ពិធីប្រគល់វិញ្ញាប័ណ្ណប័ត្រ បញ្ចប់ការសិក្សាថ្នាក់ទី១២ ជំនាន់ទី១ និងខួបគំរប់ ១០ ឆ្នាំ នៃសាលា ហូព បាត់ដំបងបានប្រព្រឹត្តទៅកាលពីថ្ងៃទី ៨ ខែសីហា ក្រោមអធិបតីភាពឯកឧត្តម ច័ន្ទ សុផល អភិបាលនៃគណអភិបាលខេត្តបាត់ដំបង។
ក្នុងរបាយការរបស់លោក សយ សុផល នាយកសាលាហូព បានឲ្យដឹងថា សាលាហូព បាត់ដំបង ជាសាលាចំណេះទូទៅបានបង្កើតឡើង ក្នុងឆ្នាំ២០០៤ នៅសង្កាត់រតនៈ ក្រុងបាត់ដំបង បានកំណត់បង្រៀនពេញមួយថ្ងៃ ចាប់ពីម៉ោង ៧:០០ ដល់ម៉ោង ៣:០០ រសៀល ដែលមានមុខវិជ្ជា អក្សរសាស្ត្រខ្មែរ និងអង់គ្លេស គណិតវិទ្យា សិក្សាសង្គម វិទ្យាសាស្ត្រ សីលធម៌ ពត៌មានវិទ្យា ជំនាញច្នៃប្រឌិត សេដ្ឋកិច្ចវិទ្យា អប់រំសុខភាព និងអប់រំកាយនិងកីឡា។ ជាលទ្ធផលក្នុងឆ្នាំសិក្សា ២០១៤-២០១៥ ផ្នែកបឋមសិក្សា មានសិស្ស ១៨១នាក់ ប្រឡងជាប់ ១៧៩នាក់ធ្លាក់២នាក់ ផ្នែកមធ្យម សិក្សា មានសិស្ស១៣៩នាក់ ប្រឡងជាប់១២៨នាក់ ធ្លាក់១១នាក់ សិស្សពូកែផ្នែកបឋមសិក្សាមាន ២៥នាក់ មធ្យមសិក្សា ៧នាក់ សិស្សគំរូល្អបឋមសិក្សាមាន ៧ នាក់ និងមធ្យមសិក្សាមាន ០១នាក់។
ក្នុងប្រសាសន៍ឯកឧត្តម ច័ន្ទ សុផល បានបញ្ជាក់ថាក្នុងយុទ្ធសាស្ត្រចតុកោណ ដំណាក់កាលទី ៣ របស់រាជរដ្ឋាភិបាល និតិកាលទី៥ នៃរដ្ឋសភា វិស័យអប់រំនៅតែជាវិស័យអាទិភាពមួយក្នុងចំណោម វិស័យផ្សេងៗទៀត ហើយការអប់រំប្រជាពលរដ្ឋឲ្យមានចំណេះដឹង និងចំណេះធ្វើ នៅតែត្រូវបានចាត់ ទុក ជាយុទ្ធសាស្ត្រដ៏សំខាន់ សម្រាប់កាត់បន្ថយភាពក្រីក្រ ព្រមទាំងជាកត្តាចម្បង នៃការអភិវឌ្ឍន៍ ប្រទេសជាតិ។ ឯកឧត្តមក៏បានកោតសរសើរដល់សាលាហូព បាត់ដំបង ដែលបានខិតខំប្រឹងពង្រឹង និងពង្រីកវិសាលភាព នៃការបណ្តុះបណ្តាលរបស់ខ្លួន ពីកម្រិតបឋមសិក្សារហូតដល់កម្រិតវិទ្យាល័យ ដើម្បីឆ្លើយតបទៅនិងទីផ្សារការងារនាពេលបច្ចុប្បន្ន។
ឯកឧត្តមបានកោតសរសើរ និងផ្តាំផ្ញើដល់ក្មួយៗដែលបានទទួលវិញ្ញាប័ណ្ណប័ត្រ ក៏ដូចជាការ លើកកំពស់សមត្ថភាពរបស់ខ្លួន ឲ្យបានខិតខំបន្តទៀត ដើម្បីប្រឡងចំណេះដឹង និងសីលធម៌សម្រាប់ ជាគុណប្រយោជន៍ដល់គ្រួសារ និងសង្គមធ្វើដែលសំខាន់លើសពីនេះទៀត គឺក្មួយៗត្រូវខិតខំកសាង ឲ្យបានសំរេចនូវសមត្ថភាព៤យ៉ាង ដែលជាមូលដ្ឋានគ្រឹះនៃការសិក្សា គឺខំរៀនឲ្យមានចំណេះដឹង ចំណេះធ្វើរៀនឲ្យមានសីលធម៌ និងរៀនឲ្យចេះរស់នៅជាមួយគ្នា ដោយគ្មានរើសអើង និងគ្មានការ បែងចែកអ្វីទាំងអស់។
ពិធីនេះត្រូវបានបញ្ចប់ក្រោយពីគណអធិបតីចែកជូនវិញ្ញាប័ណ្ណប័ត្រដល់សិស្សទាំង ២០រូប និងចែកជូនលើកទីកចិត្ត លោកគ្រូ អ្នកគ្រូ ក្នុងសាលាហូព រួចមក។
