ខេត្តបន្ទាយមានជ័យ ៖ ក្រុមអ្នកដឹកដីលក់នៅក្រុងប៉ោយប៉ែតខេត្តបន្ទាយមានជ័យ សព្វថ្ងៃកំពុងតែល្បីឈ្មោះខាងបំផ្លាញបរិស្ថាននៅលើដងផ្លូវជាតិលេខ០៥ និងដងផ្លូវបេតុងនានានៅក្នុងក្រុងប៉ោយប៉ែត។
ប្រជាពលរដ្ឋជាច្រើនបានលើកឡើងថា ក្រុមហ៊ុនដែលរកស៊ីដឹកអាចម៌ដីលក់នោះ មានឈ្មោះ ចាងចេងភាវ ថៅកែរូបនេះបានជីករណ្តៅដី នៅចំណុចភូមិទួលពង្រ សង្កាត់ផ្សារកណ្តាល កាលពីកន្លងទៅរណ្តៅរបស់ឈ្មោះ ចាង ចេងភាវ រូបនេះបានសម្លាប់កុមារាម្នាក់ ប៉ុន្តែមន្ត្រីជំនាញ និងអាជ្ញាធរក្រុងប៉ោយប៉ែតមិនបានដាក់ទោសទណ្ឌលើម្ចាស់រណ្តៅនោះទេ ដោយម្ចាស់រណ្តៅដីនោះជាសម្លាញ់ និងលោក ង៉ោ ម៉េងជ្រូន អភិបាលក្រុងប៉ោយប៉ែត ។
សូមបញ្ជាក់ថា រណ្តៅដីដែលបុគ្គលឈ្មោះ ចាងចេង ភាវ ជីកធើ្វអាជីវកម្មនោះមានជម្រៅជាង៦០ម៉ែត្រ និងទំហំសរុបជាង៦០ហិកតា ពាក់ព័ន្ធនឹងបញ្ហាខាងលើនេះមន្ត្រីបរិស្ថានខេត្តបន្ទាយមានជ័យ បានលើកឡើងថា រណ្តៅដីដែលមានម្ចាស់ឈ្មោះចាង ចេងភាវនោះ គឺជារណ្តៅដីខុសច្បាប់ព្រោះជម្រៅនៃមាត់រណ្តៅជ្រៅលើសច្បាប់ដែលបានកំណត់ឲ្យ។
តែទោះជាយ៉ាងនេះក្តីម្ចាស់រណ្តៅដីឈ្មោះចាង ចេង ភាវ រូបនោះបានលើកឡើងថា ខ្លួនមានលិខិតអនុញ្ញាតពីសាលាក្រុងក្នុងការធើ្វអាជីវកម្ម ជីកដីលក់ ចំណែកពលរដ្ឋស្នើសុំឲ្យលោកង៉ោមេង ជ្រូន មេត្តាបើកភ្នែកមើលសកម្មភាពរបស់ក្រុមឡានដឹកដីបុគ្គលឈ្មោះ ចាង ចេងភាវផង ព្រោះដងផ្លូវជាតិត្រូវបានឡានខាងលើបំផ្លាញអស់គ្មានសេសសល់ឡើយ ពោលគឺពោពេញដោយធូលីដីហុយដូចផ្សែង ចាប់ពីរង្វង់មូលរហូតដល់សាលាក្រុងតែម្តង ៕