រាជធានីភ្នំពេញ ៖ សម្តេច ហ៊ុន សែន នាយករដ្ឋមន្ត្រីកម្ពុជា បានអនុញ្ញាតឲ្យលោក ង្វៀន ជីវិញ (Nguyen Chivinh) អនុរដ្ឋមន្ត្រី ក្រសួងការពារជាតិវៀតណាម ចូលជួបសម្តែងការគួរសម និងពិភាក្សាការងារនាវិមានសន្តិភាព នៅព្រឹកថ្ងៃទី២១ ខែធ្នូ ឆ្នាំ២០១៧នេះ។ ក្នុងជំនួបនោះភាគី ទាំងពីរសុទ្ធតែបានបង្ហាញជំហររួមគ្នាប្រយុទ្ធប្រឆាំងចលនាបដិវត្តន៍ពណ៌ ។
លោក អ៊ាង សុផល្លែត ជំនួយការផ្ទាល់សម្តេច ហ៊ុន សែន បានប្រាប់ក្រុមអ្នកព័ត៌មាន នៅក្រោយជំនួបថា លោក ង្វៀន ជីវិញ បានជម្រាបជូនសម្តេច ហ៊ុន សែន អំពីទំនាក់ទំនងរវាងកម្ពុជា និងវៀតណាម ដែលបច្ចុប្បន្នមានភាពល្អប្រសើរជាទីបំផុត ហើយកិច្ចសហប្រតិបត្តិការ រវាងប្រទេសទាំងពីរ និងក្នុងក្របខណ្ឌអាស៊ាន ព្រមទាំងកិច្ចសហប្រតិបត្តិការ ក្របខណ្ឌ កម្ពុជា វៀតណាម ឡាវ គឺមានភាពល្អប្រសើរផងដែរ។
ចំណែកសម្តេច ហ៊ុន សែន ក៏បានស្នើវៀតណាម រួមទាំងកម្ពុជា ជម្រុញកិច្ចសហប្រតិបត្តិការ ឲ្យកាន់តែខ្លាំងក្លាថែមទៀត សំខាន់សហការគ្នាឲ្យបានស្អិតរមួត ក្នុងការចែកបទពិសោធន៍ និងព័ត៌មានពីគ្នាទៅវិញទៅមក ពាក់ព័ន្ធនឹងការប្រយុទ្ធប្រឆាំងនឹងបដិវត្តន៍ពណ៌ ៕