ក្រចេះ៖ កម្លាំងនគរបាលជំនាញនៃការិយាល័យប្រឆាំងគ្រឿងញៀនខេត្តក្រចេះ គ្រោងនិងបញ្ជូនខ្លួនជនសង្ស័យប្រុសស្រីចំនួន១០នាក់ទៅសាលាដំបូងខេត្តនៅថ្ងៃសុក្រនេះ ក្នុងចំណោមបក្សពួក១៣នាក់ដែលសមត្ថកិច្ចឃាត់ខ្លួនបានសង្ស័យជាប់ពាក់ពន្ឋ័ករណីជួញដូរនិងចែកចាយគ្រឿងញៀន នៅក្នុងទីតាំងស្តុកឈើកែឆ្នៃឈើមួយកន្លែងក្នុងស្រុកចិត្របុរី កាលពីពេលថ្មីៗនេះ ។
លោក វរសេនីត្រី ស៊ាង សុភក្រ័ នាយរងការិយាប្រឆាំងគ្រឿងញៀនខេត្តក្រចេះ បានអោយដឹងកាលពីល្ងាចថ្ងៃទី១២នេះថា ជនសង្ស័យប្រុសស្រីចំនួន១០នាក់គ្រោងនិងត្រូវបញ្ជូនទៅកាន់សាលាដំបូងខេត្ត នៅព្រឹកថ្ងៃសុក្រទី១៣នេះ បន្ទាប់ពីបញ្ជាប់ការសាកសួរនិងរកឃើញថាក្នុងចំណោមបក្សពួក១៣នាក់ គឺមានក្មេងស្រី៣នាក់ដែលមិនមានកាជាប់ពាក់ពន្ឋ័ក្នុងករណីខាងលើនេះ ។
លោកបញ្ជាក់អោយដឹងដែរថា បន្ទាប់ពីបញ្ជាប់កាសាកសួរសមត្ថកិច្ចរកឃើញថាជនសង្ស័យប្រុសស្រីទាំង១០នាក់ គឺមានជាប់ពាក់ពន្ឋ័និងករណីជួញដូរនិងចែកចាយគ្រឿងញៀនយ៉ាងអនាធិបតេយ្យ នៅក្នុងភូមិសាស្ត្រខាងលើ ហើយក៍ជាកន្លែងទីតាំងស្តុកឈើកែឆ្នៃឈើខុសច្បាប់ផងដែរ ដោយឡែកក្មេងស្រី៣នាក់ផ្សេងទៀតទើបនិងមកពីខេត្តព្រៃវែងទៅលេងផ្ទះបងប្អូនក្បែរទីតាំងលើ សមត្ថកិច្ចរកឃើញពិតជាមិនមានការជាប់ពាក់ពន្ឋ័ ក៍សម្រេចដោះលែងអោយត្រឡាប់ទៅផ្ទះវីញ ។
គួរបញ្ជាក់ថា ជនសង្ស័យទាំង១៣នាក់ត្រូវបានកម្លាំងនគរបាលជំនាញការិយាល័យប្រឆាំងគ្រឿងញៀនចាប់ឃាត់ខ្លួនបាននៅក្នុងទីតាំងស្តុកឈើមួយកន្លែង ដែលប្រតិបត្តិការនេះធ្វើឡើង ក្រោមការបញ្ជារលោកឧត្តមសេនីយ៍ទោរ លន់ សុផាត ស្នងការនគរបាលខេត្ត ក្រោមការសម្របសម្រួលពីសំណាក់លោក ជា សុភក្រ័ ព្រះរាជអាជ្ញារងអមសាលាដំបូងខេត្តក្រចេះកាលពីថ្ងៃទី១១ ខែតុលា ឆ្នាំ២០១៧ ស្ថិតនៅចំណុចភូមិក្បាលជួ ឃុំសំបុក ស្រុកចិត្របុរី ខេត្តក្រចេះ ។
ក្នុងនោះសមត្ថកិច្ចរឹបអូសបានថ្នាំញៀនចំនួន៤កញ្ចប់ធំតូច ថ្នាំញៀនប្រភេទគ្រាប់មួយចំនួន និងសម្ភារប្រើប្រាស់សម្រាប់មួយចំនួន ដោយឡែកឈើប្រណិតជាប្រភេទឈើបេង ធ្នង់ ជាច្រើនម៉ែត្រគូប ត្រូវកម្លាំងរដ្ឋបាលព្រៃឈើយកទៅរក្សាទុកនៅថ្នាលបណ្ដុះកូនឈើខ្សាដើម្បីចាត់ការតាមនិតិវិធីច្បាប់៕
