ភ្នំពេញ ៖ សមាជិកសមាជិកាអតីតគនបក្សសង្គ្រោះជាតិមានវិធីមួយសម្រាប់ចូលលេងល្បែងនយោបាយខ្មែរគឺបង្កើតគណបក្សថ្មីហើយចូលរួមប្រកួតប្រជែងសម្រាប់ការបោះឆ្នោតឆ្នាំ២០១៨ទៅកុំរំពឹងគណបក្សនយោបាយដែលរំលាយចោលនោះ ព្រោះគ្មានថ្ងៃរស់ឡើងវិញនោះឡើយ។នេះគឺជាអនិសាសន៍ថ្មីរបស់នាយករដ្ឋមន្ត្រីតេជោហ៊ុនសែន។
ថ្លែងក្នុងកិច្ចសំណេះសំណាលជាមួយតំណាងកម្មករ កម្មការិនីនៅសាលមហោស្រពកោះពេជ្រនាព្រឹកថ្ងៃអាទិត្យ ១៥រោច ខែមិគសិរ ឆ្នាំរកា ព.ស២៥៦១ ត្រូវនឹងថ្ងៃទី១៧ ខែធ្នូ ឆ្នាំ២០១៧សម្តេចតេជោ ហ៊ុន សែន បានគូសបញ្ជាក់ដូច្នេះ «ដោយសារមានការខ្សឹបខ្សៀវ និងការប្រឌិតព័ត៌មានមិនពិតដដែលជាដដែលអំពីការរស់ឡើងវិញនៃអតីតបក្សសង្រោះជាតិ គឺខ្ញុំសូមផ្តាំផ្ញើ និងបញ្ជាក់សាជាថ្មីថា អតីតបក្សដែលត្រូវបានរំលាយហើយ ដោយសាលដីការតុលាកំពូល គឺចប់ជាស្ថាពរហើយ។
ឈ្មោះអតីតបក្សនេះ គឺនឹងគ្មានកើតឡើងសាជាថ្មីទៀតឡើយ។ ខ្ញុំសូមឲ្យយោបល់ខ្លះៗដែលអាចមានប្រយោជន៍ ហើយកុំឲ្យខាតពេលច្រើន គឺមានតែវិធីមួយគត់ គឺបង្កើតបក្សថ្មីចូលរួមប្រកួតប្រជែងតាមលក្ខណៈប្រជាធិបតេយ្យនៅក្នុងការបោះឆ្នោតខាងមុខ គឺវាប្រសើរជាងដើរនិយាយឃោសនាមិនពិត ហើយខាតបង់ពេលវេលាកាន់តែច្រើន»។
សូមបញ្ជាក់ថា គណបក្សសង្គ្រោះជាតិ ត្រូវបានតុលាការកំពូលកាត់រំលាយចោលកាលពីថ្ងៃទី១៦ ខែវិច្ឆិកា ឆ្នាំ២០១៧ ជាប់ពាក់ព័ន្ធនឹងការប្រព្រឹត្តទង្វើក្បត់ជាតិ ដោយយោងទៅតាមច្បាប់ស្តីពីគណបក្សនយោបាយ។ ក្រៅពីរំលាយគណបក្សប្រឆាំងមួយនេះហើយថ្នាក់ដឹកនាំរបស់គណបក្សមួយនេះ ១១៨រូប ក៏ត្រូវបានផ្អាកសកម្មភាពនយោបាយរយៈពេល ៥ឆ្នាំផងដែរ។ឯលោកកឹមសុខាជាមេបក្សកំពុងជាប់ឃុំនៅគុកត្រពាំងផ្លុងមិនទាន់កាត់ទោសនៅឡើយ។
ក្រោយពីបានរំលាយតំណាងរាស្ត្រគណបក្សសង្គ្រោះជាតិ៥៥រូបនិងសមាជិកសមាជិការក្រុមប្រឹក្សាឃុំសង្កាត់ប្រមាន៥០០០នាក់ដែលក្នុងនោះមានមេឃុំចៅសង្កាត់ជាង៤៨០នាក់ដែលបានកើតឡើងពីការបើឆ្នោតគាំទ្រពីប្រជាពលរដ្ឋជាង២លាននាក់ត្រូវបានគណៈកម្មាធិការជាតិរៀបចំការបោះឆ្នោតហៅកាត់ថា(គជប)ដកហូតបែងចែកឲ្យគណបក្សផ្សេងៗហ្ម៉តដូចអាចម៍ទីទុយ។
មេដឹកនាំគណបក្សសង្គ្រោះជាតិដែលនៅសល់ហើយគេចខ្លួនទៅក្រៅប្រទេសបាននិងកំពុងធ្វើយុទ្ធនាការស្វែងរកការគាំទ្រពីអាមេរិកនិងប្រទេសក្នុងសហគមន៍អឺរ៉ូបឲ្យជួយតាមរយៈដាក់គំនាបលើរាជរដ្ឋាភិបាលសព្វថ្ងៃ៕