ត្បូងឃ្មុំ៖ស្នងការនគរបាលខេត្តត្បូងឃ្មុំ បានត្រៀមនិងបញ្ជូនកងកម្លាំងចម្រុះប្រមាណ៣០០នាក់ ដើម្បីការពារសុវត្ថិភាពបច្ចប្បន្ន នៅមណ្ឌល ម៣ ឬពន្ធនាគារត្រពាំងផ្លុងជាប់ព្រំដែនវៀតណាម ដែលជាមណ្ឌលឃុំខ្លួន លោក កឹម សុខា ក្រោយពីក្រុមសមជិកសភារបស់គណបក្សសង្គ្រោះចេញសេចក្តីប្រកាសព័ត៌មានពីការទៅសួរសុខ ទុក្ខលោក កឹម សុខា នៅ ពន្ធនាការត្រពាំងផ្លុង ម.៣ ។
កងកម្លាំងចម្រុះត្រូវបានគេបំពាក់ដោយគ្រឿងសម្ពាវុធទំនើបៗ ដូចជាត្រៀមទៅប្រយុទ្ធនៅសមរភូមិក្តៅនាព្រំដែនវៀតណាមជាមួយកម្ពុជាយ៉ាងដូច្នេះអញ្ចឹង។សូមបញ្ជាក់ថា នៅថ្ងៃទី០៦ ខែកញ្ញា ឆ្នាំ២០១៧ លោកស្រី មូរ សុខហួរអនុប្រធានគណបក្ស បានសរសេរលិខិតទៅចៅក្រម គី ឬទ្ធី សុំជួបសួរសុខទុក្ខលោក កឹម សុខា នៅមណ្ឌលអប់រំកែប្រែទី៣ (ពន្ធនាគារត្រពាំងថ្លុង) នៅវេលាម៉ោង២រសៀលថ្ងៃទី១១ ខែកញ្ញា ឆ្នាំ២០១៧។
នៅក្នុងលិខិតស្នើសុំនោះ ក្រៅពីលោកស្រី មូរ សុខហួរ រួមមាន លោក ប៉ុល ហំម តំណាងរាស្ដ្រមណ្ឌលតាកែវ លោក ស៊ុន ឆៃ តំណាងរាស្ដ្រមណ្ឌលភ្នំពេញ លោក សួន សូរីដា តំណាងរាស្ដ្រមណ្ឌលកំពង់ស្ពឺ និងលោក គី វ៉ាន់តារា តំណាងរាស្ដ្រមណ្ឌលកំពង់ឆ្នាំង ដែលមានបំណងចូលសួរសុខទុក្ខលោក កឹម សុខា។
លោកចៅក្រម គី ឬទី្ធបានជម្រាបជូនទៅ លោកស្រី មូរ សុខហួតាមលិខិតថា «ដោយសារសំណុំរឿងកំពុងស្ថិតនៅក្នុងចំណាត់ការស៊ើបសួរ និងស្រាវជ្រាវប្រមូលភ័ស្ដុតាងនានា ហើយចៅក្រមមិនទាន់សាកសួរជនត្រូវចោទនៅឡើយ ហេតុនេះការចូលជួប ឬសួរសុខទុក្ខ អាចអនុញ្ញាតឲ្យបានតែមេធាវី និងក្រុមគ្រួសារ ជនត្រូវចោទដែលមិនទាន់ទិននៅក្នុងរឿងតែប៉ុណ្ណោះ។ សម្រាប់អ្នកដទៃផ្សេងទៀត ការចូលសួរសុខទុក្ខអាចអនុញ្ញាតឲ្យបាន ក្រោយពីចៅក្រមបានបំពេញកិច្ចចាំបាច់មួយចំនួនសិន… អាស្រ័យហេតុនេះ ការសុំចូលរួមសុខទុក្ខ លោក កឹម សុខា នៅមណ្ឌលអប់រំកែប្រែទី៣ វេលាម៉ោង២រសៀលថ្ងៃទី១១ ខែកញ្ញា ឆ្នាំ២០១៧ មិនអាចអនុញ្ញាតជូនបានទេ» ។
សូមបញ្ជាក់ដែរថានៅព្រឹកថ្ងៃទី១១កញ្ញឆ្នាំ២០១៧តំណាងរាស្ត្រគណបក្សប្រជាជន(អវត្តមានតំណាងរាស្ត្រគណបក្សសង្គ្រោះជាតិ)បើកកិច្ចប្រជុំដើម្បីសម្រេចឲ្យតុលាការចាត់ការលើសំណុំរឿងលោកកឹមសុខា(ទាំងនៅមានអភយ័ឯកសិទ្ធព្រោះគ្មានសម្លេង២ភាគ៣)។
ក្នុងកិច្ចសំណេះសំណាលជាមួយតំណាងកម្មករ កម្មការិនីជាង ៤ពាន់នាក់នៅមជ្ឈមណ្ឌលពិព័រណ៍ និងសន្និបាតកោះពេជ្រនាព្រឹកថ្ងៃទី១០ ខែកញ្ញា ឆ្នាំ២០១៧សម្តេចតេជោ ហ៊ុន សែន បានថ្លែងសំណុំរឿងនៃអំពើក្បត់ជាតិប្រហែលមិនបិទបញ្ចប់ត្រឹមការចាប់ខ្លួនលោក កឹម សុខា ប្រធានគណបក្សសង្គ្រោះជាតិនោះទេ។ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសបញ្ជាឲ្យស្វែងរកជាប់ពាក់ព័ន្ធមួយចំនួនទៀតនៅក្នុងគណបក្សប្រឆាំងមួយនេះ ហើយគណបក្សទាំងមូលក៏ត្រូវប្រឈមការ រំលាយចោលផងដែរ ប្រសិនបើរកឃើញជាប់ពាក់ព័ន្ធអំពើក្បត់ជាតិ។
ប្រសិនបើទប់ស្កាត់ទង្វើក្បត់ជាតិរបស់លោក កឹម សុខា មិនទាន់ទេនោះ ប្រទេសជាតិទាំងមូលអាចនឹងត្រូវរលាយហិនហោចជាក់ជាមិនខាន។
«ដូច្នេះយើងមិនអាចថយក្រោយទេ ហើយយើងនឹងពិនិត្យមើលនរណាខ្លះពាក់ព័ន្ធ តើបក្សទាំងមូលពាក់ព័ន្ធឬអត់?។ បើបក្សទាំងមូលពាក់ព័ន្ធវាច្បាស់ណាស់ថា បក្សត្រូវបានរំលាយចោលតែម្តង អំពើឃុបឃិតក្បត់ជាតិ ក្បត់ប្រទេស»។
ប្រធានគណបក្សប្រឆាំង លោក កឹម សុខា ត្រូវបានសមត្ថកិច្ចចាប់ខ្លួននៅផ្ទះរបស់លោកដោយគ្មានដីកា កាលពីរំលងអធ្រាត្រចូលថ្ងៃ០៣ ខែកញ្ញា ហើយបញ្ជូនទៅឃុំខ្លួនភ្លាមៗ នៅមណ្ឌលពន្ធនាគាត្រពាំងផ្លុង ស្ថិតក្នុងខេត្តត្បូងឃ្មុំ។ការចាប់ខ្លួននេះ ត្រូវបានមន្ត្រីរដ្ឋាភិបាលអះអាងថា ជាការអនុវត្តច្បាប់ ដោយរដ្ឋាភិបាលបានចោទមេបក្សប្រឆាំងរូបនេះថា “ក្បត់ជាតិ”។
គណបក្សប្រឆាំងបានចេញសេចក្ដីថ្លែងការណ៍ភ្លាមៗជំរុញឲ្យរដ្ឋាភិបាលដោះលែង លោក កឹម សុខា ដោយគ្មានលក្ខខណ្ឌ។ គណកប្សប្រឆាំងបានហៅការចាប់ខ្លួនលោក កឹម សុខា ថា ជាការរំលោភបំពានអភ័យឯកសិទ្ធិសភា និងគាបសង្កត់ផ្នែកនយោបាយ។
តំណាងអង្គការសហប្រជាជាតិ និងស្ថានទូតធំៗរួមមាន អង់គ្លេស អូស្ត្រាលី អាមេរិក និងសហភាពអឺរ៉ុប និងប្រទេសមួយចំនួនទៀត បានសម្តែងការព្រួយបារម្ភជាខ្លាំង ជុំវិញការចាប់ខ្លួនមេបក្សរូបនោះ ហើយពួកគេ ជំរុញឲ្យរដ្ឋាភិបាលកម្ពុជា បញ្ឈប់ការគំរាមកំហែងលើគណបក្សប្រឆាំងផងដែរ។