោះ បានបញ្ជាក់ថា សព្វថ្ងៃខារ៉ាអូខេពួកគាត់ស្ងាត់ភ្ញៀវណាស់រកប្រាក់ពុំសូបាននោះទេ។ ហេតុដូច្នេះហើយ ទើបពួកគាត់សំណូមពរដល់ថ្នាក់ដឹកនាំខេត្ត ពិសេសលោក ឡាយ វណ្ណៈ អភិបាលខេត្តតាកែវ មេត្តាជួយអន្តរាគមន៍កុំអោយលោកអភិបាលស្រុកអង្គរបុរី ឌឹម គឹមសាន ជំរឹតទារលុយពួកគាត់ធ្ងន់ធ្ងរបន្តទៀត ។
ជុំវិញសេចក្តីរាយការណ៍ចោទប្រកាន់ខាងលើនេះ ការិយាល័យនិពន្ធសារព័ត៌មានយើងមិនអាចសុំការប្រតិកម្មបំភ្លឺពីលោកឌឹម គឹមសានបាននៅឡើយទេព្រោះពុំមានលេខទូរស័ព្ទទាក់ទង ៕