ខេត្តស្ទឹងត្រែង ៖ សត្វព្រៃជាច្រើនប្រភេទលើទីផ្សារ ស្ទឹងត្រែងរងការបង្ក្រាបដោយកម្លាំងកងរាជអាវុធហត្ថក្រុងនិងខេត្តកាលពីវេលាម៉ោង៩ និង១៥នាទីព្រឹកថ្ងៃទី១៩ ខែធ្នូឆ្នាំ២០១៧ ស្ថិតនៅផ្សារសាមគ្គីស្ទឹងត្រែង ភូមិត្រពាំងព្រីង សង្កាត់
ស្ទឹងត្រែង ក្រុងស្ទឹងត្រែង។
ប្រភពឲ្យដឹងថា នៅវេលាកើតហេតុ កម្លាំងកងរាជអាវុធហត្ថដឹកនាំដោយលោកមេបញ្ជាការកងរាជអាវុធហត្ថបានចុះដល់គោលដៅទីតាំង និងបញ្ជាឲ្យចាប់បង្ក្រាប និងឃាត់ខ្លួនបុរសម្នាក់ជាលក់សាច់ព្រៃនោះផងដែរ។ ក្រោយការបង្ក្រាបរឹបអូសអាជីវកម្មល្មើស ច្បាប់ខាងកម្លាំងកងរាជអាវុធហត្ថបាននាំមកបញ្ជាការដ្ឋានដោយមានការចូលរួមពិនិត្យពីសំណាក់លោកព្រះរាជអ្ញារងអមសាលាដំបូងខេត្តរួមមន្ត្រីខណ្ឌរដ្ឋបាលព្រៃឈើផងដែរ។
មន្ត្រីកងរាជអាវុធហត្ថឲ្យដឹងថា ស្ថិតក្នុងសកម្មភាពចុះបង្ក្រាបទីតាំងលក់សាច់ព្រៃខុសច្បាប់កម្លាំងអាវុធហត្ថបានឃាត់ខ្លួនជនសង្ស័យម្នាក់ជាម្ចាស់ឈ្មោះ ហួត តារា ភេទប្រុសអាយុ ៣០ឆ្នាំ បច្ចុប្បន្នស្នាក់នៅភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង។
លោក សុខ សេដា មន្ត្រីផ្នែករដ្ឋបាលព្រៃ ឈើក្រុងស្ទឹងត្រែងឲ្យដឹងថា វត្ថុតាងចាប់យកដោយកម្លាំងកងរាជអាវុធហត្ថរួមមានសាច់ជ្រូកព្រៃចំនួន៤៥គីឡូក្រាមអណ្តើកចំនួន៣ក្បាលទម្ងន់១៥គីឡូក្រាមក្រពះប្រម៉ាក្រៀមចំនួន៣សត្វរញីរស់ចំនួន៥ក្បាលសត្វត្រកួតរស់ចំនួន៣ក្បាលទម្ងន់១៦គីឡូក្រាម។ ក្រោយធ្វើកំណត់ហេតុរួមកម្លាំងកងរាជអា វុអធហត្ថបានប្រគល់វត្ថុតាងល្មើសច្បាប់ទៅអោយជំនាញរដ្ឋបាលព្រៃឈើបន្តនីតិវិធី។ ជាក់ស្តែងសត្វព្រៃរស់ត្រូវបាននាំទៅសង្គ្រោះនៅតំបន់មានសុវត្ថិភាព ចំណែកសាច់ព្រៃត្រូវដុតកម្ទេចចោលនៅបរិវេណខណ្ឌរដ្ឋបាលព្រៃឈើ៕