បន្ទាយមានជ័យ៖ សាច់មាន់ខូចគុណភាពដែលប្រជាជនថៃមិនស៊ី ត្រូវបានក្រុមឈ្មួញឱកាសនិយមដឹកយកមកចែកចាយនៅកម្ពុជា យ៉ាងគគ្រឹកគគ្រេងតាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ប្រឈមនិងស្រុកអរញរបស់ខេត្តស្រះកែវប្រទេសថៃ ។
កាលពីព្រឹកថ្ងៃទី១៩ខែតុលាឆ្នាំ២០១៧ មន្ត្រីសាខាកាំកុងត្រូលខេត្តបន្ទាយមានជ័យ ប្រចាំការច្រកអន្តរជាតិ ប៉ោយប៉ែតបានចាប់រទេះមួយដឹកសាច់មាន់ចេញពីប្រទេសថៃដែល បំរុងលើកដាក់រថយន្ត បន្តចែកចាយទៅតាមបណ្តាខេត្តទៀត ចំនួន៨៦០គីឡូក្រាម។
លោកស៊ាន ស៊ីណាត ប្រធានសាខាកាំកុងត្រូលបានឲ្យដឹងថា មន្ត្រីជំនាញរបស់លោកចាប់បានតែវត្ថុតាងទេ ចំណែកកម្មករនិងឈ្មួញដែលដឹកសាច់នោះមិនត្រូវបានចាប់ទេ ។
លោក ស៊ាន ស៊ីណាត បន្តថា ក្នុង១ខែៗ ករណីបង្ក្រាបលើក្រុមដឹកជញ្ជូនអាហារខូចគុណភាពបង្កប់តាមរទេះ នាំចេញពីប្រទេសថៃចូលមកកម្ពុជានោះ គឺមន្ត្រីរបស់លោកបង្ក្រាបបានមិនក្រោមពី២ករណីទេ។ តែទោះជាយ៉ាងនេះក្តី កាលពីថ្ងៃទី១២តុលា២០១៧កន្លងទៅសាច់មាន់ខូចគុណភាព ចំនួន៤០០គីឡូក្រាម ត្រូវបានឈ្មួញដឹកឆ្លងដែនតាមច្រកអន្តរជាតិប៉ោយប៉ែត ដឹកមកដល់ចំណុចភូមិបាលិលេយ្យ២ តែត្រូវបានអ្នកសារព័ត៌មានរាយការណ៏ជូនមន្ត្រី បសុពេទ្យ ក៏ចាប់បានរថយន្តដឹកសាច់ខូចគុណភាពនោះ ហើយក៏យកទៅការិយាល័យ បសុពេទ្យឯខេត្តបន្ទាយមានជ័យ ដើម្បីកសាងសំណុំរឿងតាមនិតិវិធីនៃច្បាប់ ។
ប៉ុន្តែយោងតាមប្រភពសារព័ត៌មានក្នុងស្រុកបានចុះផ្សាយ ថា៖ លោក ហ៊ុយ ទួច ដោះលែងម្ចាស់រថយន្ត និងសាច់ខូចគុណភាពនោះជាថ្នូរនិងសាច់ប្រាក់៤លានរៀន?! ។
ជុំវិញករណីនេះកាលពីរសៀលថ្ងៃទី១៩តុលា២០១៧ លោក ហ៊ុយ ទួច អង្គភាពសារព័ត៌មានយើងមិនអាចទាក់ទងបានទេ ជុំវិញព័ត៌មានលេចឮថា បានដោះលែងរថយន្តដឹកអាហារខូចគុណភាព ថ្នូរនិងសាច់ប្រាក់ចំនួន៤លានរៀល ដើម្បីយកប្រាក់ដាក់ហោបៅ ៕