ខេត្តបន្ទាយមានជ័យ ៖ ក្រុមយុវជនមនុស្សធម៌គុម្ពឫស្សីរួមនិងសប្បុរសជមកពីក្រុងប៉ោយប៉ែតខេត្តបន្ទាយមានជ័យកាលពីព្រឹកថ្ងៃទី១០ខែតុលាឆ្នាំ២០១៧ម្សិលមិញបានមូលមតិគ្នាបាននាំយកសម្ភារសិក្សាមួយចំនួនមានប៊ិចសៀវភៅនិងទេយ្យទានទៅ ប្រគេនដល់ព្រះសមណសិស្សចំនួន៣០អង្គដែលព្រះអង្គកំពុងតែគង់សិក្សាក្នុងពុទ្ធសីមាវត្តរតនៈម៉ាឡៃ ស្ថិតក្នុងភូមិដូង ឃុំម៉ាឡៃស្រុកម៉ាឡៃសព្វថ្ងៃខ្វះខាតសម្ភារសិក្សា ។
លោក ព្រាប ឥន្ទ វឌ្ឍនៈ តំណាងឲ្យក្រុមមនុស្សធម៌គុម្ពឫស្សីក្រុងប៉ោយប៉ែតបានថ្លែងថា លោកបានដឹងដំណឹង ពីការខ្វះខាតរបស់សមណសិស្សនេះ តាមរយព័ត៌មានសង្គមដែលគេផុសផ្សាយ តមកទៀតលោកបានពិគ្រោះយោបល់គ្នា ក្រុមហើយក៏សម្រេចយកថ្ងៃទី១០ខែតុលាជាថ្ងៃចុះទៅប្រគេនទេយ្យទានដល់ព្រះសង្ឃ ទន្ទឹមនិងនោះក៏មានអ្នកស្រីជា សុផែន ដែលជាអាជីវករក្រុងប៉ោយប៉ែតរួមនិងក្រុមគ្រួសារផង ក៏បានជ្រះថ្លាសម្រេចនាំយកសម្ភារទៅប្រគេនសង្ឃនៅវត្តខាងលើជាមួយគ្នាតែម្តង ។
មូលហេតុដែលនាំឲ្យក្រុមរបស់លោកយកសម្ភារសិក្សាទៅប្រគេនព្រះសង្ឃនោះ ពិព្រោះថា វត្តអារាមនៅក្នុងខេត្តបន្ទាយមានជ័យនេះ មានវត្តច្រើន ប៉ុន្តែមិនមានបើកបង្រៀន ភាសាបាលីនោះទេ ។ ជាក់ស្តែងទីអារាមនានានៅក្នុង ក្រុងប៉ោយប៉ែត ដែលជាទីអារាមអាចមានលទ្ធភាពបើកបង្រៀនបាលីភាសាបាន តែព្រះចៅអធិការវត្តទាំងនោះហាក់មិនចាប់អារម្មណ៏និងកម្មវិធីសិក្សាបាលីនោះទេលោកថា៖ ភាសាបាលីគឺជាភាសាមួយដែលមានសារសំខាន់សម្រាប់អ្នកបួសសិក្សារៀនសូត្រ ហើយមានប្រយោជន៏ដល់សង្គមជាតិយើងទៀតផងដែរ ។
ចំណែក ព្រះគ្រូចៅអធិការវត្តរតនៈម៉ាឡៃ ព្រះអង្គបានសម្តែងនូវចិត្តត្រេកអរចំពោះម្ចាស់សទ្ធា ដោយព្រះអង្គ មានថេរដីការថា ព្រះអង្គពិតជាបានសប្បាយចិត្តត្បិតអីសាលាបាលី របស់ព្រះអង្គបានបើកបង្រៀនមកជាង៣ឆ្នាំមកហើយ ហើយក៏មិនដែលបានឃើញអ្នកណានាំយកសម្ភារសិក្សាមកប្រគេនដល់សមណៈសិស្សនោះឡើយ ទើបតែពេលនេះគឺក្រុមការងារមនុស្សធម៌គុម្ពឫស្សីមកពីក្រុងប៉ោយប៉ែតជាលើកទីមួយដែលនាំយកសម្ភារសិក្សាមកប្រគេន ។
លើសពីនេះព្រះគ្រូចៅអធិការវត្តរតនៈម៉ាឡៃ ព្រះអង្គបានមានថេរដីថា ភាសាបាលីមានផលប្រយោជន៏ខ្លាំងណាស់ ដល់អ្នកបួសរៀនសូត្រក្នុងព្រះពុទ្ធសាសនា ហើយការសិក្សារៀនសូត្របាលីភាសានេះប្រើរយពេលយូឆ្នាំក្នុងការសិក្សា ទើបចេះ ពុំនោះទេប្រើការមិនបានឡើយ ព្រះអង្គបន្តថា អ្នកបួសដែលនិយមបានសិក្សាបាលីភាសានេះ គឺ បួសយូព្រះវស្សាទើបលាចាកសិក្ខាបទ ប៉ុន្តែបើអ្នកបួសហើយមិនបានសិក្សារៀនសូត្រពីខ្លឹមសាររបស់ព្រះពុទ្ធសាសនាទេនោះ អ្នកបួសនោះក៏មិនបានយល់ដឹងពីតម្លៃរបស់ព្រះពុទ្ធនោះដែរ ។
ដោយយល់ឃើញពីសារប្រយោជន៏បែបនេះទើបព្រះអង្គ សម្រេចបើកឲ្យមានកម្មវិធី បង្រៀនបាលីនេះឡើង។ព្រះអង្គបានសំណូមពរដល់ប្រជាពុទ្ធបរិសទ្ធ័មេត្តាបន្តគាំទ្រនិងជ្រះថ្លាលើព្រះពុទ្ធសាសនា ដោយជឿលើធើ្វបុណ្យបានបុណ្យធើ្វបាបបានបាប ពោលគឺជឿលើកម្មផលនៃកម្ម ដើម្បីឲ្យព្រះពុទ្ធសាសនានៃយើងស្ថិតស្ថេគង់វង់នៅយូរអង្វែងគ្រប់៥០០០ព្រះវស្សា ដូចព្រះពុទ្ធទ្រង់សម្តែងទុក ៕
